«Mahiloŭsajuzdruk» ratavać nie buduć i kančatkova likvidujuć praz paŭhoda
Ekanamičny sud Mahiloŭskaj vobłaści adkryŭ likvidacyjnuju vytvorčaść u dačynieńni da AAT «Mahiloŭsajuzdruk», paviedamlaje «Vieśnik Mahilova» sa spasyłkaj na pres-słužbu suda.
«Mahiloŭsajuzdruk» sam źviarnuŭsia ŭ ekanamičny sud z zajavaj ab pryznańni jaho bankrutam. Departamient pa sanacyi i bankructvie Minekanomiki Biełarusi na padstavie pravierki finansavaha stanu płaciežazdolnaści pradpryjemstva zrabiŭ vysnovy ab tym, što arhanizacyja niepłaciežazdolnaja i niepłaciežazdolnaść maje ŭstojlivy charaktar.
Z padadzienych u ekanamičny sud kiraŭnikom materyjałaŭ vynikaje, što kredytorskaja zapazyčanaść nie apłačana i składaje 7 173 995,98 rubla, a majomaści daŭžnika na sumu 6 941 000,36 rubla niedastatkova dla zadavalnieńnia patrabavańniaŭ usich kredytoraŭ.
Na asnovie praviedzienaha analizu finansava-haspadarčaj dziejnaści kiraŭnik ustanovy skłaŭ płan likvidacyi, jaki zaćvierdziŭ schod kredytoraŭ. Termin likvidacyi ŭstanoŭleny pa 12 lipienia 2023 hoda.
Šmatlikija kijoski pradpryjemstva nie pracavali z červienia-lipienia hetaha hoda. U žniŭni kiraŭnictva AAT «Mahiloŭsajuzdruk» padało chadajnictva ŭ sud ab pryznańni bankructva z-za vialikich zapazyčanaściaŭ. Tady ž byŭ pryznačany kryzisny kiraŭnik, a «Mahiloŭsajuzdruk» uziaŭ kurs na viartańnie pazyk kredytoram.
U 2022 hodzie «Mahiloŭsajuzdruk» staŭ pastupova zakryvać svaje handlovyja punkty. Palicy ž mnohich z abjektaŭ handlu, jakija zastalisia, stajali napaŭpustyja, bo praź finansavyja ciažkaści pradpryjemstva nie mahło zakupać papiaredni asartymient tavaraŭ.
U vyniku, kali pa stanie na studzień 2018 hoda «Mahiloŭsajuzdruk» mieŭ handlovuju sietku z 224 punktaŭ roznych vidaŭ, to na žnivień 2022 hoda zastałosia tolki 43 abjekty ŭ Mahilovie, Babrujsku i Čavusach, dy i tyja da vieraśnia začynilisia.
Praŭda, z kanca kastryčnika stali adnaŭlać pracu asobnyja kijoski «Mahiloŭsajuzdruku» ŭ Mahilovie, Babrujsku, Čavusach. Supracoŭniki sietki niaśmieła vykazvali aptymizm, što da kanca hoda adnoviać pracu niekalki dziasiatkaŭ handlovych punktaŭ pradpryjemstva. Ale ŭ vyniku pradpryjemstva ŭsio ž taki kančatkova ŭziała kurs na likvidacyju.
Kamientary