Kampanija startavała 1 kastryčnika 2008 hoda pa inicyjatyvie 11 hramadskich abjadnańniaŭ.
Jaje hałoŭnaj metaj zajaŭlałasia prapahanda biełaruskaj movy, historyi i kultury ŭ šyrokich słajach hramadstva. «Jana była nakiravana nie na tych, chto ŭžo adčuvaje siabie biełarusam, a na tych, chto pakul jašče nie asacyiruje siabie ź imi.
I my možam skazać, što dasiahnuli ŭ hetaj halinie niekatorych značnych pośpiechaŭ», — adznačyła adna ź inicyjataraŭ kampanii Alena Makoŭskaja.
Jak paviedamiŭ BiełaPAN kaardynatar kampanii pa suviaziach z hramadskaściu Ihar Lalkoŭ, za hod pa ŭsioj Biełarusi prajšło bolš za 900 mierapryjemstvaŭ: vystavy, kancerty, ekskursii, litaraturnyja sustrečy, histaryčnyja lekcyi, kursy biełaruskaj movy, prezientacyi knih i časopisaŭ.
«Pa našych padlikach, hledačami i ŭdzielnikam našych mierapryjemstvaŭ stali kala 75 tys. čałaviek amal u 150 nasielenych punktach Biełarusi.
Kali pačynali kampaniju 11 arhanizacyj, to siońnia jaje padtrymlivaje 31 arhanizacyja», — skazaŭ Lalkoŭ.
Akramia taho, pavodle jaho słoŭ, da arhanizacyi i praviadzieńnia mierapryjemstvaŭ na praciahu hoda dałučylisia jašče 92 «kulturnyja adzinki» — arhanizacyi i ŭstanovy, ŚMI i interniet‑resursy, tvorčyja asoby i kalektyvy.
Sam Lalkoŭ ličyć, što kampanija prachodzić navat bolš paśpiachova, čym płanavali jaje arhanizatary.
«My ŭbačyli vialikuju zapatrabavanaść biełaruskaj kultury ŭ hramadstvie, pryčym takuju zapatrabavanaść, jakuju nie mahli raniej zadavolić tradycyjnymi sposabami ni hramadskija abjadnańni, ni aficyjnyja struktury. Ciapier kožny dzień da nas źviartajucca z novymi inicyjatyvami, i my navat nie paśpiavajem na ich reahavać — štości davodzicca adkładvać na bolš poźni čas», — adznačyŭ Lalkoŭ. Na jaho dumku, heta śviedčyć ab tym, što ludzi imknucca ŭbačyć novy biełaruski kulturny pradukt.
Jak skazaŭ kaardynatar, ciapier kampanija budzie raźvivacca jašče bolš pazityŭna i dynamična, šukać novyja aryhinalnyja formy daniasieńnia biełaruskaj kultury ŭ masy. «Kancerty, prezientacyi — heta ŭžo niekalki nadakučyła. Treba dumać nad novymi formami. Naprykład, my płanavali litaraturna‑mastacki aŭtaprabieh pa haradach Biełarusi. Paśpiachova prajšoŭ vypusk dyska «Tuzin Hitoŭ. Pierazahruzka», na jakim vykanaŭcy pierakładali svaje pieśni na biełaruskuju movu. Płanaŭ šmat. Ale hałoŭnaje, nam nie davodzicca naviazvać hledačam i słuchačam biełaruskuju kulturu», — zajaviŭ Lalkoŭ.
Aryštavali pradstaŭnikoŭ kampanii Bayer u Biełarusi15
Kamientary