Zasialeńnie ŭ «luks» — z dazvołu rajvykankama. Pahladzieli na haścinicy ŭ biełaruskaj pravincyi
Vyvučyli ceny na pražyvańnie i vyhlad numaroŭ u haścinicach u samych biednych rehijonach krainy.
Haścinica «Šarkaŭščyna»
Pa vynikach minułaha hoda, na apošnim miescy pa ŭzroŭni siaredniaj zarpłaty apynułasia Šarkaŭščyna. U pasiołku haradskoha typu z nasielnictvam kala 6 tysiač čałaviek jość adna haścinica z adnajmiennaj nazvaj.
Znachodzicca jana pa adrasie vulica Kamsamolskaja, 17. U joj 18 numaroŭ na 38 čałaviek.
Siarod 18 numaroŭ try paznačny jak «luks». Hałoŭnaje adroźnieńnie ad zvyčajnych pakojaŭ u tym, što ŭ ich jeść duš. Pastajalcam astatnich 15 numaroŭ davodzicca karystacca ahulnym dušam na paviersie.
Sutki pražyvańnia ŭ dvuchmiesnym «luksie» abyducca ŭ 38 rubloŭ 58 kapiejek. Numary siaredniaha ŭzroŭniu (pa Šarkaŭčynskich mierkach) kaštujuć jašče tańniej — 24,60 rubla.
Ale ź luksavymi numarami ŭ Šarkaŭščynie nie ŭsio tak prosta, bo biez dazvołu ad miascovaha rajvykankamu dla zasialeńnia dasiažny tolki adzin z troch numaroŭ. Na inšyja dva jość broń ad vykankama, tamu zasialać tudy pastajalcaŭ ci nie, buduć vyrašać čynoŭniki, a nie supracoŭniki haścinicy. Pa słovach apošnich, rajvykankam davoli redka dazvalaje puskać haściej u svaje «luksy».
Haścinica «Mścisłaŭ»
U Mścisłavie z nasielnictvam kala 10 tysiač čałaviek taksama jość tolki adna haścinica z 41 pakojem na 74 miescy. Adras — vulica Praletarskaja, 53.
Niahledziačy na toje, što sam rajon pa zarobkach amal nie adroźnivajecca ad Šarkaŭščyny, haścinica tut zusim inšaha ŭzroŭniu.
Dušavyja pakoi jość amal va ŭsich numarach. Interjery taksama radujuć, bo ŭ 2021 hodzie haścinica pieražyła kapitalny ramont.
Košt łožka-miesca ŭ numarach vyšejšaj katehoryi składaje 53 rubli 36 kapiejek. Za hetyja hrošy vy atrymajecie dvuchmiesny dvuchpakajovy numar z chaładzilnikam, televizaram, dušam i inšymi rečami nieabchodnymi dla pražyvańnia.
Sutki ŭ adnamiesnym numary 1-ha razradu kaštujuć 40 rubloŭ 13 kapiejek. Aznajomicca z cenami na pražyvańnie možna pa spasyłcy.
Słaŭharad, haścinica «Sož»
Słaŭharadskaja haścinica nosić nazvu nie rajcentra, a raki, na jakoj staić haradok z nasielnictvam kala 8 tysiač čałaviek. Adnačasova ŭ haścinicy pa adrasie vulica Kastryčnickaja, 3a moža pražyvać da 40 pastajalcaŭ. U haścinicy jość adzin numar «luks» i adzin «paŭluks». Noč pražyvańnia ŭ «luksie» abydziecca ŭ 29,25 rubla. Za hetyja hrošy vy atrymajecie numar z chaładzilnikam, haračaj vadoj i televizaram. Za miesca ŭ «paŭluksie» biez televizara pryjdziecca vykłaści 16,44 rubla.
Vodhukaŭ u «Sož» u Google chapaje — 101 kamientar, pavodle jakich haścinica atrymała 3 zorki z 5 mahčymych. Adšukać aktualny kantakt možna na sajcie vykankama.
Kruhłaje, haścinica «Druć»
Samaje tannaje miesca ŭ haścinicy «Druć» abydziecca ŭ 15,60 rubla, a samaje darahoje — u 29,30 rubla. Mieścicca haścinica pa adrasie vulica Savieckaja, 36.
Sychodziačy ź infarmacyi na sajcie rajvykankama, u haścinicy jość nievialiki bar i biljardny stoł.
Kali datelefanavacca ŭ adzinuju Kruhlanskuju haścinicu nie atrymajecca, to vy možacie pasprabavać zanačavać u ekaturystyčnym kompleksie «Mikałajeŭskija sažałki». Na terytoryi kompleksu znachodzicca haścinica «Łada». Sutki pražyvańnia — ad 44 rubloŭ za čałavieka ŭ adnamiesnym numary (55 za dvuch čałaviek) da 85,80 rubla za noč u dvuchmiesnym «luksie».
Znajści kantaktnyja numary i padrabiaźniej aznajomicca z prapanovaj ad «Mikałajeŭskich sažałak» možna na sajcie arhanizacyi.
Haścinica «Čavusy»
U Čavusach jość haścinica z adnajmiennaj nazvaj. Jana raźličana na 74 čałavieki, jakija mohuć raźmieścicca ŭ 27 numarach roznaha ŭzroŭniu kamfartabielnaści.
Tańniej za ŭsio abydziecca kojka-miesca z padsialeńniem — usiaho 21 rubiel. Duš i prybiralnia ahulnyja na błok z 2-3 numaroŭ.
Sutki ŭ numary pavyšanaj kamfortnaści kaštujuć 48 rubloŭ. Niekalki hod tamu rajonnaja haścinica pieražyła rekanstrukcyju, tamu numary vyhladajuć całkam hodna.
Pašpart Novaj Biełarusi pačnuć vydavać z 26 studzienia. Što viadoma i jak atrymać?60
Kamientary
ja łučševa treša u žyźni nie vidzieła
baćka, ja liblu tibia - čmoki-čmoki