Akreślilisia čatyry scenary skančeńnia vajny va Ukrainie. I ŭsie jany mianiajuć situacyju Biełarusi

Ukrainski ściah, ustanoŭleny na vostravie Źmiainy. Fota Ministerstva abarony Ukrainy

Viadoma, nichto pakul nie viedaje maštabaŭ lend-lizu i jak buduć adkazvać na jaho ruskija. Usio moža źmianić i čorny lebiedź — naprykład, raptoŭnaja śmierć Pucina ci vykarystańnie atamnaj zbroi.

Kali ž prymiem, što ŭsio budzie iści tak, jak idzie, to samy imavierny

scenar 1— ruskija daciskajuć ukraincaŭ na Danbasie i zajmajuć, horad za horadam, pasiołak za pasiołkam, usiu Danieckuju vobłaść.

Pry hetym im, jak ciapier dla zaniaćcia Sievieradaniecka i Lisičanska, davodzicca kancentravać tam maksimum svaich siłaŭ. Dla pucinskaj elity zaniać Danieckuju vobłaść — pytańnie žyćcia i śmierci. Ciažka pradać ułasnamu narodu i apošnim sajuźnikam niešta mienšaje za pieramohu. «Rasija nastolki słabaja?» — skažuć usie.

Apošnija dva miesiacy ruskija kinuli na Łuhanščynu bolšaść siłaŭ, a na inšych kirunkach jany abmiažoŭvalisia tolki abaronaj.

Pytańnie, ci zmohuć hetym skarystacca ŭkraincy i, z dapamohaj novaj zachodniaj zbroi, pačać nastupać pad Chiersonam i ŭ Zaparožskaj vobłaści.

Scenar 2 — heta kali rasijskaja armija budzie vymušanaja zrabić «žest dobraj voli» i adstupić z Chiersona za Dniapro (tam usiaho para mastoŭ, jakija robiacca lohkaj zdabyčaj ukrainskaj artyleryi), ale pry hetym dabiŭšysia pośpiechu ŭ nastupie na Słaviansk i Kramatorsk.

Scenar 3 — heta kali ruskija Danieckuju vobłaść taki zajmuć, ale buduć pry hetym vycisnutyja nie tolki z Chiersona, ale i ź Mielitopala dy Biardzianska.

Scenar 4 — ukraincy adbivajuć usie ataki ruskich i zachoŭvajuć pad svaim kantrolem Słaviansk i Kramatorsk, ale nie vyzvalajuć Chiersona, paśla čaho vajna ŭvachodzić u patavuju stadyju na rubiažach, jakich jana dasiahnuła.

Mnie ciažka sabie ŭjavić scenary, pry jakich ruskija raptam na druhim paŭhodździ vajny, kali Zachad skancentravaŭsia na adpory im, raptam pačynajuć chutka prasoŭvacca. Kali jany nie zdoleli zrabić toje ŭ sakaviku ci mai, to dzie jany voźmuć resursy dla ryŭka? Toje, što bojeprypasy pačynajuć vieźci navat ź Biełarusi, śviedčyć, što «zapasu siłaŭ» u Rasii asabliva niama. 

U toj ža čas ciažka sabie ŭjavić i kab Ukraina atrymała ad Zachadu stolki ŭzbrajeńnia, što zmoža adkinuć rasijskija vojski na pazicyi da 24 lutaha. Ciažka ŭjavić, kab paru dziasiatkaŭ HIMARSaŭ (na siońnia ich 9, abiacajuć jašče dziasiatak), paru socień haŭbic i bieśpiłotnikaŭ mahli tak istotna źmianić bałans. Niaŭžo rasijskaja armija až nastolki słabaja?

My bačym, što Zachad baicca davać Ukrainie stolki zbroi, kolki mahło b spravakavać Pucina na jadzierny ŭdar, bo nie viedaje, jak možna było b reahavać na taki ŭdar. Napeŭna, daviałosia b nanosić udary ŭ adkaz? Kašmar.

Abo dušyć Rasiju tak radykalna, što istotna paciarpieła b i suśvietnaja ekanomika.

