Dva z pałovaj hady kałonii prysudzili aktyvistu Mikałaju Arciuchovu za zakliki i ŭdzieł u akcyjach pratestu ŭ 2020 hodzie

Spravu razhladała sudździa Natalla Dziadkova.

Mikałaj Arciuchoŭ naradziŭsia 22 maja 1979 hoda ŭ Minsku. Navučaŭsia na jurydyčnym fakultecie Mižnarodnaha humanitarna-ekanamičnaha instytuta. Z 1996 hoda braŭ aktyŭny ŭdzieł u žyćci katalickaj moładzi. Udzielničaŭ u miascovych i parłamienckich vybarach u 2003 i 2004 hadach. Byŭ adnym ź inicyjataraŭ utvareńnia arhkamiteta partyi «Biełaruskaja chryścijanskaja demakratyja». Ale z 2011 hoda adyšoŭ ad aktyŭnaha ŭdziełu ŭ palityčnym žyćci.

Pa materyjałach abvinavačańnia, Arciuchoŭ u žniŭni 2020 hoda ŭ fejsbuku na svajoj staroncy raźmiaščaŭ vykazvańni pabudžalnaha charaktaru: zakliki da ździajśnieńnia supraćpraŭnych dziejańniaŭ, ich adabreńnie i padtrymku, da pryniaćcia ŭ ich asabistaha ŭdziełu, da błakavańnia darožnaha ruchu — zachoŭvaŭ nazvanuju infarmacyju ŭ svabodnym dostupie ŭ sietcy internet, zabiaśpiečvaŭ jaje dubliravańnie pamiž internet-resursami, jakija ŭtvarajuć sistemu abmienu danymi, a taksama raspaŭsiudžvańnie i papularyzacyju siarod inšych karystalnikaŭ.

Takim čynam naviazvaŭ svajo mierkavańnie i tym samym dapuskaŭ dyskredytacyju dziaržaŭnaj ułady, raspaŭsiudžvaŭ sumnieńni ŭ dakładnaści vynikaŭ vybaraŭ Prezidenta Respubliki Biełaruś.

Jon ža raspaŭsiudžvaŭ u internecie infarmacyju ab miescy i časie zboru ŭdzielnikaŭ pratesnych akcyj u Minsku, a taksama inšyja źviestki pa kiraŭnictvie i kaardynacyi supraćpraŭnaj dziejnaści, što pryviało da masavych publičnych pratesnych akcyj.

Tak, 15 žniŭnia 2020 hoda na svajoj staroncy jon raźmiaściŭ infarmacyju ab «Maršy Svabody», 17 žniŭnia — infarmacyju, u jakoj pravodzić razbor «pamyłak» minułaha maršu, a 20.08.2020 piša ab tym, jak treba dziejničać pry padaŭleńni pratestaŭ pravaachoŭnymi orhanami. Takich paviedamleńniaŭ jon pakinuŭ bolš za dvaccać.

Arciuchova taksama abvinavacili ŭ niepasrednym udziele ŭ adnoj takoj akcyi ŭ Minsku ŭ žniŭni 2020 hoda.

Mikałaj u sudovym pasiadžeńni svaju vinu ŭ ździajśnieńni inkryminavanych jamu padziej pryznaŭ u poŭnym abjomie, nie admaŭlaŭ aŭtarstva tekstaŭ i paviedamleńniaŭ, jakija jon pakidaŭ va «UKantakcie» i fejsbuku.

Taksama ŭ sudzie zajaŭleny hramadzianski isk KUP «Minsktrans» ab spahnańni z Arciuchova majomasnaj škody, naniesienaj hramadskamu transpartu Minska ŭ sumie 27 416 rubloŭ 67 kapiejek.

Sud pastanaviŭ pakrać Mikałaja pazbaŭleńniem voli na termin dva hady i šeść miesiacaŭ z adbyvańniem pakarańnia ŭ papraŭčaj kałonii va ŭmovach ahulnaha režymu.

• 0
• 0
• 0
• 0
• 0
• 0
• 9
• 0