Apieratar aeraporta Tbilisi admoviŭsia absłuhoŭvać samaloty «Biełavija». Što heta aznačaje?
Turecki mižnarodny apieratar aeraportaŭ TAV Airports admoviŭsia absłuhoŭvać samaloty avijakampanii «Biełavija» ŭ aeraporcie Tbilisi imia Šata Rustavieli. Nahadajem, što ŭ kancy studzienia WSJ paviedamiła, što ZŠA zapatrabavali ad Turcyi zabaranić paloty ŭ krainu avijakampanijam ź Biełarusi i z Rasii na samalotach Boeing, piša motolko.help.
Paźniej, 1 lutaha, tureckija vydańni paviedamili, što avijaapieratar Havaş, jaki źjaŭlajecca daččynaj kampanijaj TAV Airports, papiaredziŭ avijakampanii ź Biełarusi, RF i Irana, što jany nie buduć absłuhoŭvać samaloty Boeing i šerah Airbus. Paviedamlałasia, što ŭ «čorny śpis» na absłuhoŭvańnie trapiła bolš za 170 samalotaŭ, siem ź jakich — biełaruskija, heta značyć «Biełavii».
Što značyć «nie buduć absłuhoŭvać»?
Heta aznačaje, što kali, da prykładu, adzin ź siami samalotaŭ «Biełavija» prylacić u aeraporty, jakija absłuhoŭvaje Havaş, to hety apieratar nie budzie ich zapraŭlać, padavać trap, pravodzić paśla i pieradpalotny ahlad, techabsłuhoŭvańnie i ramont. Ale heta nie značyć, što samalotam ciapier zabaroniena prylatać u hetyja lotnyja havani.
I adrazu jašče adzin momant: aeraport Tbilisi nie ŭvachodzić u śpis aeraportaŭ Havaş. Jaho apieratar — hałoŭnaja tureckaja kampanija TAV Airports. Heta moža aznačać, što zabarona na absłuhoŭvańnie budzie pašyrana na ŭsie aeraporty, dzie apierataram vystupaje TAV ci jaje daččynyja kampanii.
Ci šmat aeraportaŭ u zonie adkaznaści TAV?
Pavodle sajta Havaş, jany źjaŭlajucca apieratarami 32-ch aeraportaŭ, bolšaść ź jakich znachodzicca ŭ Turcyi. Niepasredna TAV Airports kiruje jašče piatnaccaćciu aeraportami ŭ vaśmi krainach, i jany značna bujniejšyja.
Inšymi słovami, «Biełavii» admaŭlaje ŭ absłuhoŭvańni hałoŭny apieratar jak minimum 47-i aeraportaŭ. Kali ž vydzielić samyja bujnyja ź ich, to ŭ absłuhoŭvańni budzie admoŭlena ŭ aeraportach takich haradoŭ, jak
— Stambuł, Ankara i Antalija;
— Tbilisi i Batumi;
— Manaścir;
— Skopje;
— Miedzina;
— Ryha;
— Zahrab;
— Ałmaty;
Ale niechta ž budzie zapraŭlać tam ich samaloty?
Tak, ale kali zmohuć damovicca. Da prykładu, u Tbilisi pa siońniašni dzień samaloty «Biełavija» buduć absłuhoŭvać pradstaŭniki avijakampanii Georgian Airways. Ale, pa-pieršaje, heta peŭnyja niazručnaści dla «Biełavii». Pa-druhoje, jakaść absłuhoŭvańnia moža pahoršycca. Pa-treciaje, u niejkich aeraportach jany prosta nie znojduć zamieny TAV i nie zmohuć tudy latać.
Kamientary