«Dobra padumajcie, pierš čym siudy pierajazdžać». Kolki kaštuje žyćcio ŭ Emiratach
Niekalki miesiacaŭ tamu Raman Marcinovič, kamiercyjny dyrektar nievialikaj IT-kampanii, razam z žonkaj pierajechaŭ u Dubaj — prosta zaŭsiody maryŭ žyć u ciopłaj krainie, na bierazie mora ŭ sučasnym horadzie, a nie na adasoblenym vostravie. Apynuŭšysia ŭ AAE — krainie, jakaja bolš za ŭsio padychodzić pad apisańnie mary, sutyknuŭsia z žorstkaj realnaściu: piakielnaj śpiakotaj i vysokimi koštami na ŭsio (ad ježy da strachoŭki). Daviedalisia, kolki kaštuje žyćcio ŭ adnoj z samych bahatych krain śvietu, piša myfin.by.
«+55 hradusaŭ u cieni»: čakańni, jakija nie supali z realnaściu
Raman Marcinovič užo niekalki hadoŭ u IT: vykonvaje rolu CCO u nievialikaj kampanii i raźvivaje ŭłasny prajekt. «Udalonka» dazvalaje pracavać ź luboj kropki śvietu. Sioleta Raman razam z žonkaj nakiravaŭsia ŭ nievialiki vodpusk u Hruziju. Prahułki pa nabiarežnaj viasnovaha Batumi nastolki skaryli paru, što jany vyrašyli ažyćciavić maru — pierajechać žyć da mora.
— Pryčym ja zaŭsiody žadaŭ žyć nie na niezasielenym vostravie, a ŭ sučasnym horadzie, jaki b dazvoliŭ paŭnavartasna realizoŭvać svoj patencyjał i zakryvać usie patreby siamji. Tamu vybrali dla pierajezdu AAE, kali być bolš kankretna — Dubaj. Tut, da ŭsiaho inšaha, dastatkova prosta adkryć i vieści biźnies. Nadziejnaja zakanadaŭčaja struktura, asablivaja sistema padtrymki pradprymalnictva zrabili Dubaj i Emiraty ŭ cełym viadučym inviestycyjnym centram u śviecie. I heta ŭsiaho za 50 hod isnavańnia dziaržavy, — razvažaje mužčyna.
Raman pierabraŭsia ŭ Dubaj razam z žonkaj u krasaviku hetaha hoda. Jakraz pierad pačatkam leta, jakoje ŭ AAE asabliva śpiakotnaje.
— Ciapier u Dubai kalandarnaje leta, a heta značyć, što nižej za +34 hradusy tempieratura na praciahu dnia nie apuskajecca (tak-tak, tut navat nočču +34). Dniom pavietra nahravajecca da 40 hradusaŭ, jakija z-za vysokaj vilhotnaści adčuvajucca, jak +55, i heta ŭ cieni! Uvohule, praz try miesiacy my z žonkaj usio jašče ŭ pracesie aklimatyzacyi. Ale dla siabie vyrašyli, kali «pieražyviom» leta ŭ AAE, to nas užo ničym nielha budzie spałochać, — kaža Raman.
Asnoŭny faktar, da jakoha davodzicca pryvykać siamji biełarusaŭ u AAE, — multynacyjanalnaść.
— Pradstaŭnikoŭ jakich nacyj my tut tolki nie sustrakali! Navat składana ŭsich pieraličyć. Pry hetym absalutnaja bolšaść — vychadcy z paŭdniovaazijackich krain, mientalitet jakich vielmi adroźnivajecca ad słavianskaha. U toj ža čas takoje stanovišča hulaje nam na ruku — my tut nie zdajomsia «biełymi varonami», «čužyncami», jakija pryjechali za lepšym žyćciom, tamu što takich «čužyncaŭ» tut kala 88% (tak, karennyja emiratcy składajuć usiaho 11—12% ad usiaho nasielnictva Dubaja).
«Zabrali z saboj usie źbieražeńni»: kolki kaštuje žyćcio ŭ AAE
Siamja viedała, što AAE — bahataja kraina, i nie dumała, što žyćcio ŭ joj budzie tannym. Abodva byli padrychtavanyja da pierajezdu maralna i finansava.
— My nie zmahli zahadzia praličyć dakładny biudžet na pieršy miesiac, tamu što prosta nie znajšli infarmacyju pra ceny ŭ AAE ŭ svabodnym dostupie. U adnych błohach pisali pra $1500 na paru, u inšych — $3000, u trecich — $5000. Tamu prosta ŭziali z saboj usie hrašovyja nazapašvańni i adpravilisia nasustrač pryhodam, — raspaviadaje Raman.
