Sachaščyk raskazaŭ pra svajo znajomstva z Załužnym, kolišniaje pryjacielstva z Valfovičam i stan biełaruskaj armii
Pradstaŭnik Abjadnanaha pierachodnaha kabinieta pa abaronie i nacyjanalnaj biaśpiecy Valeryj Sachaščyk daŭ intervju Youtube-kanału «Žyćcio-malina». Jon raskazaŭ pra sustreču z Załužnym, nazvaŭ mocnyja i słabyja baki ŭ armii Biełarusi, a taksama zhadaŭ, jak napačatku vajny KDB jeździŭ pa padraździaleńniach na miažy z Ukrainaj i pravodziŭ razmovy.
«Załužny vysoka acaniŭ dziejańni biełarusaŭ va Ukrainie»
Z hałoŭnakamandujučym Uzbrojenych sił Ukrainy Valeryjem Załužnym Sachaščyk paznajomiŭsia jašče ŭ 2010 hodzie. U 2022-m jany sustrelisia pa inicyjatyvie Załužnaha.
«Mnie hety čałaviek padaŭsia fienamienalna cikavym. <…> Jon jašče pa duchu taki ž vajar, jak i ja, jamu cikava ŭsio toje ž, što cikava mnie. Tamu naša pieršaja razmova ŭ 2022 hodzie była pra niejkija rečy, nie źviazanyja naŭprost z tym, što adbyvajecca pamiž Ukrainaj i Rasijaj», — raskazvaje jon.
Pa słovach Valeryja Sachaščyka, Załužny vysoka acaniŭ dziejańni biełarusaŭ va Ukrainie.
«Załužny nie adziny hienierał Uzbrojenych sił Ukrainy, ź jakim ja mieŭ znosiny, — kaža Sachaščyk. — Akramia vajskoŭcaŭ, mieŭ znosiny ź niejkaj kolkaściu kiraŭnikoŭ hramadzianskich. Uzrovień maich znosin dastatkovy dla vykanańnia zadač, jakija pierada mnoj stajać.
Połk Kalinoŭskaha ździejśniŭ vialikuju spravu — abaraniŭ honar i hodnaść našaj nacyi. Jany pieršymi pačali vajavać, panieśli straty. U tym liku zahinuli tam chłopcy, jakija vajavali jašče z 2014 hoda, stvarali hetaje farmavańnie. Dziakujučy pałku Kalinoŭskaha, usia Ukraina viedaje, što biełarusy vajujuć za ich. Tam vajujuć cudoŭnyja chłopcy, patryjoty, vielmi matyvavanyja, jakija hatovyja iści na lubuju achviaru, vykonvać lubuju bajavuju zadaču. Ničoha, akramia słoŭ zachapleńnia, ja skazać nie mahu.
Ja razmaŭlaŭ z kiraŭnictvam pałka jašče naprykancy lutaha. Jany mnie prama skazali, što ich mała chvaluje, kim ty byŭ raniej, jakoje ŭ ciabie zvańnie. Zrobiš na hetaj vajnie toje, što robim my, tady my z taboj siadziem i budziem damaŭlacca. Čysta pa-mužčynsku heta narmalny punkt hledžańnia, da jakoha ja pastaviŭsia z pavahaj».
«Pracuju ŭ kabiniecie na hramadskich pačatkach, pakul nie atrymaŭ nivodnaj kapiejki»
Jon taksama raskazaŭ, što ciapier idzie praces farmiravańnia novaj biełaruskaj vajskovaj čaści, jakaja budzie znachodzicca pad kamandavańniem USU.
«U adroźnieńnie ad farmavańniaŭ, jakija byli raniej, hetaja čaść užo vałodaje davoli sučasnaj i efiektyŭnaj sistemaj raźviedki, kiravańnia vojskami, suviazi i srodkami ahniavoha paražeńnia.
