Ad 11 tysiač dalaraŭ. Kolki kaštujuć i jak vyhladajuć samyja tannyja kvatery ŭ abłasnych centrach
Za apošnija miesiacy ceny na nieruchomaść u Biełarusi źnizilisia na 8-20% u zaležnaści ad typu žylla. Asobnyja kvatery ŭ Minsku pradajucca pa cenach kala 30 tysiač dalaraŭ. Vyvučyli samyja tannyja prapanovy ŭ abłasnych centrach.
Brest
Kali nie źviartać uvahi na kvatery, jakija pradajucca ŭ starych draŭlanych damach ź piačnym aciapleńniem i tualetam na vulicy, to samaja tannaja ŭ Breście — za 17 700$.
Stolki prosiać za adnapakajoŭku, jakaja mieścicca na pieršym paviersie piacipaviarchovaha doma 1970 hoda pabudovy. Ahulnaja płošča kvatery — 20,9 m².
«Ciopłaja kvatera ŭ žyłym stanie, jość padvalnaje pamiaškańnie, raźvitaja infrastruktura», — havorycca ŭ apisańni.
Niahledziačy na samuju nizkuju canu, pry nieabchodnaści ŭ hetuju kvateru možna zajazždžać adrazu paśla kupli.
Druhaja pa canie kvatera Bresta aceniena ŭ 18 000$, stolki kaštuje adnapakajoŭka ŭ cahlanym domie 1999 hoda pabudovy pa vulicy Lejtynanta Rabcava.
Jak i ŭ papiarednim varyjancie, haspadary acenvajuć stan kvatery, jak «žyły». Z mebli ŭ asnoŭnym pakoi majecca adnaspalny łožak, šafa i maleńki stoł. U apisańni kažuć, što mohuć pakinuć meblu pa damoŭlenaści.
Ahułam u Breście pradajecca kala dvuch dziasiatkaŭ kvater pa canie da 20 tysiač dalaraŭ.
Viciebsk
Samaja tannaja kvatera Viciebska ź liku tych, dzie jość centralnaje aciapleńnie i sanvuzieł u kvatery, vystaŭlena na prodaž za 15 000$.
Ahulnaja płošča adnapakajoŭki 36 m². Płošča asnoŭnaha pakoju — amal 20 «kvadrataŭ». U domie 1958 hoda pabudovy byŭ praviedzieny kapitalny ramont z zamienaj trub i batarej. Ścieny budynka ŭciepleny termašubaj.
U košt žytła ŭvachodzić mebla, kvatera pradajecca z adznakaj «terminova».
Za 15 500$ u Viciebsku možna kupić dvuchpakajoŭku ŭ centralnaj častcy horada. Ahulnaja płošča kvatery usiaho 29 m². Mieścicca jana na trecim paviersie staroha trochpaviarchovaha doma, jaki letaś pieražyŭ kapitalny ramont.
Stan kvatery śviedčyć pra toje, što pražyvańnie adrazu paśla kupli ŭ joj naŭradci mahčymaje.
Siarod pieravah pradaŭcy adznačajuć vysokija stoli, šyrokija akonnyja prajemy, raźvituju infrastukturu i mahčymaść pierarabić dvuchpakajoŭku ŭ zručnuju kvateru-studyju.
Vynikaje, što samyja tannyja kvatery ŭ Viciebsku kaštujuć prykładna na 2-3 tysiačy dalaraŭ mienš, čym u Breście.
Homiel
U samym bujnym abłasnym centry Biełarusi možna nabyć adnapakajoŭku za 11 500$. U takuju sumu aceńvajuć kvateru na pieršym paviersie 9-paviarchovaha doma 1978 hoda pabudovy pa adrasie vulica 60 hod SSSR, 15. Ahulnaja płošča kvatery 20,7 m².
«Dobra raźvita infrastruktura, u piešaj dastupnaści sadki, škoły, prypynki hramadskaha transpartu, krama, paliklinika. U kvatery nichto nie prapisany. Pradaju biez pasiarednikaŭ», — havorycca ŭ abjavie.
Nastupnaja pa canie kvatera ŭ Homieli aceniena ŭ 12 300 dalaraŭ.
