«U vykładčykaŭ mienš pafasu, čym u staličnych, jakija sami niekali pryjazdžali ź pieryfieryi». Čamu minčuki pastupajuć va ŭniviersitety ŭ rehijonach
Zvyčajna abituryjenty z usich haradoŭ imknucca pastupić u Minsk. Ale byvajuć i advarotnyja situacyi — minčuki jeduć u rehijony. Kamuści nie chapiła bałaŭ, kab pajści na «vyšku» ŭ stalicy, inšyja chočuć pažyć dalej ad baćkoŭ. Viciebsk niekatoryja vybirajuć praz mocnuju kafiedru dyzajnu ŭ technahałahičnym univiersitecie i vietyrynarnuju akademiju. Prajekt «1906» parazmaŭlaŭ sa studentami, jakija nie zachacieli atrymać adukacyju ŭ staličnych VNU i pajechali ŭ Harodniu, i daviedaŭsia, čamu jany zrabili taki vybar i jak na jaho adreahavali baćki maładych ludziej. My pieradrukoŭvajem hety tekst.
«Chvalujusia, ale heta moj darosły krok, za jaki ja paniasu adkaznaść»
Alaksandr (imia źmieniena) pastupiŭ u Hrodzienski miedycynski ŭniviersitet. Chłopiec choča stać piedyjatram, jon daŭno vyrašyŭ, što pajedzie vučycca mienavita ŭ Harodniu: Alaksandr čuŭ šmat dobrych vodhukaŭ pra jakaść adukacyi tam.
«Moj tata doktar, jon skazaŭ, što tam budzie lepš, čym u Minsku, — tłumačyć vybar jon. — Taksama maralna praściej vučycca. Tut ja maju na ŭvazie adnosiny z vykładčykami. U ich mienš pafasu i zornaści, čym u minskich, jakija niekali sami pryjazdžali ź pieryfieryi, a ciapier u ich užo sfarmavalisia praduziatyja adnosiny da studentaŭ.
Jašče ŭ miedycynskim u Harodni mienšyja hruppy, u vykładčykaŭ jość mahčymaść źviartać na ciabie ŭvahu. Sam horad mienšy, nie treba budzie tracić kožny dzień pa dźvie hadziny, kab pajechać na zaniatki i viarnucca.
U Harodni ad samaha dalokaha internatu da ŭniviersitetu 20 chvilin na transparcie, ad astatnich — 10 chvilin pieššu. Tamu heta ŭsio razam budzie farmavać bolš pryjemnuju maralnuju abstanoŭku».
Alaksandr nabraŭ u sumie pa ŭsich CT (plus atestat) 342 bały. Jon prajšoŭ na biudžet.
«Spačatku chacieŭ iści ŭ artapiedyju. Ale tady nie vyrašyŭ, što kankretna ja ŭ joj chaču lačyć. Kali heta dyfiekty typu skalijozu, płoskastupniovaści, to lepš pačynać hetym zajmacca jašče ź dziećmi. Chvaroby typu artrytu — u darosłych. U vyniku pajšoŭ na piedyjatryju z toj dumkaj, što ja zmahu paśla hetaj adukacii padvučycca i, kali zachaču, jašče lačyć u budučyni darosłych, a naadvarot nie atrymajecca», — raskazvaje jon.
Abrać prafiesiju Alaksandru było niaprosta. Da hetaha času jon sumniavajecca nakont pravilnaści svajho vybaru.
Jechać u inšy horad chłopiec nie baicca.
«Vidavočna, što zručniej žyć u svajoj kvatery. Ale ž pierajeiezd u Harodniu metanakiravany učynak. Kaniečnie, chvalujusia, ale heta moj darosły vybar, za jaki ja paniasu adkaznaść. Kali pamylusia, to zrablu vysnovy, viarnusia ŭ Minsk.
Darečy, taksama vykładčyk, jakoha zvolnili z BDMU, kazaŭ, što zaraz tam zusim začyścili piedahahičny sastaŭ. U Harodni ŭ hetym sensie pakul što nie tak krytyčna, nie ŭsio tak prapitana łukašyzmam.
ź Minska jašče nie pierajechaŭ, jeździŭ padavać dakumienty ŭ internat. Pieršakurśnikaŭ sielać u internaty kalidornaha typu, dzie duš budzie adzin na ŭsich, na adnym paviersie. U pakojach ja nie byŭ, bačyŭ fotazdymki. Jany samyja zvyčajnyja — dva łožki, stoł», — kaža jon.
Jechać vučycca za miažu Alaksandr nie chacieŭ. Jon ličyć, što jamu było b ciažka atrymlivać viedy na inšaj movie.
