Kreml pačaŭ padrychtoŭku da prezidenckich vybaraŭ 2024 hoda, jana budzie prahnazavana «pad Pucina»
Unutrypalityčny błok Administracyi prezidenta pačaŭ pravodzić narady pa prezidenckaj kampanii 2024 hoda. U ich udzielničajuć čynoŭniki i palittechnołahi, jakija supracoŭničajuć z Kramlom. Pra heta raskazali «Mieduzie» dźvie krynicy, blizkija da administracyi prezidenta Rasii. Pa ich słovach, pakul u Kramli razumiejuć tolki samyja ahulnyja «kontury» budučych vybaraŭ — ale ŭžo jasna, što «kampanija budzie pad Uładzimira Pucina».
Adzin z surazmoŭcaŭ «Mieduzy» padkreśliŭ: «Pra niejkich inšych kandydataŭ [ad ułady] havorki nie idzie». Jon dadaŭ, što «sparynh-partniorami» Pucina stanuć pradstaŭniki parłamienckich partyj. «Libieralnych kandydataŭ nie budzie, navat dla vyhladu», — adznačyła krynica.
Inšy surazmoŭca «Mieduzy», blizki da pucinskaj administracyi, raskazaŭ, što zvyčajna da prezidenckich vybaraŭ u Kramli pačynajuć rychtavacca prykładna za paŭtara hoda da dnia hałasavańnia (tradycyjna heta druhaja niadziela sakavika). Spačatku ŭ administracyi vyznačajuć tyja samyja «kontury» kampanii, a zatym vybirajuć palittechnołahaŭ, jakija buduć «adkazvać» za hałasavańnie ŭ rehijonach.
Paśla hetaha — za niekalki miesiacaŭ da hałasavańnia — u rehijonach vybudoŭvajuć «mabilizacyjnyja sietki», heta značyć vyrašajuć, chto i jak budzie «mabilizoŭvać» biudžetnikaŭ i inšych łajalnych da ŭłady vybarščykaŭ. Prykładna ŭ tyja ž terminy vyznačajecca kančatkovaja ideałahičnaja stratehija kampanii.
Pakul navat ahulny źmiest hetaj stratehii nie całkam zrazumieły. Blizkija da Kramla surazmoŭcy «Mieduzy» rastłumačyli: na hety momant zrazumieła tolki toje, što čarhovaja pucinskaja kampanija budzie budavacca vakoł «antyzachodnich» naratyvaŭ. Pucin, jak zvyčajna, budzie razvažać ab «viartańni vieličy Rasii, baraćbie z Zachadam i šmatpalarnym śviecie».
Pry hetym va ŭnutrypalityčnym błoku AP upeŭnienyja, što zapyt na takuju rytoryku nie vielmi vysoki: «Heta nie toje, što chvaluje vybarščyka, a toje, što cikava samomu prezidentu».
Na hety momant u Kramli spadziajucca, što da prezidenckich vybaraŭ vajna z Ukrainaj budzie skončanaja. Ale čym mienavita — niezrazumieła. «Što budzie abvieščana pieramohaj? Na vybary treba vychodzić z dasiahnieńniami. Naprykład, ź niejkim naboram dałučanych terytoryj. Ale jakija heta buduć terytoryi — heta pakul niezrazumieła», — padkreśliła adna z krynic.
Niahledziačy na heta, u Kramli majuć namier damahčysia dla Pucina rekordnych vynikaŭ na budučych vybarach. Blizki da administracyi surazmoŭca «Mieduzy» patłumačyŭ:
«Paśla taho, jakija pakazčyki byli aficyjna ahučanyja na «refierendumach pa dałučeńni» [samaabvieščanych] «DNR» i «ŁNR», Chiersona i Zaparožža, pakazvać niešta mocna nižejšaje budzie nielha. Padtrymka pavinna być tatalnaj. U tym liku dla demanstracyi papularnaści prezidenta Zachadu».
Na prezidenckich vybarach 2018 hoda jaŭka skłała 67,54%, a Pucin, pa aficyjnych źviestkach, nabraŭ 76,69% hałasoŭ. Na «refierendumach» za «dałučeńnie da Rasii» ŭkrainskich terytoryj prahałasavali amal 100%.
Razam z tym adzin z palittechnołahaŭ, jakija supracoŭničajuć z Kramlom, u razmovie z «Mieduzaj» pryznaŭsia, što samym «łahičnym» i «zrazumiełym» varyjantam było b naohuł nie pravodzić vybary ŭ 2024 hodzie, a ŭvieści pa ŭsioj Rasii vajennaje stanovišča i adkłaści hałasavańnie.
«Da 2024 hoda ekanamičnyja nastupstvy sankcyj i izalacyi prajaviacca ŭ poŭnaj miery. Zrazumieła, što vynik možna pakazać jaki zaŭhodna, ale navošta treba budaražyć nasielnictva nie samymi praŭdapadobnymi rekordnymi ličbami?» — patłumačyŭ jon.
Pry hetym surazmoŭca «Mieduzy» padkreśliŭ, što taki scenar naŭrad ci mahčymy: «Uładzimir Pucin lubić bačyć vyniki narodnaj padtrymki».
Kamientary