Takaja vajna, jakuju viadzie połk Kalinoŭskaha, bataljon «Teror», «Pahonia» — heta nie zusim toje, što nam treba. Heta časam pryvodzić da nieapraŭdanych achviar. Vajskovaje farmiravańnie pavinna mieć usie elemienty armii XXI stahodździa, pryčym na jakasnym uzroŭni, jaki dazvalaje mieć pieravahu nad supiernikam.
Maja hałoŭnaja meta — heta zachavać žyćci ludziej. Tamu ja šukaŭ i budu dalej šukać srodki na toje, kab stvaryć sistemu, jakaja pavysić šansy na vyžyvalnaść ludziej, jakija ŭ joj udzielničajuć. Finansavaje pytańnie staić. Pry najaŭnaści hrošaj šmat jakija rečy možna było b rabić chutčej», — dzielicca Sachaščyk.
Pa słovach pradstaŭnika Abjadnanaha pierachodnaha kabinieta pa abaronie i nacyjanalnaj biaśpiecy, ukrainski bok akazvaje dapamohu ŭ farmiravańni novaj čaści. U vyniku jana budzie vykonvać tyja ž zadačy, što i lubaja inšaja čaść USU.
«Ukrainski bok taksama zacikaŭleny, kab hetaja čaść była efiektyŭnaj. My razumiejem, što ŭkraincam samim vielmi šmat čaho nie chapaje. Što jany majuć, što mohuć — dajuć.
Va Ukrainie my majem dapamohu ad biełaruskich dyjaspar, niešta za košt maich ułasnych srodkaŭ. Toje, što pa-za terytoryjaj Ukrainy, nie finansujecca pakul nijak. Ja pracuju ŭ kabiniecie na hramadskich pačatkach, pakul nie atrymaŭ nivodnaj kapiejki niadkul», — skazaŭ jon.
Sachaščyk nie nazvaŭ, kolki svaich hrošaj ukłaŭ, abaznačyŭ tolki, što heta suma mienšaja za 100 tysiač dalaraŭ.
«KDB nakiroŭvali ŭ padraździaleńni na miažy, kab ahitavać»
Žurnalist Mikita Miełkazioraŭ pacikaviŭsia ŭ Valeryja Sachaščyka, ci padtrymlivaje jon mierkavańnie, što Łukašenka baicca ŭklučacca ŭ vajnu praz toje, što biełaruskija sałdaty, atrymaŭšy zbroju, raźviernucca i pojduć na Pałac Niezaležnaści.
«Heta moža być praŭdaj, — adkazaŭ jon. — Jość padstava mierkavać, što ŭ kancy lutaha 2022 hoda Łukašenka chacieŭ adpravić biełaruskaje vojska va Ukrainu, ale nie zmoh. Tamu što pačałosia surjoznaje chvalavańnie ŭ rozumach źnizu.
Šmat ludziej stali vykazvać mierkavańnie, što ź jakoha pierapudu ŭkraincy stali našymi vorahami, z čaho raptam my musim ich zabivać. Rastłumačcie, što nam zrabili drennaha ŭkraincy.
Kamandziry na miescach nie zmahli adkazać na hetyja pytańni. Dakładna viadoma, što praktyčna ŭvieś skład orhanaŭ KDB byŭ nakiravany ŭ čaści padraździaleńniaŭ, jakija stajać na miažy z Ukrainaj. Jany na praciahu doŭhaha času, nie mienš za tydzień, pravodzili hutarki, zapałochvali, ahitavali.
I potym hetyja ludzi, zusim nie durnyja ludzi, dałažyli svajmu načalstvu, što drenna atrymlivajecca, ničoha dobraha z hetaha nie atrymajecca».
Nakolki dobraje biełaruskaje vojska? Valeryj Sachaščyk nazvaŭ mocnyja i słabyja baki biełaruskaj armii.
«Naprykład, uzrovień karupcyi nie taki vysoki. Jon prysutničaje na ŭzroŭni ludziej, jakija zajmajucca zakupkami, padpisańniem kantraktaŭ. Usio, što tyčycca niepasredna tych, chto słužyć, — ja nie čuŭ pra niejkija surjoznyja, značnyja prajavy karupcyi.
