«Kali nie znojdziem dobraha varyjanta arendy — mahčyma, baćki kupiać kvateru». Jak inšaharodnija studenty šukajuć žyllo
Siaredzina žniŭnia — samy haračy pieryjad dla pošuku žylla inšaharodnimi studentami. «Naša Niva» pacikaviłasia, jak sioleta moładź vyrašaje pytańnie z žyllom u novym horadzie.
«Zdarajucca vypadki lohkaha padmanu»
Studentam, jakim nie chapaje miesca ŭ internacie (abo nie chočacca tam spyniacca), davodzicca šukać kvateru, pakoj ci navat łožak-miescy. U Minsku ceny na arendu pakoja čaściej za ŭsio startujuć z adznaki ŭ 100 dalaraŭ. Za takija hrošy student moža raźličvać na pakoj u kvatery z haspadarami. Da vyšejahučanaj sumy treba dadavać vydatki na kamunalnyja pasłuhi i internet.
Pry hetym, pa nazirańniach studentaŭ, znajści žylle ŭ Minsku ŭ miežach 100$ — zadača nie z prostych. Niekatoryja adrazu źviartajuć uvahu na toje, što vielizarnaja kolkaść abjaŭ raźmieščana nie ŭłaśnikami kvater, a ryełtarami, jakija patrabujuć hrošy tolki za telefon haspadara.
«Taksama zdarajucca vypadki lohkaha padmanu. Naprykład, pišuć, što heta nibyta cana za pakoj, a potym drobnymi litarami dadajuć, što heta košt łožak-miesca. Ci vyśviatlajecca, što ŭ susiednim pakoi žyvie čałaviek stałaha ŭzrostu paśla insultu, što mianie asabista pužaje», — pryznajecca adzin sa studentaŭ.
Małady čałaviek kaža, što, mahčyma, spynicca ŭ svajakoŭ, taksama nie vyklučaje, što kali vyrašyć pytańnie z žytłom nie atrymajecca, to baćki mohuć razhladać varyjant kupli kvatery.
Bolš-mienš prystojnyja pakoi ŭ stalicy zdajuć pa cenach bližej da 150 dalaraŭ.
Dziaŭčatam praściej?
Chłopcy-studenty źviartajuć uvahu na toje, što mnohija arendadaŭcy paznačajuć, što hatovyja zadavać pakoj tolki dziaŭčatam, tamu chłopcu znajści hodnaje žylle pa adekvatnym košcie składaniej.
Śpiecyjalisty z rynku nieruchomaści tłumačać takoha rodu dyskryminacyju vielmi prosta: «Časta pakoi zdajuć babuli stałaha ŭzrostu ci ŭdovy, naturalna, što im budzie zručniej žyć ź niejkaj dziaŭčynaj, čym z chłopcam. Tyja ž, chto zdaje cełuju kvateru pad studentaŭ, zvyčajna nie staviać jakich-niebudź hiendarnych abmiežavańniaŭ».
Pa słovach ryełtaraŭ, praz napłyŭ studentaŭ žnivień stanovicca napružanym miesiacam nie tolki ŭ pytańniach arendy pakojaŭ, ale i kvater u cełym.
«Zaŭždy jość peŭnaja častka studentaŭ, jakija mohuć sabie dazvolić zdymać asobnuju kvateru. Čaściej za ŭsio jany kaapierujucca pa 2-3 čałavieki, kab było tańniej. Takija varyjanty papularnyja, pakolki zdymać na dvaich kvateru časam vychodzić nie našmat daražej, čym arandavać pakoi paasobku, tamu tradycyjna rynak arendy ŭ žniŭni ažyvaje. Hety hod nie staŭ vyklučeńniem».
Razam z tym ryełtary adznačajuć, što raniejšaha bumu studentaŭ na rynku nieruchomaści nie nazirajecca. Jany bačać hetamu niekalki pryčyn. Pa-pieršaje, paadkryvalisia novyja karpusy internataŭ. Pa-druhoje, stała mienš zamiežnych studentaŭ. I pa-treciaje, biełaruskaja moładź stała bolš vyjazdžać na vučobu za miažu.
Zamiest arendy — svaja kvatera
Pa słovach adnaho z ekśpiertaŭ rynku nieruchomaści, jość i takija baćki, chto zamiest taho, kab vydatkoŭvać hrošy na arendu pakoja ci kvatery, paśla zaličeńnia dzicia ŭ VNU adrazu nabyvajuć kvateru ŭ stalicy.
