Ad elity da izhojaŭ: z BT zvolnili čarhovaha łaŭreata konkursu «Televiaršynia»
Siłaviki ŭsio čaściej prychodziać da byłych i dziejnych supracoŭnikaŭ dziaržaŭnych telekanałaŭ, zapadozranych u niełajalnaści. Adnych paśla zatrymlivajuć, ź inšymi terminova raźvitvajucca na pracy.
Dniami supracoŭniki śpiecsłužbaŭ zajavilisia ŭ studyju na Makajonka, 9 i vyvieli adtul u kajdankach uhanaravanaha režysiora šmatlikich tranślacyj Andreja Pinčuka, piša BAŽ.
Pavodle abaznanych krynic, u vyniku abyšłosia biez zatrymańnia, ale paśla «prafiłaktyčnaj hutarki» Andrej Pinčuk vyjšaŭ užo ŭ statusie biespracoŭnaha. Najbolš vierahodnaj pryčynaj nazyvajuć kułuarnyja vykazvańni supracoŭnika BT, jakija nie ŭkładalisia ŭ ideałahičnaje rečyšča aficyjnaj palityki.
Andrej Pinčuk — adzin z samych daśviedčanych televizijnych admysłoŭcaŭ svajoj haliny, pra što śviedčyć i pasłužny śpis z adznačeńniem jaho zasłuh. Siarod inšaha, jon uładalnik prafiesijnaj premii «Televiaršynia-2012» u naminacyi «Najlepšy režysior spartyŭnych tranślacyj» za pakaz matčaŭ Lihi čempijonaŭ z udziełam futbolnaha kłuba BATE.
Taksama ad supolnaści kolišnich televizijnikaŭ stała viadoma pra zatrymańnie eks-mieniedžarki kanała «Biełaruś 2» Volhi Hładkaj.
U ofisie jana viała aficyjnaje spravavodstva, adsočvała vykanańnie damoŭ i h. d. Jana zvolniłasia ź Biełteleradyjokampanii ŭ vieraśni 2020 hoda, kab pasprabavać siabie ŭ śfiery IT. Adnak rašeńnie supała z masavymi pratestami suprać falsifikacyi vynikaŭ prezidenckich vybaraŭ i biespryčynnaha hvałtu siłavikoŭ, kali da pratestaŭ u vyhladzie strajku dałučylisia i mnohija supracoŭniki BT.
Pavodle najaŭnych źviestak, 7 sakavika adbyŭsia pieršy dopyt, a jašče praz dva dni Volzie Hładkaj vystavili papiaredniaje abvinavačańnie na padstavie «narodnaha» artykuła 342 Kryminalnaha kodeksa — udzieł u niesankcyjanavanych mierapryjemstvach.
Viadoma, što ciapier žančyna znachodzicca ŭ SIZA ŭ horadzie Žodzina.
Kamientary