Pravajdaraŭ abaviazali abmiažoŭvać dostup da «zabaronienych» internet-resursaŭ za niekalki hadzin
Apieratyŭna-analityčny centr (AAC) pry Łukašenku vydaŭ pastanovu, jakoj uparadkoŭvajecca pracedura błakavańnia niepažadanych sajtaŭ. Kali raniej pastaŭščyki internet-pasłuh praviarali śpis abmiežavanaha dostupu raz na sutki, to ciapier musiać rabić heta kožnyja try hadziny na praciahu dnia, piša Słužba manitorynhu Biełaruskaj asacyjacyi žurnalistaŭ.
Dakumient apublikavany 23 vieraśnia na Nacyjanalnym pravavym internet-partale, pryčym pad im źmiaščajucca podpisy kiraŭnikoŭ adrazu troch viedamstvaŭ — načalnika AAC Andreja Paŭlučenki, ministra suviazi i infarmatyzacyi Kanstancina Šulhana, ministra infarmacyi Uładzimira Piarcova.
Udakładniajecca, što pastanova ŭstupaje ŭ siłu nie adrazu, a praź miesiac paśla aficyjnaha apublikavańnia — to-bok ad apošniaj dekady kastryčnika.
Dakumientam, u pryvatnaści, vyznačana, što ciapier da śpisu abmiežavanaha dostupu — tudy ŭnosiacca ŭsie internet-resursy, jakija trapili pad abmiežavańni — majuć dostup nie tolki Ministerstva suviazi, Ministerstva infarmacyi, KDB, MUS, KDK dy inšyja siłaviki, ale i ŭładalniki navinavych ahrehataraŭ.
Zhodna z pastanovaj, istotna skaračajecca čas reahavańnia na pryznanych kampietientnymi orhanami roznaha kštałtu «ekstremistaŭ».
Tak, pastaŭščyki internet-pasłuh — pravajdary i mabilnyja apieratary — abaviazanyja na praciahu čatyroch hadzin ad momantu ŭklučeńnia ŭ śpis «zabaronienych» abmiežavać dostup da kankretnaha internet-resursu.
Inšymi słovami, kali raniej jany pavinny byli praviarać bazu tolki raz na sutki, to ciapier ich abaviazali rabić heta kožnyja try hadziny ŭ pieryjad z 9.30 ranicy da 21.30 viečara.
Ad pačatku tatalnaj začystki hramadzianskaj supolnaści pa śladach mirnych akcyj 2020 hoda ŭ «ekstremisckija śpisy» trapili dziasiatki najmieńniaŭ infarmacyjnaj pradukcyi.
Tak, «ekstremisckimi farmavańniami» ŭ Biełarusi pryznanyja zvyš 80-ci ŚMI, tielehram-kanałaŭ, abjadnańniaŭ i fondaŭ.
Śpis u adkrytym dostupie vykładzieny na sajcie MUS. Prysvajeńnie takoha statusa advolnaje i nie maje niejkaj sistemnaści — kab jaho atrymać, dastatkova prosta nie ŭpisvacca ŭ ideałohiju režymu i być aktyŭnym u svajoj halinie.
Što da kolkaści nośbitaŭ «ekstremisckich materyjałaŭ», dyk jana jašče bolšaja — užo daloka pierasiahnuła sotniu, pra što śviedčyć abnoŭlenaja «baza» na sajcie Ministerstva infarmacyi. A kali zazirnuć dalej za posttraŭmatyčny 2020-ty, dyk ahułam «čorny śpis» pieravyšaje 1000 pazicyj.
«Telefanujcie dzieciam, prasicie viarnucca ŭ Biełaruś». Biełarusy na miažy sutyknulisia z novaj pravierkaj26
Kamientary