Biełaruskaja siamja arandavała kvateru, pa miascovych paniaćciach nievialikuju: 1 spalny pakoj, haścioŭnia, kuchnia i 2 vannyja pakoi. Heta ličycca «adnapakajoŭkaj» ź minimalnymi vyhodami. Pry hetym praktyčna kožny žyły dom maje ŭłasny basiejn, trenažornuju zału i centralny kandycyjanier, što, viadoma ž, dadaje kamfortu.
— Košt arendy takoha žylla ŭ hod prykładna $17000 + kamisija ahienctva (5%) + VAT (5%) + zakład (5%) + internet ($490 na hod) + kamunalnyja pasłuhi ($100 na miesiac). I heta, darečy, košty za žytło biez mebli ŭ adnosna spakojnym, novym rajonie.
U Dubai 99% kvater zdajucca absalutna «hołymi», navat bieź plity i chaładzilnika na kuchni, što ŭžo kazać pra łožak u spalni. Tak što varta heta ŭličvać, kali chočacie doŭhaterminova arandavać nieruchomaść u Dubai.
Majomaść u Biełarusi, darečy, para nie pradavała. Adzinaje pytańnie pakul — aŭtamabil, jaki ŭ AAE transpartavać — doraha i biez patreby. Chutčej za ŭsio, mašyna zastaniecca ŭ siamji, u baćkoŭ Ramana.
— Tut u cełym uzrovień žyćcia i apłaty pracy našmat vyšejšy, čym u Biełarusi. Pačatkovy zarobak zvyčajnaha ofisnaha supracoŭnika z bazavym viedańniem anhlijskaj — prykładna 5000 dyrcham (kala $1500). Adziny padatak, jaki płaciać hramadzianie AAE, — PDV (5%).
— Inšaja sprava, što jość šmat katehoryj, u jakich košt bazavych rečaŭ u razy vyšejšy, čym u Biełarusi. Pačniom ź vizy i strachoŭki.
Miascovaja hadavaja strachoŭka ŭvachodzić u abaviazkovy pakiet dla adkryćcia rezidenctva AAE. Kaštuje ŭ siarednim 3000 dyrcham na čałavieka ŭ hod (kala $820). Dadatkova nieabchodna prajści nievialikaje miedycynskaje abśledavańnie: fluarahrafija, analizy. Zbor za miedycynskaje abśledavańnie — 1238 dyrcham (kala $337) + PŁR 150 dyrcham (kala $40).
Taksama apłačvajecca zbor za źmienu statusu i praštampoŭku vizy 1610 dyrcham ($438) + administracyjny zbor za vizu rezidenta 499 dyrcham ($135). Razam adkryćcio vizy + abaviazkovaja strachoŭka na adnaho čałavieka — $1770.
Mabilnaja suviaź abydziecca ŭ $100 na čałavieka za miesiac (heta jašče z ulikam abmiežavanaha internet-trafiku). Taksi + haradski transpart — kala $250 z ulikam taho, što heta horad zusim nie dla piešachodaŭ, adlehłaści pamiž kropkami na karcie vielizarnyja, dy i klimat nie dazvalaje dniom znachodzicca na soncy bolš za 10 chvilin.
Pradukty — kala $750 na miesiac na siamju z 2 čałaviek.
Ahulnuju sumu na charčavańnie ŭ kaviarniach i restaranach padličyć składana, bo ŭsio indyvidualna.
Dla paraŭnańnia: košt 1 kubka kapučyna — ad $5, desiert da kavy — ad $8. Pasta/pica abo lubaja prostaja strava — ad $20 u bazavaj ustanovie kala doma. U hetaj katehoryi abmiežavańniaŭ niama, u lubym plus-minus viadomym restaranie ceny na viačeru dla adnaho čałavieka buduć roŭnyja siaredniaj zarabotnaj płacie pa Biełarusi (i heta suma čeka biez ałkaholu).
— U krainie dziejničajuć vielmi žorstkija abmiežavańni ŭ dačynieńni da śpirtnoha, praktyčna «suchi zakon», bo žychary AAE vyznajuć isłam, a ŭ isłamie zabaronienaje ŭžyvańnie luboha ałkaholu i navat straŭ, u jakich jon utrymlivajecca. Tamu mocnyja napoi tut možna kupić tolki ŭ śpiecyjalnych kramach (jakija jašče treba znajści) pa cenach, jakija prykładna ŭ 4-5 razoŭ vyšejšyja za biełaruskija na identyčnyja napoi.
Pa turystyčnaj vizie možna svabodna kuplać ałkahol, rezidentam ža treba jašče atrymlivać śpiecyjalnuju licenziju, jakaja kaštuje kala $100 na hod.
