Zastaniecca mienš manieŭraŭ dla padmanu pry prodažy. Što źmienić anansavanaja baza historyi patrymanych aŭto
U trecim kvartale 2022 hoda ŭ Biełarusi abiacajuć zapuścić bazu źviestak pa patrymanych aŭtamabilach. «Naša Niva» raźbirałasia, jak budzie papaŭniacca hetaja baza, čym jana moža być karysnaj dla šarahovych aŭtaamataraŭ i jakija novaŭviadzieńni buduć u joj.
Bazy danych, dzie možna atrymać źviestki pra historyju patrymanaha aŭto, isnujuć u mnohich krainach śvietu. Zvyčajna ŭ joj mieścicca infarmacyja pra prabieh aŭtamabila, kolkaść ułaśnikaŭ, darožnyja vypadki, znachodžańnie ŭ vyšuku, pracu ŭ taksi i h.d.
Na biahučy momant, vykarystoŭvajučy roznyja bazy danych, u Biełarusi možna biaspłatna daviedacca: ci znachodzicca aŭtamabil u vyšuku, datu mytnaha afarmleńnia, termin dziejańnia dazvołu na dopusk u darožnym ruchu (techahlad) i termin dziejańnia strachavoha polisu.
Tamu, u peŭnym sensie, baza na partale elektronnych pasłuh nie stanie niejkaja novaja krynicaj, a chutčej sistematyzuje ŭžo najaŭnyja danyja ŭ adnym miescy.
Tym nie mienš, miarkujučy z zajavy dyrektara Nacyjanalnaha centra elektronnych pasłuh, aproč užo dasiažnaj infarmacyi, u biełarusaŭ źjavicca mahčymaść spraŭdzić prabieh aŭtamabila. Što źjaŭlajecca vielmi važnym aśpiektam.
Vierahodna, što źviestki, datyčnyja prabiehu aŭtamabila, buduć traplać u bazu ad dziaržtechahladu, bo heta, badaj, adzinaje miesca, dzie va ŭłaśnika transpartnaha srodku pytajucca pra prabieh.
Inšym miescam, dzie ŭ aŭtaŭładalnikaŭ pytajuć pra prabieh aŭtamabila, źjaŭlajucca strachavyja kampanii. Ale na prabieh tam hladziać tolki ŭ vypadku, kali aŭtamabil traplaje na acenku škody paśla DTZ.
Strachoŭščyki źviartajuć uvahu na prabieh, bo ad hetaha pakazčyka zaležyć uzrovień znosu transpartu, što ŭ svaju čarhu ŭpłyvaje na sumu vypłat.
Takim čynam, źjaŭleńnie bazy, dzie budzie zafiksavany prabieh na momant prachodžańnia techahladu, moža pamienšyć kolkaść vypadkaŭ, kali daśviedčanyja ŭłaśniki aŭto karektujuć prabieh, pierad tym kab zavitać da strachavoha ekśpierta.
Tym nie mienš, pra najaŭnaść u bazie źviestak ab udziele aŭto ŭ DTZ havorka nie idzie. Mahčyma, takija funkcyi buduć dadadzieny paźniej, bo pry žadańni danyja pra DTZ taksama možna strukturavać u adzinuju bazu. U tych ža Štatach kožny fakt źviartańnia ŭ strachavuju zanosicca ŭ bazu, dzie možna daviedacca, kali adbyŭsia toj ci inšy vypadak, jakaja častka aŭto paciarpieła i h.d.
Dastatkova poŭnyja bazy danych, pryśviečanyja historyi aŭto, jość i ŭ kudy bližejšych da Biełarusi krainach. Tak, naprykład, u susiedniaj Polščy jeść dziaržaŭny servis «Historyja aŭtamabila».
Paśla ŭviadzieńnia patrebnych danych, karystalnik atrymlivaje šmat infarmacyi pra historyju aŭtamabila pačynajučy ad daty pieršaj rehistracyi aŭto ŭ krainie da momantu prachodžańnia techahladu. Źviestki pra prabieh aŭtamabila, zafiksavanyja padčas prachodžańnia techahladu, palaki pačali źbirać z 2014 hoda. A z 2020-ha da hetaha dadalisia danyja, jakija fiksujucca pry praviadzieńni darožnaha kantrolu.
Čytajcie taksama:
Źmianiajucca praviły prodažu patrymanych aŭtamabilaŭ
Biełaruś prysabiečyła častku terytoryi Ukrainy dla ŭłasnych patreb? 2
Kamientary