Uvachod pa Face ID i parkinh z 6-mietrovymi stolami. Voś jak vyhladaje pieršy dom u kvartale «Depo»
Prajekt hetaha žyłoha kompleksu kala płoščy Pieramohi pačaŭ ździŭlać prosta sa startu. Spačatku — kłasnaj architekturaj, potym — niezvyčajnaj dla Minska canoj (kala 3 500 dalaraŭ za «kvadrat»). Žurnalisty zmahli acanić pieršy hatovy dom u novym kvartale «Depo». Realt.by pakazvaje, jakimi atrymalisia kvatery z samym darahim u Minsku mietram.
«Dla nas heta − mahčymaść u čarhovy raz padniać płanku i dla siabie, i dla rynku»
Pra toje, jak ruchajecca budoŭla kvartała ŭ rajonie płoščy Pieramohi, my raspaviadali ŭ krasaviku i červieni. Ciapier nastaŭ čas pahladzieć na pieršy hatovy dom.
Učastak u centry Minska, dzie raniej było tralejbusnaje depo, kampanija «A-100 Deviełapmient» nabyła ŭ 2017 hodzie z aŭkcyjonu. Za ziamlu zabudoŭščyk zapłaciŭ kala 8,8 miljona dalaraŭ. Amal stolki ž kampanija vydatkavała na znos starych pabudoŭ i demantaž inžyniernych sietak. U 2019 hodzie zabudoŭščyk pradstaviŭ prajekt žyłoha kompleksu, jaki raspracavaŭ viadomy rasijski architektar Siarhiej Skurataŭ, a ŭžo praz hod na miescy byłoha depo zakipieła budoŭla.
Zaraz całkam hatovy dom pad adrasie: vulica Kisialova, 6 V. Vakoł doma ŭžo jość darožki — praŭda, učarašni śniehapad i ledziany doždž schavali ŭsio dobraŭparadkavańnie.
Trapić u novabudoŭlu ŭžo nie prosta. Vakoł płot i dostup nie dla ŭsich. Da prykładu, u svoj padjezd žychary buduć traplać pa Face ID — ich tvary raspaznaje razumnaja sistema. U samim padjeździe ŭstalavany dźviery «no touch»: tuzać ručku nie abaviazkova, pryłada sama adčynić dźviery pierad žycharami.
Pieršyja try damy «Depo» majuć pa šeść pavierchaŭ i raźmieščany z boku vulicy Kisialova. Adroźnivajucca budynki ŭnutranym napaŭnieńniem: u adnym budzie čarnavoje azdableńnie, u inšym — white box, u trecim — white box plus.
U padjeździe sustrakaje łaŭnž-zona, a taksama — pamiaškańnie dla kalasak, «łapamyjka» i haściavyja sanvuzły.
Tut ža na ścianie — karcina biełaruskaj mastački Taćciany Radziviłka. Tvor ź sieryi pad nazvaj «Viartańnie» pisaŭsia śpiecyjalna dla hetaha doma. U inšych damach taksama źjaviacca karciny hetaha aŭtara.
Va ŭsich kvaterach pieršaha doma zroblena azdableńnie White Box. Što heta aznačaje? Toje, što ŭsie brudnyja i šumnyja pracy ŭžo ŭ minułym. Budučym haspadaram zastaniecca vybrać koler ścien, zrabić padłohu i stol. Usie pieraharodki, vyklučalniki, razietki, aciapleńnie, vyvady pad kandycyjaniery — užo na miescy. U Biełarusi tak, darečy, nichto nie robić.
Pieršyja try damy kompleksu — całkam manalitnyja. Ścieny tut adlivalisia ź bietonu. Fasad budynkaŭ — niamieckaja klinkiernaja cehła. Hety materyjał cikavy tym, što, dziakujučy technałohii vyrabu, niemahčyma znajści dźvie adnolkavyja cahlinki. Kožnaja ź ich trochi adroźnivajecca koleram abo ŭzoram. Usie vokny ŭ damach taksama z Hiermanii — z aluminijevym profilem Schuco. Jość u Depo i skruhlenyja, radyusnyja vokny, što taksama redkaść dla Biełarusi.
U kožnym domie zaprajektavana pa 21-j kvatery. Vyšynia stolaŭ tut — bolš za try mietry. Harderobnych i vannych pakojaŭ u kožnaj kvatery stolki ž, kolki i spalniaŭ.
