U Rasii vyjavili «ŭtojenuju» vajennuju śmiarotnaść na 3 tysiačy čałaviek u miesiac
Pa miery taho jak straty rasijskaj armii va Ukrainie množacca i, pavodle zachodnich źviestak, pieravysili 200 tysiač čałaviek zabitymi i paranienymi, u aficyjnaj statystycy Rasii źjaŭlajucca nieadpaviednaści ŭ padlikach kolkaści pamierłych u krainie, piša The Moscow Times.
Kožny miesiac rasijskija ZAHSy fiksujuć kala 2—3 tysiač śmierciaŭ, jakija paśla nie traplajuć u statystyku Rasstata, padličyŭ demohraf Alaksiej Rakša.
Tak, u studzieni Rasstat daŭ spravazdaču ab 168,4 tysiačy pamierłych u Rasii — na 12,7% mienš, čym u tym ža miesiacy hodam raniej.
Pry hetym, kali aryjentavacca na Adziny dziaržaŭny rejestr zapisaŭ aktaŭ hramadzianskaha stanu (ADR ZAHS), ličba, pavodle acenki Rakšy, składała b 170,9 tysiačy.
Hetaja roźnica ŭźnikaje štomiesiac i zaŭsiody ŭ adzin bok — Rasstat daje mienšuju ličbu, čym vynikaje sa źviestak ZAHSaŭ, padkreślivaje demohraf.
Nieadpaviednaść ličbaŭ stała prykmietaj mienavita vajennaha času. «Hod i bolš tamu takoj roźnicy nie było», — adznačaje Rakša.
«Prychavanaja» śmiarotnaść, jakuju bačać ZAHSy, ale nie Rasstat, blizkaja da kolkaści paćvierdžanych strat rasijskaj armii va Ukrainie: śpis, jaki pa paviedamleńniach u sacsietkach i aficyjnych zajavach viaduć «Miedyjazona» i Bi-bi-si, papaŭniajecca na 3,5—4 tysiačy čałaviek u miesiac. Realnaja ličba moža składać 7—9 tysiač štomiesiac, aceńvaje Rakša.
Ministerstva abarony RF tolki dvojčy za ŭvieś čas vajny ahučvała aficyjnuju acenku kolkaści zahinułych — pa stanie na 21 vieraśnia 2022 hoda heta było 5937 čałaviek.
Z ulikam paranienych i tych, chto trapiŭ u pałon, niezvarotnyja straty rasijskaj armii dasiahajuć 200—250 tysiač čałaviek, i heta bolš, čym va ŭsich vojnach z času zakančeńnia Druhoj suśvietnaj razam uziatych, padličyli ekśpierty amierykanskaha Centra stratehičnych i mižnarodnych daśledavańniaŭ (CSIS).
Siaredniamiesiačnyja rasijskija straty va Ukrainie, pa ich źviestkach, jak minimum u 25 razoŭ pieravyšajuć kolkaść zabitych u miesiac u Čačni i ŭ 35 razoŭ — u Afhanistanie.
Paśla zakančeńnia Druhoj suśvietnaj vajny bolš za ŭsio rasijskich vajskoŭcaŭ zahinuła ŭ Afhanistanie (14—16 tysiač, ale varta ŭličvać, što tam vajavali nie tolki rasijanie, a žychary ŭsiaho SSSR), u Čačni (12—25 tysiač), a taksama da poŭnamaštabnaha ŭvarvańnia va Ukrainu padčas bajoŭ na Danbasie (6—7 tysiač), piša CSIS.
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść32
Kamientary