«Nielha kazać, što hetaja źjava nosić masavy charaktar, ale štohod my nazirajem za tym, jak u druhoj pałovie leta padrastaje popyt na tannyja kvatery ŭ Minsku. Dakładnaj infarmacyi, kolki z pradadzienych kvater byli nabytyja dla studentaŭ, niama. Naturalna, što niekatoryja nabyvajuć kvateru raniej, ale asnoŭnaja častka robić heta ŭ druhoj pałovie leta.
U rehijonach chapaje ludziej, jakija zmahli naźbirać hrošy na kvateru dla svaich dziaciej, naturalna, što takija ludzi čaściej za ŭsio kuplajuć jaje ŭ stalicy, bo jany razumiejuć, što i paśla navučańnia ŭ VNU ich dzicia chutčej za ŭsio zastaniecca žyć u Minsku. I navat kali ŭ vyniku jano zachoča źjechać z krainy, to ŭsio adno inviestycyi ŭ staličnuju nieruchomaść vyhladajuć bolš pryvabnymi, tamu peŭny rost popytu na nieruchomaść u žniŭni sapraŭdy źviazany z tym, što ŭ hety pieryjad najbolš aktyŭna kuplajuć žylle pad studentaŭ», — adznačaje ekśpiert.
Staŭki padraśli
Druhoje miesca ŭ Biełarusi pa kolkaści VNU zajmaje Hrodna. U hetym abłasnym centry ŭ žniŭni taksama nazirajecca rost popytu na pakoi i niedarahija kvatery bližej da centra.
Łožak-miesca dla studentaŭ u Hrodnie zdajuć pa cenach ad 55-65 dalaraŭ, plus kamunalnyja vydatki. Pa słovach arendadaŭcy, u paraŭnańni ź minułym hodam staŭki vyraśli ŭ siarednim na 10-15 dalaraŭ.
«Pakoi krychu daražejšyja, cana moža lohka dachodzić i da 100 dalaraŭ. Ale tut treba razumieć, što kali niechta zdaje tolki adzin pakoj, to studentu davodzicca žyć razam z haspadarami, praz heta niekatoryja vybirajuć varyjant arendy łožak-miescaŭ u 2-3-pakajoŭcy, dzie razam ź imi budzie žyć jašče 5-6 studentaŭ, a nie siamja haspadaroŭ ci niejkaja babula, jakija buduć kłaścisia spać a 21-j hadzinie», — kaža surazmoŭca.
Aproč pakojaŭ, studentaŭ taksama cikaviać 1-2-pakajovyja kvatery. Hrodzienskija ryełtary taksama adznačajuć peŭnaje ažyŭleńnie na rynku arendy pierad pačatkam navučalnaha siezonu.
«U pieršuju čarhu studentaŭ cikavić žyllo bližej da centra, dzie skancentravanyja bolšaść z VNU. Samy aktyŭny čas pošuku — druhaja pałova žniŭnia, mnohija baćki čamuści adkładajuć pošuk žytła na apošni momant, što ŭskładniaje zadaču. Jašče ŭ kancy lipienia amal nichto nie šukaje žyllo pad studentaŭ, tamu vybar u siaredzinie leta značna lepšy, čym u žniŭni. Pieršymi zajmajuć niedarahija kvatery ŭ centralnaj častcy horada, a tyja, chto adkładaje pošuk na apošni momant, vymušany zasialać dziaciej u addalenych rajonach. Uvohule ŭ apošni tydzień leta baćki ŭžo hatovyja płacić lubyja hrošy ci zdymać zamiest pakoja cełuju kvateru, tamu lepiej zahadzia zadumvacca pra pošuk žytła», — raić śpiecyjalist.
Što tyčycca kupli kvater u Hrodnie, to miascovyja ryełtary taksama adznačajuć, što ŭ letni pieryjad nazirajecca peŭnaje pavyšeńnie popytu na tannaje žytło.
«Baćki, jakija nie mohuć sabie dazvolić nabyć dziciaci kvateru ŭ stalicy, niaredka vybirajuć varyjant kupli kvatery ŭ abłasnym centry. Jak praviła, u jakaści pieršaj kvatery biaruć adnapakajoŭki», — kažuć śpiecyjalisty.
Čytajcie taksama:
«U vykładčykaŭ mienš pafasu, čym u staličnych, jakija sami niekali pryjazdžali ź pieryfieryi». Čamu minčuki pastupajuć va ŭniviersitety ŭ rehijonach
«Zvankoŭ ad studentaŭ praktyčna niama». Ryełtary raspaviali, jak ciapier iduć spravy na rynku arendy kvater
Pieršaja vice-mer Minska Nadzieja Łazarevič prajšła praz zatrymańnie, muž zastaŭsia ŭ SIZA11
Kamientary