Krakadziłavyja kresły i pracy viadomaha skulptara. Cikavostki interjeraŭ bankira Maciušeŭskaha
Vystaŭleny na prodaž katedž Vasila Maciušeŭskaha, staršyni praŭleńnia Banka BiełVEB i byłoha vice-premjera, źviartaje na siabie ŭvahu nie tolki raskošnaj meblaj i canoj u 1,2 miljona dalaraŭ. U interjerach my zaŭvažyli niekalki cikavych detalaŭ.
Piersanalny styl Maciušeŭskaha źviartaje na siabie ŭvahu — niaźmienny šaŭkovy halštuk, zaviazany kłasičnym vuzłom «vindzor», idealna padabranyja kašuli i kaściumy pa fihury — vidavočna, nabyvajucca nie ŭ ajčynnym «Kaminternie». Luboŭ da pryhožaha, vierahodna, adyhrała svaju rolu i ŭ dalejšym uładkavańni doma.
Katedž, što mieścicca ŭ elitnym rajonie kala vadaschovišča Drazdy, pabudavany ŭ psieŭdaanhielskim styli: asimietryčny dom, stromki, valmavy dach i charakternaje kamienna-cahlanaje ablicoŭvańnie.
Unutry, možna mierkavać, haspadar sprabavaŭ sumiaścić kłasičny i kałanijalny styli. U vyniku atrymaŭsia šyk pa-biełarusku.
U haścioŭni sustrakajuć aksamitnaja kanapa, vitražy i aračnyja vokny.
Razynačka pakoja — abiedzienny harnitur u styli «Indyjany Džonsa». Vakoł mazaičnaha draŭlanaha stała stajać masiŭnyja kresły, abciahnutyja krakadziłavaj skuraj.
Na padłozie kala marmurovaha kamina — jehipieckija statuetki, vierahodna, pryviezienyja haspadarami z dalokich vandrovak. A na samim kaminie možna zaŭvažyć kalekcyju nievialikich bronzavych skulptur.
Hetyja statuetki aŭtarstva viadomaha biełaruskaha skulptara Andreja Astašova. Vierahodna, Maciušeŭski jość zaŭziatym prychilnikam tvorčaści mastaka, bo na adnoj palicy sabrany raboty z roznych kalekcyj.
Naprykład, skulptura «Pryncesa Ahniu» ź sieryi 2016 hoda (pa centry), a taksama statuetki «Fantazior» i «Matylok» z «Sieryi małych formaŭ» 2011 hoda (dźvie fihury sprava ad centralnaj). Padobnyja skulptury aŭtar daryŭ taksama Nacyjanalnamu mastackamu muzieju Biełarusi ŭ 2019 hodzie.
Zaŭvažna, što haspadar doma lubić interjernyja hadzińniki: my naličyli try, adzin ź jakich — antykvarny abo źjaŭlajecca kopijaj antykvaryjatu.
Katedž maje dva vannyja pakoi: adzin vykanany ŭ tradycyjnym uschodnim styli i ablicavany błakitnaj mazaikaj, druhi — kłasičny.
U adnoj z prybiralniaŭ znoŭ sustrakajecca animalistyčnaja tematyka — pazałočanaje kresła z tyhrovaj abiŭkaj. Palicy ŭpryhožany statuetkami aniołaŭ i inšymi detalami.
Niekalki spalniaŭ i kabinietaŭ vykanany ŭ kłasičnym styli. U dekory vykarystana šmat dreva i fakturnych tkanin — u jakaści abiŭki kanap, dyvanoŭ i štor.
Imaviernaj pryčynaj prodažu katedža moža być razvod Maciušeŭskaha z žonkaj.
«Treba kupić joj niešta i samomu pierajechać padalej ad Kałaŭra. Kali b jaho z hetaj kryminałkaj nie raździeli, to, moža, i nie pryjšłosia b pradavać, a tak…» — skazaŭ «NN» adzin z bankiraŭ.
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary