Sabaka Patron. Chto i kolki zarablaje na papularnym džek-rasieł-terjery
Ukrainski sabaka parody džek-rasieł-terjer nabyŭ papularnaść u 2022 hodzie, kali raźminiravaŭ pali, budynki, vulicy haradoŭ razam z sapiorami Čarnihaŭskaj abłasnoj Dziaržaŭnaj słužby pa nadzvyčajnych situacyjach (DSNS). Akramia hetaha, u mai Uładzimir Zialenski ŭznaharodziŭ Patrona miedalom «Za addanuju słužbu». Forbes daviedaŭsia, kamu naležać pravy na vyjavu samaha viadomaha sabaki Ukrainy i chto zarablaje na brendzie «sabaka Patron».
Užo ź siaredziny viasny ŭ kramach pačali pradavać miakkija cacki ŭ vyhladzie sabaki Patrona, na roznych tavarach źjavilisia jaho vyjavy. Takija karcinki jość na kavie, cukierkach i sasiskach. I heta nie prosta chajp. Takim čynam vytvorcy pryciahvajuć aŭdytoryju Patrona da svajho praduktu, tłumačyć suzasnavalnik rekłamnaha ahienctva Tabasco Alaksandr Śmirnoŭ. «Hety efiekt prasočvajecca ŭ luboj kampanii z udziełam sielebryci», — kaža jon.
A toje, što hety sabaka — sielebryci, paćviardžajuć danyja sacyjalnych sietak. U instahramie ŭ staronki Patrona 389 000 padpisčykaŭ, u tyk-toku — 514 000, u tvitary — 70 000. Pieśniu pra sabaku ŭkrainskaha hurta Karta Svitu na YouTube za piać miesiacaŭ pahladzieli 2 młn razoŭ. Trek uklučyli ŭ navahodni kancert na TB.
Choć Patron jość adnym ź simvałaŭ ciapierašniaj vajny, jon niasie stanoŭčy pasył. «Patron — heta pra vyratavańnie žyćcia, kaštoŭnaści, patryjatyzm, ciapło i kłopat», — kaža Śmirnoŭ.
Chto zarablaje na vyjavie sabaki Patrona
Vykarystańnie vyjavy sabaki-zorki nie biaspłatnaje. Aŭtarskimi pravami na jaho zajmajecca kampanija «Patron nie śpić». U pryvatnaści, ź joj zaklučyli pahadnieńni kandytarskaja fabryka Lukas, jakaja vyrablaje hłazuravanyja cukierki Patron, a taksama vytvorcy cacak WP Merchandise, jakija vypuścili miakkija cacki, padušku i futravuju sumku z vyjavaj komiksa Patrona. I kampanija «Zrabiŭ tata», jakaja stvaryła jołačnyja cacki.
Vytvorca tavaraŭ dla žyvieł Collar, pa słovach kiraŭnika siekcyi pa pracy z partniorami kampanii Anastasii Judzinaj, zaklučyŭ dahavor z uładalnikam sabaki Michaiłam Iljevym, načalnikam častki piratechničnych rabot DU DSNS Čarnihaŭskaj vobłaści. Collar vypuściła liniejku amunicyi dla chatnich žyvioł HERRRO.
Kampanija «Patron nie śpić» zarehistravanaja ŭ žniŭni 2022 hoda. Pa danych YouControl, jaje kančatkovaja bienieficyjarka i hienieralny dyrektar — Julija Hrabianieŭskaja. Jana taksama dyrektar u TAA «Usio sam», jakoje naležyć viadomamu trevieł-błohieru Antonu Ptuškinu.
Pa słovach Hrabianieŭskaj, jana dziejničaje pa daručeńni ŭładalnika sabaki. Forbes nie zmoh paćvierdzić hetuju infarmacyju — Iljeŭ znachodzicca ŭ kamandziroŭcy na raźminiravańni. Źviazacca ź im nie atrymałasia. Razam z haspadarom na raźminiravańnie pajechaŭ i Patron, pra heta raspaviadajecca na staroncy ŭ instahramie sabaki.
Pakul što handlovaja marka «Sabaka Patron» va Ukrainie nie zarehistravana. Iljeŭ padaŭ šeść zajavak na rehistracyju handlovaj marki va Ukrpatent, pieršaja padadzienaja ŭ mai minułaha hoda. «Pa aptymistyčnym scenary, marki pa samych rańnich zajaŭkach buduć zarehistravanyja nie raniej kanca 2023 hoda», — kaža partnior jurydyčnaj firmy Axon Partners Michaił Judzin.
Sama kampanija nie atrymlivaje ničoha ad prodažu aŭtarskich pravoŭ, kaža Hrabianieŭskaja. Pavodle jaje, usio, što zarablaje Patron, idzie na dabračynnaść.
U pryvatnaści, Collar nakiroŭvaje licenzijny prybytak u Fond dapamohi žyviołam UAnimals. U fondzie heta paćviardžajuć. Pa słovach dyrektara pa partniorstvie i fandrajzinhu hetaj arhanizacyi Valanciny Tarkoŭskaj, UAnimals atrymaŭ «ad Patrona» kala miljona hryŭniaŭ. Hetyja hrošy pastupili ad Collar i słužby taksi Uklon, jakaja pryciahvała sabaku da dabračynnaj akcyi.
U WP Merchandise Forbes kažuć, što lvinaja dola prybytku pojdzie na dapamohu sapioram i žyviołam. «Pa ŭmovach kantrakta, my nie možam vydavać hetuju infarmacyju», — raspaviała dyrektar pa markietynhu WP Merchandise Iryna Tymina.
«Zrabiŭ tata» raźmiaščaje malunak sabaki na cackach biaspłatna, pa damoŭlenaści z «Patron nie śpić». Adnak, jak kaža suzasnavalnica kampanii Maryja Hrom, 10% prybytku jana pieravodzić USU.
Akramia hetaha, «Ukrpošta» vypuściła marku z vyjavaj Patrona. Marža z prodažu pajšła na dabračynnaść, za piać miesiacaŭ apieratar pieravioŭ 16 miljonaŭ hryŭniaŭ, paviedamlajuć u pres-słužbie kampanii. Častka ź ich budzie nakiravana na zakupku mašyny dla raźminiravańnia.
Jašče častka ŭžo nakiravana na nabyćcio vakcyn, karmoŭ i budak dla prytułkaŭ i centraŭ abarony i reabilitacyi žyvioł. Siarod takich prytułkaŭ — Best Friends u Makaravie, Gostomel Shelter u Hastomieli i «Ščaślivy sabaka» ŭ Krapiŭnickim. U Makaraŭskim prytułku Forbes raspaviali, što za pastupleńni ad «Ukrpošty» nabyli dla žyvioł ježu, vakcyny i leki.
Manietyzacyju Hrabianieŭskaja raźličvaje atrymać na multsieryjale pra Patrona. Jon vyjšaŭ 7 studzienia na MEGOGO i YouTube-kanale Patrona. U pieršym siezonie 11 sieryj pa 3-4 chviliny. Pieršaja sieryja ŭžo nabrała amal 150 000 prahladaŭ. Prajekt finansavała Ahienctva ZŠA pa mižnarodnym raźvićci (USAID). Hrošy ad sieryjała, jakija kamanda moža atrymać za prahlad na YouTube, płanujuć ukłaści ŭ nastupny siezon, kaža hienieralny dyrektar «Patron nie śpić».
Kamientary