Što za inicyjatyva błakuje kanały Azaronka i siłavikoŭ u siecivie i jak joj heta ŭdajecca
«Z našaha dośviedu, lahčej za ŭsio zabłakavać akaŭnt u tyktoku», — dzielicca kamanda «Stop Prapahanda». Adzin ź jaje ŭdzielnikaŭ raskazaŭ «Našaj Nivie», jak źjaviłasia inicyjatyva, jak pabudavanaja ich praca i kolki nieabchodna skarh dla vydaleńnia pasta ci kanała prapahandy.
«Patraciŭšy piać chvilin na dzień, kožny biełarus robić maleńki krok da pieramohi nad dyktaturaj»
Telehram-kanał «Stop Prapahanda» analizuje parušeńni praviłaŭ u sacsietkach. Paśla jany razdajuć zadańni padpisčykam, jakija skardziacca na pasty i kanały prapahandystaŭ.
Aproč ułasnych krynic dla manitorynhu, u inicyjatyvy jość forma, kudy luby žadajučy moža dasłać spasyłku na kanał abo asobny post.
«Usia praca pabudavanaja na padačy skarh, — raskazvaje adzin z udzielnikaŭ kamandy. — Nie varta dumać, što ŭ sacsietak jość usioviduščaje voka, jakoje adsočvaje parušeńni ŭ pastach, kamientaryjach i vydalaje ich. My nieadnarazova sutykalisia z vypadkami, kali jaki-niebudź brud moža visieć miesiacami i jaho nichto nie vydalaje, pakul nie paskardzišsia.
Tamu — skardziciesia i jašče raz skardziciesia na pasty z chiejtam, hvałtam, abrazami. Nie varta tracić siły na hnieŭnyja kamientaryi ci pavučańni pad takimi pastami».
Masavaść skarh palahčaje pracu.
«Naprykład, ukrainskija kalehi, jakija zajmajucca błakiroŭkami, majuć kala 300 tysiač padpisčykaŭ u kanale», — tłumačyć biełaruskaja inicyjatyvy, jakaja maje ŭ telehramie kala 4 tysiač padpisčykaŭ.
Kali niekalki dziasiatkaŭ tysiač skardziacca na adno i toje ž, sacsietki chutčej heta zaŭvažajuć.
«Taksama my źviartajemsia da inšych sposabaŭ błakavańnia, pra jakija, na žal, nie mahu raskazać. Heta sukupnaść jak techničnych srodkaŭ, tak i rozumu i zaciataści našych vałancioraŭ. Darečy, my ŭvieś čas nabirajem vałancioraŭ, paśla pravierki z radaściu prymajem u svaje rady. Jość navat čat, u jakim jość zadańni dla bolš vydaskanalenych i zaciatych baraćbitoŭ z prapahandaj.
Patraciŭšy piać chvilin na dzień na naša zadańnie, kožny biełarus robić svoj maleńki krok da pieramohi nad dyktaturaj».
Dakładnych instrukcyj nakont taho, kolki treba skarhaŭ na toj ci inšy post, niama, bo ałharytmy sacsietak časta źmianiajucca.
«Z našaha dośviedu, lahčej za ŭsio zabłakavać akaŭnt u tyktoku. U ich šyroki śpis parušeńniaŭ, dobra adhukajucca na skarhi. U nas atrymałasia damahčysia błakavańnia bolš za 60 pracentaŭ akaŭntaŭ u tyktoku, pa jakich my viadziom statystyku.
Havorać, što ŭ YouTube treba 10 tysiač skarh, kab pastavili kanał na ručnuju maderacyju. Ale, znoŭ ža, adna reč kanał na miljon padpisčykaŭ i zusim inšaja — na niekalki tysiač. Niadaŭna my dabilisia błakiroŭki ŭ jutubie kanała «Ja/MyOmon», u ich było kala 3,7 tysiačy padpisčykaŭ», — kaža pradstaŭnik inicyjatyvy.
Kanały vydalajuć radziej, čym pasty ŭ sacsietkach. Ale kamanda sprabuje znachodzić i inšyja kanały dla paśpiachovaj błakiroŭki.