Hryl, namioty i vohnišča… u pustyni
Dubaj — horad uražańniaŭ. Tut vielizarny vybar varyjantaŭ, kab bavić volny čas: pačynajučy ad śpisu suśvietnych słavutaściaŭ (samy vysoki chmaračos, samy vialiki muziej sučasnaha mastactva, samyja vialikija fantany, jakija śpiavajuć, i h.d.) i zakančvajučy raznastajnymi krytymi katkami, harnałyžnymi centrami, safary.
— Miascovyja časta jeździać na načnyja pikniki ŭ pustyniu: hryl, pałatki, viačorki kala vohnišča — uvohule, prama jak našy pachody, tolki siarod piasčanych dziunaŭ. A, nu i, viadoma, handlovyja centry. Pačałosia leta, z-za śpiakoty ŭsie vidy volnaha času na adkrytym pavietry, pad piakučym soncam, stali na paŭzu da vosieni, zatoje kožny viečar pachod u handlovyja centry (jakija taksama tut «samyja-samyja») — abaviazkovaja tradycyja dla ŭsioj siamji.
Što da hastranamičnych zabaŭ, to da miascovaj kuchni para stavicca niejtralna. Bo ŭ AAE papularnyja tradycyjnyja arabskija stravy — rys, ryba i jałavičyna maksimalna prostaha pryhatavańnia.
— Zatoje raznastajnaść restaranaŭ z azijackaj kuchniaj dzivić: ad małajzijskaj da mjanmanskaj. Spačatku pierasprabavali šmat straŭ, ale stamilisia i tydni praz try pierajšli na bolš zvykłuju nam jeŭrapiejskuju kuchniu.
Z AAE biełarusy pakul nikudy nie vyjazdžali, chacia zvyčajna nie prapuskajuć mahčymaść adpravicca ŭ padarožža. Ź niadaŭniaha — pajezdka ŭ Vieniesuełu ŭ studzieni (adna z samych niebiaśpiečnych i pry hetym pryhožych krain Paŭdniovaj Amieryki).
«Padumajcie, a ci treba naohuł siudy pierajazdžać»: ź jakimi ciažkaściami mohuć sutyknucca ekspaty ŭ AAE
Pa słovach Ramana, adna z samych vialikich prablem dla ruskamoŭnych ekspataŭ u AAE — znajści sabie lehalnuju pracu. Bolšaść mihrantaŭ pryjazdžajuć u Emiraty pa turystyčnych vizach z nadziejaj za niekalki miesiacaŭ dzie-niebudź zamacavacca. Ale turystyčnaja viza nie daje prava pracavać. Sproba pracaŭładkavacca biez pracoŭnaj vizy źjaŭlajecca niezakonnaj i moža pryvieści da štrafu, departacyi ci turemnaha terminu.
Dla lehalnaha pracaŭładkavańnia ŭ AAE ekspat pavinien atrymać rezidenctva. Jak heta zrabić? Kampanija pavinna ŭziać mihranta ŭ štat, aformić jamu pracoŭnuju vizu, zrabić strachoŭku, zabiaśpiečyć 30-dzionny vodpusk i harantavać pracu da zakančeńnia kantrakta, inakš pracadaŭcu čakajuć vializnyja štrafy i vypłaty kampiensacyj supracoŭniku.
— Košt afarmleńnia pracoŭnaj vizy ŭ AAE — kala $2000. Tak što sami možacie zrazumieć, što kampanii biaruć da siabie na pracu tolki sapraŭdy kaštoŭnych supracoŭnikaŭ. Ale na bazavych pazicyjach typu hruzčyk/dastaŭščyk/pradaviec kankurencyja jašče vyšejšaja. A kankuravać prychodzicca ź indusami, pakistancami, filipincami, jakija svaju pracu aceńvajuć, skažam tak, nižej siaredniaha pa rynku. Voś i atrymlivajecca, što vielmi mnohija pryjazdžajuć na paru miesiacaŭ, nie znachodziać stałaj pracy i źjazdžajuć nazad na radzimu.
Tym, chto płanuje pierajechać u AAE, Raman raić nie stroić viasiołkavych iluzij.
— Padumajcie lišni raz, a ci treba vam naohuł pierajazdžać u AAE. Kali vy ŭpeŭnienyja ŭ svaim rašeńni, staranna spłanujcie, čym vy budziecie zajmacca ŭ Emiratach, jak zabiaśpiečvać siabie i ci chopić vam čakanaha zarobku na žyćcio.
Dubaj — horad mahčymaściaŭ, horad niejmaviernaj pryhažości. Horad, jaki zadaŭ płanku ŭsiamu śvietu, tamu, kab adpaviadać hetaj płancy, treba vielmi staracca, ščyra vieryć u svaju spravu i, viadoma ž, u siabie!
U Mahilovie mužčyna adbivaŭsia ad hubazikaŭcaŭ nažom6
Kamientary