«U 9 kłasie mnie skazali, što kali chaču pastupać u Polšču, to treba zaraz pačynać vučyć movu, ale ja čamuści nie zachacieŭ. I da hetaha času nie chočacca. Nie ciahnie mianie źjechać.
Jašče, mabyć, za miažoj ciažka prajści ŭ miedycynski ŭniviersitet. I ad siabroŭ nie chaciełasia daloka źjazdžać», — dzielicca jon.
Ci zadavalniaje chłopca zarobak, jaki jon budzie atrymlivać, kali stanie piedyjatram?
«Spadziajusia, što pačnucca niejkija palapšeńni ŭ nas. Kali zarobak u miedykaŭ zastaniecca takim ža, to heta budzie vielmi sumna.
Adšturchoŭvajusia ad toj dumki, što praz šeść hod, jakija ja budu vučycca, usio moža pieramianicca ŭ toj ci inšy bok. Kali stanie horš, budu hladzieć pa situacyi, moža, budu šukać pracu za miažoj.
Hałoŭnaje — atrymać jakasnyja viedy, nie fiłonić, bo doktar, jaki moža padyści da svajoj pracy adkazna i dapamahčy čałavieku, zaŭsiody znojdzie sabie miesca. Navat kali ŭ dziaržaŭnaj miedycynie nie składziecca, to ŭ pryvatnaj dakładna atrymajecca», — spadziajecca jon.
Sam horad Alaksandr užo pahladzieŭ. U jaho skłałasia pryjemnaje ŭražeńnie.
«Spadabałasia, što Harodnia maleńkaja, chacia Minsk nie nazavieš miehapolisam. Budynki ŭ Harodni značna nižejšyja, čym u stalicy.
Taksama ŭ Harodniu pastupiła maja dziaŭčyna. U jaje pryčyna takaja ž, jak i ŭ mianie. Ale my jašče i razam chacieli zastacca, bo być u roznych haradach niazručna», — padsumoŭvaje jon.
«Kali mnie spadabajecca ŭ Harodni, to z zadavalnieńniem zastanusia tut pracavać»
Uładzisłaŭ (imia źmieniena) taksama pastupiŭ vučycca ŭ miedycynski ŭniviersitet u Harodni. Chłopiec z 357 bałami prajšoŭ na biudžet.
«Śpiecyjalnaść — «lačebnaja sprava», jakim doktaram dakładna budu, pakul nie viedaju. U cełym abraŭ miedycynu, tamu što chočacca dapamahać ludziam.
Abraŭ univiersitet u Harodni, tamu što chaciełasia źmianić svajo žyćcio, zrabić niejki vializny krok. Ciapier źjedu ad baćkoŭ, budu samastojnym. U Harodni dobryja vodhuki nakont vykładčykaŭ, jakija tam pracujuć. Šmat ludziej, jakim tam padabajecca vučycca. Dumaju, što ja nie pramachnuŭsia», — kaža jon.
Baćki Uładzisłava spačatku byli suprać jaho pastupleńnia ŭ inšy horad. Asabliva nie chacieła jaho adpuskać maci.
«U Harodni šmat našych svajakoŭ, tamu paśla jany pahadzilisia. Spačatku było ciažka, nie razumieli, navošta kudyści jechać.
Maci pieražyvała, jak ja tam budu bieź jaje. U cełym ja šmat razoŭ byŭ u Harodni, ale nie bačyŭ jašče, u jakim internacie budu žyć.
Horad spakojny, maleńki, ja takoje vielmi lublu. U Minsku šmat mituśni.
Nakont vučoby za miažoj dumaŭ, ale pakul nie vyrašyŭsia na heta. U cełym tam našmat bolš mahčymaściej. Moža być, paśla ŭniviersitetu atrymajecca pajechać pracavać kudyści. Nie mahu skazać, što mianie zasmučaje zarobak, jaki ja budu atrymlivać tut. Budu hladzieć pa situacyi. Paśla zakančeńnia vučoby mianie mohuć na raźmierkavańnie adpravić u Minsk. Ale kali mnie spadabajecca ŭ Harodni, to z zadavalnieńniem zastanusia tut pracavać», — kaža chłopiec.
Čytajcie taksama:
Łatvija płanuje praviarać usich, chto ŭjazdžaje ź Biełarusi
Kolki kaštuje navučańnie ŭ jeŭrapiejskich univiersitetach?
Tak budzie vyhladać škoła ŭ mikrarajonie «Minsk-Śviet». Tam budzie 12 pieršych kłasaŭ
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść32
Kamientary