Možna vykazvać hipotezy, ci ŭvojdzie vajna ŭ praciahły, viałaciakučy stan paśla taho, jak budzie realizavany adzin z čatyroch scenaroŭ, ci dasiahnuć spynieńnia ahniu, ci pačniecca zaciažnaja pazicyjnaja vajna ź nievialikimi prasoŭvańniami pa ŭsioj raściahnutaj linii frontu, jakuju my ŭžo nazirali dva apošnija miesiacy pad Chiersonam, Charkavam i Zaparožžam.

Ale možna adnaznačna kazać, što kožny z čatyroch scenaroŭ — nie toj, jaki čakaŭsia Łukašenkam.

Ukraina paniesła i praciahvaje nieści žachlivyja straty ŭ ludziach i infrastruktury, ale jana zachoŭvaje dziaržaŭnaść i niezaležnaść i jaŭna vyjdzie z vajny maralna i abaronna ŭzmocnienaj. Štości anałahičnaje jak ź Finlandyjaj u 1940-m.

Bolš za toje, kali Zachad vyrašyć pieradać Ukrainie zamarožanyja rasijskija zołatavalutnyja reziervy, kraina zdoleje chutka adbudavacca. Tam hihanckija srodki: prykładna šeść hadavych biudžetaŭ davajennaj Ukrainy. 

Zadačaj-maksimum Maskvy, zdajecca, była likvidacyja ŭkrainskaj dziaržaŭnaści, fizičnaja likvidacyja kiraŭnictva i poŭnaja akupacyja Ukrainy z anieksijaj jaje poŭdnia. Ukrainskija dziaržaŭnyja i kulturnyja elity pry hetym mieli być fizična źniščanyja ci vycisnutyja za miažu.

Siarednim byŭ scenar, što ŭkraincy ŭsio ž buduć supraciŭlacca, ale adstajać tolki zachodnija vobłaści krainy.

Prahramaj-minimum była akupacyja ŭsiaho poŭdnia, z Adesaj i Mikałajevam, usioj tak zvanaj, u impierskaj terminałohii, «Navarosii», i adrazańnie taho, što zastałosia b ad Ukrainy, ad mora.

Navat prahramu-minimum Maskvie i Łukašenku realizavać nie ŭdałosia.

Zamiest udziełu ŭ dzialbie bahataha ŭkrainskaha piraha i dostupu da porta ŭ Mikałajevie dla biełaruskaha kaliju, łukašenkaŭcy atrymali vializnaje padzieńnie ekanomiki, stratu takoha vyhadnaha ŭkrainskaha rynku. Ukraina vystajała, a heta pieradumova zdabyćcia niezaležnaści i Biełaruśsiu.

Nielha vyklučać varyjant, što kali na rasijska-ŭkrainskim froncie ŭtvorycca niavyhadny dla Rasii pat, kali kanflikt zamarozicca, Rasija pačnie jašče bolš pierałamvać Biełaruś.

Samy pazityŭny dla Biełarusi varyjant taki, pry jakim Rasii paniesła b nastolki mocnuju parazu, što joj stała b nie da mocnaj padtrymki satelitaŭ.

Ëść i jašče adzin niuans, jaki ciažka pradkazać i jaki toić vialikija ryzyki. Kali Ukraina pry padtrymcy Zachadu budzie atrymlivać nad Rasijaj bujnuju pieramohu,

Kijeŭ — i Varšava, i Vilnia — buduć zacikaŭlenyja ŭ vyzvaleńni Biełarusi nie ź niejkich humanitarnych mierkavańniaŭ, a z čysta samazachavaŭčych. Bo heta płacdarm, ź jakoha atakavali Kijeŭ, i mohuć anałahična atakavać iznoŭ — pryčym nie tolki Kijeŭ, ale i Suvałkaŭski kalidor, i Vilniu, i Varšavu.

To-bok heta nie toje, na što možna machnuć rukoj i skazać — navošta heta ŭvohule nam patrebna.

Minsk u takoj situacyi byŭ by zmušany da praviadzieńnia bolš niezaležnaj palityki, adpaviednaj novamu bałansu siłaŭ u rehijonie.

Biełarusi krajnie niavyhadna, kab apuściłasia novaja žaleznaja zasłona, za jakoj akazalisia b nie tolki Rasija z akupavanymi ŭkrainskimi terytoryjami, ale i Biełaruś jak zachodni tupikovy apiendyks.

• 0
• 169
• 0
• 16
• 14
• 22
• 34