«Tolki lanivy nie skazaŭ nam, što my pačali prajekt u nie samy ŭdały čas»
Darečy, svabodnyja kvatery ŭ damach, jakija budujucca, jašče jość.
«U hety momant u pieršych troch damach realizavana bolš za 65% kvater. Častku kvater my pakidajem, budziem pradavać ich u całkam hatovym vyhladzie. Pientchausy amal usie pradadzienyja, astatnija płaniroŭki jašče jość u najaŭnaści», — raskazvajuć u «A-100».
Siarod «fišak» pieršych damoŭ u centry horada — lifty Shindler, aŭtamatyčny manitorynh aciapleńnia, vady i praciakańnia, «razumny dom», pradumanaje dobraŭparadkavańnie, premijalny servis.
«Tolki lanivy nie skazaŭ nam, što my pačali prajekt u nie samy ŭdały čas. Skažu, što my pracujem na rynku ŭžo 27 hadoŭ, i kryzisaŭ na našym vieku było ŭžo šmat. Idealnaha času nie budzie nikoli, kryzisy projduć, a «Depo» zastaniecca», — kaža Śviatłana Šeŭlik, kiraŭnik hrupy kampanij «A-100 Deviełapmient».
Taksama amal hatovyja da zdačy dva susiednija damy. Što datyčycca pierśpiektyŭ, to zaraz pačałosia budaŭnictva trochpadjezdnaha žyłoha doma na miescy halerei «Ŭ», a ŭ nastupnym hodzie startuje budaŭnictva i piataha žyłoha doma.
Płošča žylla ŭ pieršych damach pačynajecca ad 88 «kvadrataŭ». U čaćviortym domie možna budzie znajści mienšuju kvateru — tam płoščy pačynajucca ad 61 kvadratnaha mietra.
Cikavy vyhlad budynka, jaki budzie adnoŭleny amal całkam u svaim pieršapačatkovym vyhladzie, — heta cahlany budynak myjki 1929 hoda. Padčas demantažu hetaj pabudovy zachavałasia bolš za 20 tysiač starych cahlin, jakija buduć vykarystanyja ŭ adnym ź interjeraŭ ahulnych prastor. U adnoŭlenym budynku myjki zapracuje restaran i mastackaja halereja.
Taksama zabudoŭščyk vykarystoŭvaje ŭ dyzajnie znojdzienyja rejki, belki i navat vałuny. Jany intehrujucca ŭ piešachodnyja darožki, vuličnuju meblu i łandšaftny dyzajn.
Parkinh raźmieścicca pad usim kompleksam. Pakul zdadziena tolki častka, jakaja budzie pad žyłymi damami, ale i jana ŭražvaje. Pa-pieršaje, tut vysačeznyja stoli. U niekatorych miescach jany dachodziać da 6 mietraŭ. Pa-druhoje, tut jość miesca dla elektramabilaŭ. Pa-treciaje, tut prosta pryhoža.
Za kožnaj kvateraj zamacujuć adno parkovačnaje miesca, dadatkovyja miescy možna dakupić. Usiaho tut praduhledžana bolš za 800 mašynamiescaŭ i śpiecyjalnyja zony dla zachoŭvańnia rovaraŭ.
Uvieś žyły kompleks «Depo» budzie składacca z 21 doma i 557 kvater. Amal pałovu prastory novaha kvartała zojmie zialonaja zona i piešachodnaja vulica. Na astatniaj płoščy źjaviacca žyłyja damy sa šmatlikimi hramadskimi prastorami.
Upryhožvańniem kvartała stanie piešachodnaja vulica sa štučnaj sažałkaj, bucikami i restaranami. Pry hetym kali na pramienad zmohuć trapić usie žadajučyja, to terytoryja žyłych damoŭ budzie zakrytaj i svabodnaj ad aŭtamabilaŭ. Dvary kompleksu abstalujuć dziciačymi hulniavymi placoŭkami, zonami dla adpačynku i zaniatkaŭ sportam.
Administravać kvartał i sačyć za jaho čyścinioj budzie kampanija «A-100 Kamfort».
Biełaruś prysabiečyła častku terytoryi Ukrainy dla ŭłasnych patreb? 1
Kamientary