Čamu biełaruskaja ptuška štohod lacić na zimoŭku na adzin i toj ža łapik ziamli na poŭdni Afryki?
Telehram-kanał «Dzikaja pryroda pobač» daviedaŭsia pra cikavuju historyju pra Ladu, samku — hibryda vialikaha i małoha arlacoŭ, jakaja hniazdujecca na našaj siaredniaj Prypiaci, a zimuje na poŭdni Afryki. Akazvajecca, zaŭsiody na adnym i tym ža miescy, i dla hetaha jość hruntoŭnyja pryčyny.
Niadaŭna ŭžo paviedamlałasia, što Lada adnoj ź pieršych pačała viasnovuju mihracyju i ŭžo vypraviłasia ŭ kirunku rodnaj Biełarusi. Ciapier jana nabližajecca da Uhandy.
A zimuje Lada kožny hod u Zambii, bolš čym za 8500 km ad radzimy. Miesca jaje zimoŭki — łapik ziamli płoščaj usiaho kala troch kvadratnych kiłamietraŭ.
Čamu Lada štohod vybiraje dla zimoŭki mienavita hetaje miesca?
Reč u tym, što na hetym kavałačku Zambii z metaj achovy dzikaj pryrody stvorany nacyjanalny park «Kasanka». I siudy na zimoŭku prylatajuć bolš za 10 miljonaŭ (!) palmavych kryłanaŭ, bujnych rodzičaŭ našych kažanoŭ.
Takaja vielizarnaja ščylnaść kryłanaŭ — sapraŭdny restaran dla mnostva drapiežnikaŭ. Vidać, dla našaj Lady taksama.
Lada prylataje ŭ Zambiju akurat u kancy kastryčnika — tady, kali palmavyja kryłany ŭžo na miescy. I mienavita ŭ kryłanavy les jana i lotała kožny dzień na praciahu amal usioj zimoŭki.
A ŭ druhoj pałovie lutaha Lada rušyła ŭ zvarotny šlach na poŭnač. I za jaje mihracyjaj možna sačyć na anłajn-karcie.
Čytajcie taksama:
Viasna idzie. Biełaruskija ptuški, na jakich ustalavanyja pieradatčyki, užo kirujucca z Afryki bližej da radzimy
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana13
Kamientary