Niepierakładalny BNB

27 kastryčnika prajšła prezientacyja Biełaruskaha niezaležnickaha błoku.

Pra stvareńnie nacyjanalnaj kaalicyi havaryli daŭno. Ale ci to vonkavyja faktary, ci žadańnie stvareńnia šyrokaha frontu pieramienaŭ na ŭzor Słavakii — ad kamunistaŭ da nacyjanalistaŭ, — spravie hetaj nie dapamahali.

Abjadnanyja demakratyčnyja siły, utvoranyja piać hadoŭ tamu, z rolaj apazicyjnaj kaalicyi spraŭlacca pierastali. Beenefaŭcy spračalisia z kamunistami, milinkievičaŭcy — ź libierałami i h.d.

Źmieny ŭ kiraŭnictvie BNF padšturchnuli da bolš chutkaha stvareńnia novaha błoku.

Jaho jadrom stali Ruch «Za svabodu», Partyja BNF i BCHD. Dałučylisia taksama mienšyja arhanizacyi — «Małady front», «Maładaja Biełaruś», «Pravy aljans», Ruch «Razam», MCHSS «Maładyja demakraty».

Padčas pieramovaŭ było pryniataje rašeńnie, što nazvaj novaha ŭtvareńnia stanie «Biełaruski niezaležnicki błok». Prezientacyja kaalicyi prachodziła 27 kastryčnika na Varvašeni, 8.

Žurnalistaŭ i prosta cikaŭnych pryjšło bolš za paŭsotni. Apošni raz stolki źbirałasia na Ŭpravie chiba što paśla vyzvaleńnia Alaksandra Kazulina.

Nad prezidyumam visieła emblema Biełaruskaha Narodnaha Frontu. «Vy b choć by pierapisali na BNB», — ci to žartam, ci to surjozna kazaŭ lider «Maładoha frontu» Źmicier Daškievič namieśniku staršyni BNF Iharu Lalkovu. «Nielha», — adkazaŭ toj.

Akazałasia, što možna. Praź niekalki chvilin «maładafrontaŭcy» źniali tuju emblemu i paviesili bieł‑čyrvona‑bieły ściah, bolš adpaviedny takoj padziei.

Pieršymi miesca ŭ prezidyumie zaniali Alaksandr Milinkievič i Źmicier Daškievič. Niechta z žurnalistaŭ na heta zaznačyŭ: «Vas tolki dvoje sieła, a miesca ŭžo amal niama. Kudy astatnich pasadzicie?» «U Administracyi prezidenta miesca bolej… I mebla lepšaja», — imhnienna adreahavaŭ druhi.

Čas pryjšoŭ, a mierapryjemstva nijak nie pačynałasia. «Vital, nu idzi ty ŭžo», — rezka huknuŭ Rymašeŭskaha Daškievič. Sustaršynia BCHD ž u hety čas mirna siorbaŭ harbatu i nie hladzieŭ na hadzińnik. Źviarnuła ŭvahu, što chadekaŭ pradstaŭlaŭ mienavita Rymašeŭski, a nie Sieviaryniec. Pavieł ścipła ŭsieŭsia ŭ zali.

Lider BNF Alaksiej Janukievič spaźniaŭsia, tolki pryjechaŭ z chaty na prezientacyju, bo hrypuje. Miesca zastavałasia tolki z samaha kraju stała. Zastavacca na pravach biednaha svajaka Janukievič nie zachacieŭ — pasunuŭ u kut Viačasłava Siŭčyka, a sam usieŭsia amal u centr.

I voś jon momant padpisańnia. Pieršym dekłaracyju ab stvareńni Biełaruskaha niezaležnickaha błoku padpisvaje lider «Maładoj Biełarusi» Artur Fińkievič.

«Heta histaryčnaja padzieja. Abjadnalisia tyja siły, jakija stajać na hruncie niezaležnaści. Nazva śviedčyć, što my abjadnoŭvajemsia nie na karotki termin», — kaža Alaksiej Janukievič.

Alaksandr Milinkievič, jaki nijak nie sprabavaŭ vyłučycca z padpisantaŭ (navat słova ŭziaŭ trecim), nahadaŭ, što błok taksama i prajeŭrapiejski. «Dla nas važny vybar dla Biełarusi. My chočam, kab adbyłasia jeŭrapieizacyja krainy.

Žurnalist rasijskaha «Kamiersantu» adrazu pacikaviŭsia, ci źbirajecca Milinkievič udzielničać u prezidenckich vybarach, namiakajučy, što kaalicyja stvoranaja akurat pad jaho.

«Ja hatovy być kandydatam ad hetaha błoku, heta surjoznaja siła, ale rašeńnie ab vyłučeńni jašče nie pryniaŭ.

Chto jašče moža dałučycca da BNB? Viaducca pieramovy z partyjami Šuškieviča i Navasiada, admoviłasia tolki AHP vusnami Anatola Labiedźki, byŭ adkaz.

Jakija akcyi, mierapryjemstvy rychtujecie? Pieršym mierapryjemstvam błoka budzie Biełaruski jeŭrapiejski forum 14 listapada.

Ci aznačaje stvareńnie BNB śmierć dla ADS? My chryścijanie, tamu nikoha zabivać nie źbirajemsia, adkazaŭ Rymašeŭski.

Pytańniaŭ akazałasia niašmat. Prezientacyja zaniała nie bolš za paŭhadziny. Paśla hetaha žurnalisty rasijskich vydańniaŭ doŭha spračalisia, jak pierakłaści nazvu kaalicyi. Syšlisia na tym, što jana budzie niepierakładalnaj. Nakštałt lejbarystaŭ «Ruchu» ci «Baćkiŭščyny». Čysta biełaruskaja realija.

• 0
• 0
• 0
• 0
• 0
• 0
• 0
• 0