U biełaruskaj armii jość peŭny paradak, dyscyplina. Jana zajmajecca padrychtoŭkaj na ŭzroŭni vyšejšym za siaredni.
Druhaja prablema ŭ tym, što heta armija typova mirnaha času, u jakoj ludziej aceńvajuć nie pa realnym układzie ŭ pavyšeńnie bajazdolnaści, a pa ŭmieńni dahadzić načalstvu i pa pakazusie.
I apošniaje — armija zabiaśpiečvajecca pa reštkavym pryncypie, kali paraŭnoŭvać ź inšymi siłavymi strukturami».
«Składana pryniać, što Valfovič va ŭzroście 50-ci hadoŭ raptam staŭ svołačču»
Taksama Valeryj Sachaščyk raskazaŭ, što jon 30 hadoŭ siabravaŭ ź dziaržsakratarom Rady Biaśpieki Alaksandram Valfovičam. I usie hetyja hady jon viedaŭ jaho «jak razumnaha, adukavanaha, prystojnaha čałavieka».
«Mnie składana pryniać toje, što jon va ŭzroście 50-ci hadoŭ raptam staŭ svołačču i niahodnikam, — kaža jon. — Jak minimum, ja pavinien ź im parazmaŭlać. Chaču pačuć, što skaža jon, i tady rabić niejkija vysnovy.
U mianie nie było mahčymaści paśla 2020-ha ź im parazmaŭlać. Paśla taho, jak ja vystupiŭ u žniŭni 2020-ha, kantakty tady sa mnoj skaracilisia.
Ja dapuskaju, što ŭ toj situacyi, u jakoj jon, inšy čałaviek moh by zrabić značna horš. I pakul ja nie raźbiarusia ŭ hetym, nijakaje klajmo stavić nie budu i jarłyk viešać. U mianie niama mety davać acenku kamuści, stanavicca sudździoj ci ekśpiertam.
Ja ŭpeŭnieny, što źmieny adbuducca. Dla mianie surjoznaje pytańnie, jak heta budzie. Chacieŭ by, kab heta było mirnym demakratyčnym šlacham, kab nie było krovapralićcia, kab nie była zahublena da kanca ekanomika krainy, kab kraina nie straciła daśviedčanych, adukavanych ludziej. Pamiataju, što ja ŭ niejki momant vyjdu razmaŭlać ź ludźmi ŭ pahonach taho boku. Siarod ich moža akazacca i Valfovič».
Pra syna, jaki słužyŭ u Siłach śpiecyjalnych apieracyj
Adzin z synoŭ Valeryja Sachaščyka na momant pačatku vajny słužyŭ u biełaruskim vojsku ŭ kamandavańni Sił śpiecyjalnych apieracyj. Kali pačałasia vajna, jon zdoleŭ vyjechać za miažu.
«Kali ŭ mianie ŭźnikła ideja vystupić z hetym zvarotam, ja ź im paraiŭsia. Jon skazaŭ, kali my prymali rašeńnie vystupać mnie ci nie, što prymie luboje majo rašeńnie, vajavać va Ukrainu jon nie pojdzie.
Jon mieŭ adpaviednuju padrychtoŭku, kab samastojna evakuiravacca», — kaža Sachaščyk.
Čytajcie taksama:
Mikita Miełkazioraŭ: My navučanyja ź dziacinstva, što jość jakasnaje ruskaje, a naša — nibyta parodyja na ŭsio
«Łukašenku varta nie zabyvać los Kadafi» — Ejdelman u Miełkaziorava
Ksiondz Barok daŭ intervju Miełkazioravu: «Nielha paraŭnovać Łukašenku z Satanoj»
Paśla danosu Bondaravaj raptoŭna admianili vystavu ŭ muziei Janki Kupały. Ciapier jana patrabuje na muziei šyldy pa-rusku29
Paśla danosu Bondaravaj raptoŭna admianili vystavu ŭ muziei Janki Kupały. Ciapier jana patrabuje na muziei šyldy pa-rusku
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu55
Kamientary