U piatnicu 25 listapada Makiej sustreŭsia z nuncyjem Jozičam.
Asnoŭnymi temami hetaj hutarki stali 30-hodździe z dnia ŭstanaŭleńnia dypłamatyčnych adnosin pamiž Respublikaj Biełaruś i Śviatym Pasadam, uzajemadziejańnie Vatykana i Minska, a taksama aktualnaje stanovišča Ryma-Katalickaha Kaścioła ŭ našaj krainie.
Varta adznačyć, što sustrečy pradstaŭnika Papy Franciška ŭ Biełarusi ź ministram Makiejem adbyvalisia rehularna. Kiraŭnik biełaruskaha źniešniepalityčnaha viedamstva zaŭsiody byŭ adkrytym dla kantaktaŭ i prykładaŭ vialikija asabistyja namahańni dla padtrymańnia tradycyjna dobrych adnosin pamiž Respublikaj Biełaruś i Śviatym Pasadam, padkreślivaje catholic.by.
«Arcybiskup Jozič u malitvie daručaje dušu spačyłaha Uładzimira Makieja Božaj Miłasernaści i vykazvaje spačuvańni jaho rodnym, blizkim i kaleham, molicca ab suciašeńni dla ich u hetuju ciažkuju chvilinu rasstańnia», — havorycca ŭ paviedamleńni.
Za pamierłaha ministra padčas ranišniaj śviatoj imšy ŭ minskim katedralnym kaściole, jakaja tranślavałasia na radyjo, maliŭsia taksama Mitrapalit Minska-Mahiloŭski, arcybiskup Juzaf Stanieŭski.
Paviedamlajecca, što Ante Jozič voźmie ŭdzieł u raźvitańni i pachavańni spačyłaha Uładzimira Makieja, jakoje adbudziecca ŭ aŭtorak.
Taksama lityju za dušu Uładzimira Makieja pravioŭ apostalski vizitatar dla biełarusaŭ — hreka-katalikoŭ Siarhiej Hajek.
̶p̶o̶s̶ł̶ie̶d̶n̶i̶j̶ ̶k̶t̶o̶ ̶v̶i̶d̶ie̶ł̶ ̶ž̶i̶v̶y̶m̶