Biełaruski Hajun: Rasijanie pierakidajuć tanki bližej da miažy z Ukrainaj
Manitorynhavy telehram-kanał «Biełaruski Hajun» atrymaŭ infarmacyju pra toje, što ešałony z rasijskaj vajskovaj technikaj hetymi dniami pačali prasoŭvacca bližej da miažy z Ukrainaj.
Siońnia, 20 śniežnia, u rajonie 5-j hadziny ranicy z čyhunačnaj stancyi Pałonka adpraviŭsia ešałon z vajskovaj technikaj Uzbrojenych sił Rasii, jakaja dysłakavałasia na palihonie «Abuz-Lasnoŭski» ŭ Baranavickim rajonie. Na praciahu dnia ešałon prajšoŭ Biarozu, Žabinku, Drahičyn, Ivanava i prybyŭ u Łuniniec. Na jahonych płatformach byli zaŭvažanyja 23 tanki T-80, vosiem bienzavozaŭ, dzieviać hruzavikoŭ (Urały i KamAZy), akramia taho jon mieŭ dva pasažyrskija i siem hruzavych vahonaŭ. Hetuju infarmacyju paćvierdziŭ kanał «Supolnaść biełaruskich čyhunačnikaŭ».
Akramia hetaha, «Biełaruski Hajun» paviedamlaje, što 19 śniežnia na stancyi Zasłonava ŭ Lepielskim rajonie pahruzili na płatformy bolš za 20 tankaŭ i 16 «Urałaŭ», jakija znachodzilisia na palihonie «Lepielski». Paźniej ešałon nakiravaŭsia ŭ napramku Oršy i pajšoŭ na Asipovičy. Punkt jaho pryznačeńnia, pa papiaredniaj infarmacyi, — Słuck.
Treci zafiksavany vypadak: ranicaj 20 śniežnia praz Škłoŭ prajšoŭ ešałon z 20-ciu BMP-2, tryma bienzavozami, siamiu «Urałami», mabilnym punktam kiravańnia suviazi (MPUS-K) na bazie «KamAZ», čatyry pasažyrskija vahony Rasijskaj čyhunki i try hruzavyja vahony. Jon prajšoŭ praz Oršu, Mahiloŭ i Žłobin i ŭ vyniku prybyŭ u Kalinkavičy.
Pry hetym kanał padkreślivaje, što pakul kolkaść techniki, što pierakidajecca na pamiežža, nievialikaja i jaje dakładna niedastatkova ni dla jakich nastupalnych dziejańniaŭ.
Kamientary