Biełarusy źnialisia ŭ topavym sieryjale ad Netflix. Adzin ź ich — u roli Jelcyna
«Karona» (The Crown») — adzin z najpapularniejšych sieryjałaŭ ad stryminhavaj płatformy Netflix, pryśviečany praŭleńniu brytanskaj karalevy Lizaviety II. 9 listapada vyjšaŭ piaty siezon, i ŭ im źjavilisia dva biełarusy.
Razmova pra epizod «Dom Ipaćjeva» — šostuju ź dziesiaci sieryj u ciapierašnim siezonie «Karony», jaki stanie dla sieryjała apošnim. U hetym domie, što znachodziŭsia niekali ŭ Jekacierynburzie, była ŭ 1918 hodzie rasstralanaja siamja apošniaha rasijskaha impieratara Mikałaja II — dvajuradnaha brata Hieorha V, dzieda Lizaviety.
Pačatak sieryi viartaje nas u tyja časy, a dalej my bačym sustreču karalevy z Barysam Jelcynym. U 1970-ja Jelcyn, jaki byŭ tady pieršym sakratarom Śviardłoŭskaha abkama KPSS, zahadaŭ źnieści Ipaćjeŭski dom, i ŭ sieryjale karaleva daviedvajecca pra hetuju historyju ad Džona Miejdžara, premjer-ministra Brytanii ŭ pačatku 1990-ch.
Rolu Barysa Jelcyna ŭ «Karonie» daručyli viadomamu biełaruskamu akcioru Anatolu Kacianiovu, byłomu mužu viadučaj Śviatłany Baroŭskaj, jaki šmat zdymajecca ŭ rasijskim kino i sieryjałach. Jon źniaŭsia ŭ scenach, što demanstrujuć vizit Barysa Jelcyna ŭ 1992 hodzie ŭ Brytaniju i vizit brytanskaj karalevy ŭ Rasiju. U «Karonie» Lizavieta II hladzić pa televizary kadry žnivieńskaha putča 1991 hoda ŭ Maskvie, jakija taksama zdymali nanava z udziełam Kacianiova — heta nie archiŭnyja kadry.
Akramia Anatola, u «Domie Ipaćjeva» źjaviŭsia jašče adzin biełarus, akcior i były dyrektar Change.org pa Uschodniaj Jeŭropie i Centralnaj Azii Micia Saviełaŭ. Jon syhraŭ pierakładčyka Jelcyna. Jon raskazaŭ «Našaj Nivie», jak prachodzili zdymki i jak jon atrymaŭ rolu.
Dla Saviełava «Karona» — pieršy dośvied udziełu ŭ kino i sieryjałach, da hetaha mužčyna sprabavaŭ siabie va ŭłasnym prajekcie Change LIVE. Biełarus taksama hraje ŭ śpiektakle «Sabaki Jeŭropy» Biełaruskaha volnaha teatra.
Micia žyvie ŭ Brytanii, dzie prachodzić bolšaja častka zdymkaŭ «Karony», i na placoŭku jon trapiŭ standartna — praz paśpiachovy kastynh. Saviełaŭ raskazvaje, što
čaściej za ŭsio akcioraŭ dla hetaha šou šukajuć u Brytanii, akramia vypadkaŭ, kali hieroj duža śpiecyfičny — naprykład, Anatola Kacianiova na rolu Jelcyna zaprasili z Maskvy.
Sceny z udziełam Mici zdymali čatyry tydni, uvieś siezon, pavodle Saviełava, — niedzie paŭhoda. Biełarus z zachapleńniem raskazvaje pra miescy, u jakich stvarali «Karonu»:
«Samaje dziŭnaje — heta, kaniešnie, miescy zdymak, bo dla taho, kab adnavić interjery i eksterjery zamkaŭ i pałacaŭ, my časta zdymali ŭ roznych pryvatnych majontkach pa ŭsioj krainie. A scenu z karaleŭskim kartežam u Maskvie zdymali na pieraroblenych vulicach horada Brendfarda, jaki nazyvajuć maleńkaj Hiermanijaj».
Micia kaža, što było zadavalnieńniem vučycca ŭ prafiesijanałaŭ kamandy.
«Piter Morhan — hienijalny dramaturh i scenaryst. Jon nie tolki hłyboka viedaje historyju karaleŭskaj siamji, ale i ŭmieje pieratvaryć hetuju historyju ŭ vielmi mocna napisany scenar. Ja pracavaŭ z Kryścijanam Švochuvam, z talenavitym režysioram našaj sieryi. Cikava, što ŭsie jaho sieryi ŭ «Karonie» vielmi składanyja, u ich try-čatyry paralelna pieraplecienyja historyi. Niezdarma naša sieryja hladzicca jak asobny ceły film».
Akcioraŭ, ź jakimi atrymałasia papracavać, Saviełaŭ charaktaryzuje słovam «kosmas». Biełarus adznačaje, što chacia ŭsie na zdymačnaj placoŭcy i byli prafiesijanałami vysokaha ŭzroŭniu, ale ž pry hetym pavodzili siabie tak pryjazna, što za čas zdymak jon zbliziŭsia ź imi i adčuŭ siabie častkaj kamandy.
«Naša Niva» — bastyjon biełaruščyny
PADTRYMAĆPra skandynaŭskija filmy, połackija syrki, dom i paśladoŭnaść. Hutarka z dyrektarkaj najbujniejšaha biełaruskaha niezaležnaha kinafiestyvalu
«Siabar siamji» (A Friend of the Family) — samaja ŭražalnaja kryminalnaja historyja, što tolki možna siabie ŭjavić
Na kinafiestyvali «Paŭnočnaje źziańnie» pakažuć anłajn ukrainskija dakumientałki
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść37
Kamientary