Anatol Laŭkovič: Kraŭčanka choča zachapić staršynstva ŭ BSDP
Staršynia Biełaruskaj sacyjał‑demakratyčnaj partyi Anatol Laŭkovič vystupiŭ z adkrytym listom da siabroŭ arhanizacyi.
Staršynia Biełaruskaj sacyjał‑demakratyčnaj partyi Anatol Laŭkovič vystupiŭ z adkrytym listom da siabroŭ arhanizacyi. U zvarocie Laŭkovič piša pra toje, što były ministr zamiežnych spravaŭ Piatro Kraŭčanka, karystajučysia ciažkim finansavym stanoviščam partyi, choča zachapić kiraŭnictva ŭ joj.
«Naša Niva»: Namiery Piatra Kraŭčanki sapraŭdy takija surjoznyja?
Anatol Laŭkovič: Sapraŭdy. Pracesy hetyja ŭnutry partyi pačalisia jašče paŭhodu nazad. My maŭčali, choć niešta i źjaŭlałasia ŭ presie. Viadoma ž, šyła ŭ miašku nie schavaješ. Čamu ja zaraz skazaŭ pra heta publična? Bo apošni CK partyi prachodziŭ z kankretnym parušeńniem statutnych normaŭ, kali biespartyjny sp.Kraŭčanka apłačvaŭ kvitki siabram CK. Ja źjaŭlajusia prychilnikam adkrytaj palityki. Tamu i rablu publičnuju acenku dziejańniaŭ sp.Kraŭčanki. Spadziajusia, što jon zrobić hetak sama. I spynić svaje padkilimnyja hulni.
«NN»: A vy sprabavali pahutaryć ź Piatrom Kuźmičom?
AŁ: Tak. My razmaŭlali ź im za paru tydniaŭ da pasiadžeńnia CK. Ja tady zapytaŭsia: «Piatro, kažuć, što ty źbiraješsia stać staršyniom BSDP i kandydatam u prezidenty, ci praŭda heta?» Adkazy na hetyja pytańni ja nie pačuŭ. A praź niejki čas jon źjaviŭsia na hetym pasiadžeńni. Kraŭčanka spadziajecca, kali partyja ŭ daŭhach, to jon zmoža skarystać situacyi.
«NN»: A moža Kraŭčanka nasamreč moža vyrašyć finansavyja pytańni?
AŁ:
Chaj jon skaža adkryta, što jon nam moža dać. Tady i my parazmaŭlajem. Zrazumiejcie, siońnia pierad mnoj staić zadača zachavać i ŭmacavać partyju. Ja chaču pieradać jaje ŭ dastojnyja maładyja ruki. U BSDP jość ludzi, jakija zmohuć uziać na siabie kiraŭnictva. A dośvied prychodu ludziej zboku ŭ nas užo byŭ — nie vielmi ŭdały. Kraŭčanka byŭ u śpisach partyi tolki dva hady (1994‑96). Ja razumieju, što dla jaho heta niešta čužoje i dalokaje. Jaki jon dośvied moža prynieści? Dośvied kamunistyčnaj partyi Savieckaha Cajuzu, u jakoj jon byŭ?Dyk my zmahalisia suprać toj ideałohii. Asabista ja znajomy ź Piatrom Kuźmičom ad 1974 hodu, kali jon čytaŭ mnie kursy na padrychtoŭčych kursach BDU. Niekali žyli ŭ adnym internacie na Śviardłova. U mianie niama absalutna nijakaj asabistaj niepryjaznaści da Kraŭčanki.
«NN»: U partyi havorać pra vyłučeńnie Kraŭčanki ŭ prezidenty?
AŁ: Tak, niekatoryja viciebskija sacyjał‑demakraty havaryli mnie, što lepšaj kandydatury za Kraŭčanku nie budzie. Ale čamu pra svaje ambicyi nie kaža sam Kraŭčanka, voś heta dla mianie zahadka.
Kamientary