Navoša: Kali ŭ nas zabiaruć majomaść, značyć, i łukašenkaŭcy buduć ułasnaj majomaściu paśla vypłačvać kampiensacyi palitviaźniam
Zasnavalnik Sports.ru prakamientavaŭ «Našaj Nivie» rašeńnie Śledčaha kamiteta ab zaviadzieńni pieršaj zavočnaj spravy suprać piaci praciŭnikaŭ Łukašenki, jakija znachodziacca za miažoj.
«Jak «ekstremist», zasnavalnik zabaronienaha spartovaha sajta i hetak dalej, ja nie ździŭleny. Usie tam budziem, — napisaŭ Dźmitryj Navoša «Našaj Nivie» ŭ adkaz na prośbu prakamientavać rašeńnie Śledčaha kamiteta ab zaviadzieńni pieršaj zavočnaj spravy suprać piaci palityčnych praciŭnikaŭ Alaksandra Łukašenka. — Urešcie, u kožnaha, chto jasna vykazvajecca suprać kradziažu vybaraŭ i nie hladzić abyjakava na łukašyscki teror, buduć adbirać, što zmohuć — nieruchomaść (na maju kvateru ŭžo nakładzieny aryšt), hramadzianstva.
Da apošniaha dnia łukašyzmu jany buduć z naŭmysnym čmiakańniem žerci ludziej — kab trymać astatnich u strachu i pakory.
Dumaju, zališnie kazać, što ja nie liču siabie vinavatym choć pa jakich-niebudź z vystaŭlenych abvinavačańniaŭ. Bolš za toje, ja nie schilny ličyć siabie achviaraj (u paraŭnańni ź ludźmi ŭ turmach asabliva): ja žyvu poŭnym žyćciom i pracuju ŭ volnym śviecie, dzie prysudy łukašysckich sudoŭ nikoha nie cikaviać», — napisaŭ «Našaj Nivie» Navoša.
Ën ličyć, što łukašysty «nie kantralujuć bolš ničoha, akramia hvałtu ŭnutry kancłahiera, jaki časova isnuje na miescy Biełarusi».
«Kali pazbaviać hramadzianstva? — praciahvaje Dźmitryj. — Tak, nijakaha inšaha hramadzianstva ŭ mianie niama. Ale ŭžo jak-niebudź cyvilizavanyja krainy dapamohuć tym, kaho praśledujuć pa palityčnych matyvach. Tak, kvateru škada — ale jana vierniecca razam ź viartańniem u Biełaruś svabody. Bolš taho, hetym svaim nieprykrytym rabavańniem łukašysty adčyniajuć skryniu Pandory.
Zdajecca, ciapier stanovicca zrazumieła, za čyj košt dziaržava budzie paśla vypłačvać kampiensacyi palitviaźniam (ja nie pra siabie, a pra tych, chto siadzić ciapier u turmach). Heta budzie nieruchomaść ludziej, na jakich pakul trymajecca represiŭnaja mašyna», — prahnazuje Navoša.
«Uvohule, staŭlusia da čarhovaj kryminałki i budučaha «suda» jak da jašče adnoj porcyi praklonaŭ ad Mukavozčyka abo novaha kryku Azaronka ŭ moj adras: bieły šum. Heta nie asabliva ŭpłyvaje na majo žyćcio, a voś na ich — jašče paŭpłyvaje», — napisaŭ Dźmitryj.
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary2
Kamientary