Naprykład, akaŭnt «Žiełtyje ślivy» u tvitary byŭ vydaleny tolki paśla taho, jak adzin z vałancioraŭ ustupiŭ u pierapisku sa słužbaj padtrymki. Jon napisaŭ list z prykładami źnievažalnych i varožych vykazvańniaŭ u hetym akaŭncie.
«Što tyčycca kanałaŭ HUBAZ u telehramie, to tam nie tolki skarhi adyhrali rolu, — raskazvajuć. — Kanały pačali vydalać paśla taho, jak my prynialisia za biurakratyčnyja pracedury: jakasnaje napisańnie abhruntavańniaŭ ab parušeńniach. Ich adpraŭlali ŭ płej-markiety abo ŭ sacsietki pa ŭnutranych kanałach suviazi».
Kolki čałaviek u kamandzie i čamu prapahandysty zakryvajuć svaje sacsietki?
U kamandzie «Stop Prapahanda» pracujuć čatyry čałavieki. Niadaŭna da ich dałučylisia jašče niekalki vałancioraŭ.
«My ličym kamandaj usich našych padpisčykaŭ, — dadaje surazmoŭca. — Inicyjatyva vałanciorskaja, ale dziejnaść nazyvajem «pracaj», tamu što heta ŭžo častka našaha paŭsiadzionnaha žyćcia.
Paśla žniŭnia 2020 hoda ja zrazumieŭ, što kali b nie było stolki prapahandy z boku režymu, to padsiłkoŭvańnie dla siłavikoŭ adsutničała b, prychilnikaŭ łukašyzmu i ich upeŭnienaści ŭ pravilnaści svaich dziejańniaŭ taksama było b mienš.
Čałaviek schilny spažyvać infarmacyju, i kali jamu padsoŭvajuć lohki «fast-fud» z kožnaha prasa, to jon čaściej za ŭsio nie sprabuje razabracca dalej, navat kali hetaja infarmacyja supiarečlivaja.
Žychary Biełarusi i Rasii apracoŭvajucca prapahandaj 24 na 7. Adsiul i naradziłasia ideja, što treba niejak ź joj zmahacca. Treba vycisnuć prapahandu z pola zroku ludziej jaje zamiaščeńniem alternatyŭnymi krynicami, ale na heta patrebny značny resurs i kalektyŭ, my vyrašyli zmahacca ź joj takim sposabam».
U skarhaŭ moža być adkładzieny efiekt. Naprykład, YouTube paśla vydaleńnia jakoha-niebudź videa moža abmiežavać mahčymaść zahruzki novych na kanał, ale nie vydalać jaho.
«Niekatoryja ŭładalniki akaŭntaŭ robiać jaho pryvatnym paśla skarhaŭ ci navat prosta padčas vychadu samoha zadańnia na našym kanale, čaściej za ŭsio, heta ŭ tyktoku abo instahramie», — kaža pradstaŭnik inicyjatyvy.
Apošnim časam u kamandy «Stop Prapahanda» šmat pieramoh u tyktoku. Taksama jość zruchi ŭ telehramie.
«Vydalili kanały HUBAZika i prapahandysckaj haziety «Minskaja praŭda», pasty Ludmiły Hładkaj, Aleha Hajdukieviča.
Tut, chutčej, u cełym treba hladzieć na vynik dziejnaści. Navat kali ŭ nas niama dakładnaj pieramohi ŭ vyhladzie vydaleńnia kanałaŭ i akaŭntaŭ prapahandystaŭ, našy ruchi pryvodziać ich u stres. Jany vymušanyja zakryvać dostup da svaich resursaŭ, kab my nie zmahli nabrać tuju nieabchodnuju kolkaść skarh, jakija dazvolać sacsietcy adreahavać i zabłakavać ich.
Navat nievialikaja kolkaść skarhaŭ na ich akaŭnty sadziejničaje panižeńniu ŭ rejtynhu pošukavaj vydačy. I heta taksama zbolšaha pieramoha — ludzi mienš bačać prapahandu».
Čytajcie taksama:
Bajpoł nazvaŭ imiony mahčymych zabojcaŭ Andreja Zielcara. I zajaviŭ, što siłavika «Nirvanu» zastreliŭ svoj ža6
Kamientary
Oo...
nie. nie pojdu za nieho. śliškom niŝ