Hetaja adnapakajoŭka taksama mieścicca na pieršym paviersie cahlanaha 9-paviarchovika. Badaj, hałoŭnaje adroźnieńnie ad papiaredniahia varyjanta — najaŭnaść płastykavych voknaŭ i stalnych uvachodnych dźviarej.
«Novyja vokny PVCH, pobač «Jeŭraopt» i zialonaja zona. Cana kančatkovaja», — rekłamuje pradaviec.
Ahułam u Homieli pradajecca bolš za dziesiać paŭnavartasnych kvater koštam da 15 tysiač dalaraŭ.
Hrodna
Samaja tannaja kvatera ŭ Hrodnie aceniena ŭ 17 700$. Stolki prosiać za adnapakajoŭku ŭ histaryčnym centry horada płoščaj 17,3 m². Naturalna, što ŭsie pamiaškańni ŭ joj vielmi ścipłych pamieraŭ, z-za hetaha duš mieścicca nie ŭ sanvuźle, a na kuchni.
Dom raźmieščany ŭ cichim miescy z pryhožym unutranym dvorykam. Ustanoŭleny płastykavyja škłopakiety, vyšynia stolaŭ 3,43 mietra, apisvajuć kvateru haspadary.
Druhaja z samych tannych kvater u Hrodnie aceniena ŭ bolš, čym 20 tysiač dalaraŭ.
Za adnapakajoŭku na zavułku Davatara, jakaja mieścicca na piatym paviersie doma, pabudavanaha ŭ 1963 hodździe, prosiać 20 900$.
«Čysty akuratny padjezd. Jość sklep z abstalavanaj jačejkaj. Pablizu doma prypynki hramadskaha transpartu. U 10 chvilinach chady da parku Žylibiera, płoščy Lenina. Kvatera vydatna padydzie ludziam, jakija šanujuć kamfort», — havorycca ŭ apisańni.
Vynikaje, što ŭ adroźnieńnie ad inšych abłasnych centraŭ, u Hrodnie pradajecca tolki adna kvatera koštam da 20 tysiač dalaraŭ, usie astatnija kaštujuć daražej.
Mahiloŭ
Samaja tannaja kvatera Mahilova — heta adnapakajoŭka ŭ panelnym domie 1976 hoda. Mieścicca jana na pieršym paviersie, i maje ahulnuju płošču ŭ 34 m². Prosiać za jaje 17 500$.
Pradajuć kvateru biez mebli.
Da apisańnia haspadary padyšli z peŭnym kreatyvam.
«Vaša pieršaja kvatera. Vyrašajcie sami, jakoj jana budzie. Svaja kvatera — heta niezaležnaść. Samastojna vyrašać, kali pryjści dadomu, što jeści, i asabista apłačvać rachunki. Heta pieršy krok u darosłaje žyćcio. Chaj baćki prychodziać da vas u hości», — zavablivaje abjava.
U Mahilovie jość jašče adna kvatera za 17 500$. Stolki prosiać za adnapakajoŭku ŭ domie 1967 hoda pabudovy paśla kapramontu, kvatera mieścicca na druhim paviersie.
Ahulnaja płošča — kala 30 «kvadrataŭ». Jeść bałkon, vokny ŭ chacie staryja. U vannym pakoi ścieny sčyščany pad ablicoŭku plitkaj. Stan ramontu haspadary apisvajuć, jak drenny.
Ahułam u Mahilovie pradajecca bolš za dziesiać kvater pa cenach da 20 tysiač dalaraŭ.
Čytajcie taksama: Kolki kaštujuć i jak vyhladajuć samyja darahija katedžy ŭ abłasnych centrach?
«Kuplali dla dziaciej, a ciapier…» U Minsku ŭsio čaściej pradajuć «hołyja» kvatery va ŭžo zasielenych damach
Ad 29 tysiač dalaraŭ. Jak vyhladajuć i kolki kaštujuć samyja tannyja kvatery Minska
Kandydat u prezidenty ad kamunistaŭ zaklikaje zabrać i padzialić majomaść apazicyjanieraŭ22
Kamientary