Ukraincy nabyli praryŭny spadarožnik na hrošy z Bajraktaraŭ. Raskazvajem, jakija pieravahi jon im daje i jak pracuje

Zhodna z kantraktam, USU atrymajuć dostup da vykarystańnia adnaho sa spadarožnikaŭ kampanii ICEYE dla rehijona. Taksama ICEYE daje dostup da infrastruktury spadarožnikaŭ kampanii i archivu zdymkaŭ. Pry hetym ad ukrainskaj armii nie patrabujecca techničnych navykaŭ, bo ŭsiu pracu pa zdymcy i rasšyfroŭcy zdymkaŭ biare na siabie kampanija. Ale ŭ čym pieravaha hetych spadarožnikaŭ i što za kampanija ICEYE?

ICEYE

Kampanija ICEYE rodam ź Finlandyi i zasnavanaja ŭ 2014 hodzie. U 2015 hodzie jany dakazali, što ichni mietad zdymak u mikrachvalovym dyjapazonie dapamoža sačyć za niebiaśpiečnymi ildami, a ŭ 2018 hodzie zapuścili pieršy spadarožnik.

Na siońniašni dzień kampanija ICEYE kiruje 21-m kaśmičnym aparatam i najbujniejšym u śviecie fłotam kamiercyjnych spadarožnikaŭ, jakija zdymajuć ziamlu ŭ mikrachvalovym dyjapazonie.

U čym ich pieravaha?

U luby momant času vialikaja častka Ziamli pakryta abłokami abo tam noč. Da prykładu, prykrytyja abłokami vyjavy prosta sapsavanyja.

Skanavańnie ŭ mikrachvalovym dyjapazonie dazvalaje atrymlivać vyjavy, nie zvažajučy na hetyja akaličnaści, a taksama pakazać niekatoryja rečy praź pieraškody, bačnyja ŭ aptyčnym dyjapazonie. Pry hetym spadarožniki ICEYE mohuć atrymać vyjavy z razroźnieńniem da 25 santymietraŭ na piksiel i maksimalnym pamieram u 100 na 100 kiłamietraŭ (tady dakładnaść budzie mienšaj).

Pavialičyć

Usio heta dazvolić USU atrymlivać bolš infarmacyi pra źmianieńni na miascovaści, razhledzieć nie tolki lubuju techniku, ale časta i kolkaść asabovaha składu voraha, što sapraŭdy vielmi ŭzmocnić ukrainskuju raźviedku. Akramia taho, takija spadarožniki zdolnyja adšukać schavanyja reziervy voraha i dapamohuć u naviadzieńni ŭkrainskaj artyleryi i avijacyi.

Jak pracuje taki mietad zdymak ziamnoj pavierchni i jakija jašče ŭ jaho pieravahi?

Nasamreč, mietad, jaki nazyvajecca SAR (radyjołakacyjnaje skanavańnie apiertury) ničoha nie «fatahrafuje» u pryvyčnym sensie — to bok, nie atrymlivaje nijakaj infarmacyi, bačnaj vokam. Faktyčna, antena skanuje pavierchniu i vyjava atrymlivajecca za košt taho, što radar z antenaj ruchajecca i paśladoŭna zapisvaje infarmacyju pra abjekt. Hruba kažučy, heta nie aptyčnaja vyjava, a sieryja adlustravanych ad niejkaha abjekta echa-sihnałaŭ.

Pavialičyć

Akramia ŭsiaho inšaha, mietad maje jašče šerah pieravah:

Vysokaje razroźnieńnie zdymkaŭ niezaležna ad adlehłaści. Razroźnieńnie nie zaležyć ad taho, nakolki daloka datčyk znachodzicca ad ziamli.

Pieramiennaje razroźnieńnie i achop u prastory. Mahutnaść vypramieńvańnia SAR kantralujecca elektronikaj, i joj možna manipulavać dla źmieny razroźnieńnia i achopu. Spadarožniki dazvalajuć jak atrymać detalovuju vyjavu nievialikaj płoščy (u niekalki kvadratnych kiłamietraŭ z razroźnieńniem da 25 santymietraŭ na piksiel), hetak i ahladnuju vyjavu vialikaha ŭčastka ziamli ź nievialikim razroźnieńniem (da kvadrataŭ 100 na 100 kiłamietraŭ z razroźnieńniem u mietry na piksiel).

Dakładnaja hieałakacyja. Spadarožnik dazvalaje atrymlivać hieadanyja kožnaj kropki vyjavy z vysokaj dakładnaściu, da mietraŭ i dolaŭ mietraŭ.

Stvareńnie vyjavaŭ dla roznych metaŭ. Toje, što zdymańnie źjaŭlajecca całkam kantralavanym, dazvalaje farmavać vyjavy roznych typaŭ. Da prykładu, sintezavać vyjavy, jakija padkreślivajuć niejkija niezvyčajnyja rečy i ruch na zdymku, pakazvajuć dakładnyja madeli reljefu, a taksama vyjavy, jakija nahladna adlustroŭvajuć źmieny na pavierchni ziamli.

Čamu taki mietad nie moža całkam zamianić zvyčajnyja zdymki?

Niehledziačy na šerah pieravahaŭ, mietad maje i niedachopy. Da prykładu, nie dazvalaje atrymać infarmacyju pra koler na pavierchni ziamli i niekatoryja asablivaści pavierchni.

Pavialičyć

Taksama taki mietad padychodzić tolki dla znachodžańnia celaŭ, jakija nie ruchajucca, abo ruchajucca marudna — inačaj sihnał budzie zanadta mocna raśsiejvacca i budzie nieinfarmatyŭnym. Praz asablivaści mietadu taksama častka infarmacyi hublajecca.

Pytańni jość i pa chutkaści, bo spadarožnik abo niekalki spadarožnikaŭ musiać paśladoŭna źniać i apracavać atrymanyja vyjavy.

Karaciej kažučy, mietad nie zamianiaje, a dapaŭniaje zvyčajnyja mietady, jakimi karystalisia USU, ale daje im vialikuju pieravahu. I hrošy na heta sabrali sami ŭkraincy.

• 132
• 0
• 2
• 4
• 1
• 1
• 8
• 0