NYT: Načalnik Hienštaba RF Hierasimaŭ byŭ pad Iziumam, ale paśpieŭ źjechać da abstrełu
U ZŠA paćviardžajuć, što načalnik Hienieralnaha štaba RF Valeryj Hierasimaŭ pryjazdžaŭ u Charkaŭskuju vobłaść, kab pasprabavać źmianić chod rasijskaha nastupu na ŭschodzie Ukrainy. Pra heta sa spasyłkaj na dvuch nienazvanych amierykanskich čynoŭnikaŭ piša The New York Times.
Ukraina daviedałasia pra vizit Hierasimava i naniesła ŭdar pa adnoj z pazicyj, dzie jon znachodziŭsia, ale toj užo paśpieŭ źjechać.
Daradca kiraŭnika Ofisa prezidenta Alaksiej Arastovič śćviardžaje, što ŭ vyniku ŭdaraŭ pa hetym rajonie zahinuli nie mienš za 200 rasijskich vajskoŭcaŭ, u tym liku 30 staršych aficeraŭ — ad majora da pałkoŭnika.
«Amal 200 zabitych u vyniku troch udaraŭ pa štabach, jakija za piać sutak adbylisia. Siarod ich sama mieniej 30 staršych aficeraŭ, na adnym punkcie kiravańnia źniščany kamandujučy. Adzin z elitnych rasijskich śpiecnazaŭcaŭ, jaki achoŭvaŭ kahości vielmi vysokapastaŭlenaha, kankretna paciarpieŭ», — raspavioŭ jon 1 maja ŭ efiry YouTube-kanała «Fiejhin Live».
Adnym z zahinułych, vierahodna, byŭ hienierał-major Andrej Simanaŭ, piša NYT.
Amierykanskija krynicy vydańnia nie majuć infarmacyi pra abstreł rasijskich štaboŭ, ale paćviardžajuć pryjezd Hierasimava. Prysutnaść takoha vysokapastaŭlenaha čynoŭnika na pieradavoj — niezvyčajnaja padzieja. «Naša pracoŭnaja zdahadka ŭ tym, što jon byŭ tam, bo jany pryznajuć, što nie vyrašyli ŭsie svaje prablemy», — skazaŭ adzin z surazmoŭcaŭ vydańnia.
- 28 krasavika ŭ ŚMI sa spasyłkaj na svaje krynicy źjaviłasia infarmacyja pra toje, što ŭ zachopleny Izium Charkaŭskaj vobłaści pryjechaŭ načalnik Hienštaba RF Valeryj Hierasimaŭ, kab asabista kamandavać vojskami na Danbasie.
- 30 krasavika kala štaba, dzie nibyta znachodziłasia staŭka Hierasimava, adbyŭsia vybuch ź vialikaj kolkaściu paranienych. Na nastupny dzień papaŭźli čutki, što Hierasimaŭ taksama atrymaŭ ranieńni, paśla čaho jaho terminova vyvieźli ŭ Rasiju, ale ŭ MUS Ukrainy infarmacyju ab ranieńni nie paćvierdzili.
U Polščy aryštavali byłoha kiraŭnika biełaruskaha «Paspalitaha rušeńnia» — pahražaje 10 hod za narkotyki26
Kamientary