«Pasiejdon» — heta najnoŭšyja tarpiedy mahutnaściu ŭ niekalki miehaton, zdolnyja vyklikać 500-mietrovyja radyjeaktyŭnyja cunami, jakija zrobiać učastki ŭźbiarežža nieprydatnymi dla žyćcia na dziesiacihodździ. Vydańnie piša, što tarpiedy «Pasiejdon» mohuć źniščyć takija harady jak Ńju-Jork abo Łos-Andželes.
Na borcie «Biełharada» — da vaśmi takich rakiet. Ličycca, što ad ich nie isnuje efiektyŭnaj abarony. Tamu ich nazyvajuć «zbrojaj Sudnaha dnia».
La Repubblica piša, što stvoranyja ZŠA sistemy ź infračyrvonymi datčykami dla adsočvańnia rakietnych puskaŭ u vypadku z «Pasiejdonam» apynucca bieskarysnymi, pakolki «supiertarpieda» sprajektavanaja tak, kab vypramieńvać vielmi mała ciapła. Jana biasšumna ruchajecca z chutkaściu bolš za 100 km/h, adznačaje La Repubblica.
Pra jadziernyja tarpiedy «Pasiejdon» stała viadoma paśla taho, jak u 2015 hodzie na rasijskim telebačańni była «vypadkova» pakazanaja staronka prezientacyi prajekta, jaki tady jašče nasiŭ nazvu «Status-6».
Adnak, jak vyśvietlili śpiecsłužby ZŠA, «uciečka» była naŭmysnaj. Na dumku amierykanskich čynoŭnikaŭ, pakaz jadziernaj tarpiedy byŭ častkaj płana, nakiravanaha na toje, kab adhavaryć ZŠA ad razhortvańnia supraćrakietnaj abarony ŭ Jeŭropie.
TASS pisaŭ, što «Pasiejdon» moža nieści jadziernuju bajavuju častku mahutnaściu da 2 miehaton. Heta ŭ 100 razoŭ bolš, čym u bomby, skinutaj na Chirasimu, i ŭ 10 razoŭ bolš, čym u apošniaj viersii jadziernaj bomby B61, raspracavanaj u ZŠA.
«Pasiejdon» lubiać vykarystoŭvać rasijskija prapahandysty dla pahroz Zachadu. Tak, 1 maja 2022 hoda Dźmitryj Kisialoŭ pryhraziŭ źniščeńniem Brytanii.
