«Addadziena kamanda na začystki». Karpiankoŭ raskazaŭ, jak siłaviki rychtujucca zmahacca z apazicyjaj
Unutranyja vojski praviali 24 sakavika na aeradromie Lipki śpiecyjalnyja vučeńni pa razhonie masavych pratestaŭ. Namieśnik kiraŭnika MUS — kamandujučy ŭnutranymi vojskami Mikałaj Karpiankoŭ raspavioŭ STB, jak i da čaho rychtujucca siłaviki.
Karpiankoŭ raspavioŭ, što siłaviki analizujuć dośvied vajennych dziejańniaŭ va Ukrainie. Źviarnuli ŭvahu na ŭžyvańnie bieśpiłotnych latalnych aparataŭ. U pačatku lutaha zahadam ministra ŭnutranych spraŭ u takich padraździaleńniach orhanaŭ unutranych spraŭ, jak AMAP, «Ałmaz», unutranyja vojski, stvorany śpiecyjalnyja padraździaleńni pa prymianieńni bieśpiłotnaj avijacyi.
«U nas jość drony, raźviedvalnyja ź ciepłavizaram, drony raźviedvalna-ŭdarnyja, jakija mohuć ažyćciaŭlać bombakidańnie. I ŭ nas užo jość drony-kamikadze, dastatkova vialikaja kolkaść.
Zaraz ažyćciaŭlajecca vialikaja zakupka, i litaralna za ličanyja tydni na ŭzbrajeńni ŭ nas budzie znachodzicca tysiača dronaŭ. Usich vajskoŭcaŭ, jakija ŭ nas zajmajucca bieśpiłotnaj latalnaj avijacyjaj, my adnieśli da katehoryi śpiecyjalnaha pryznačeńnia, da bajcoŭ śpiecyjalnaha pryznačeńnia.
I voś u hetych padraździaleńniach śpiecyjalnaha pryznačeńnia, jakija ŭ nas u vojskach stvorany, — 3214, padraździaleńnie «Ryś», padraździaleńnie «Bierkut», jakoje siońnia pracuje na miažy, plus dadatkova va ŭsich čaściach i złučeńniach my stvaryli roty i ŭzvody śpiecyjalnaha pryznačeńnia, — užo zjavilisia cełyja na hety momant siły chutkaha reahavańnia Ministerstva ŭnutranych spraŭ. U nas usiudy tam bieśpiłotnyja latalnyja aparaty», — raspavioŭ Karpiankoŭ.
Pavodle jaho, u Biełarusi stvaryli navučalny centr, zaprasili śpiecyjalistaŭ, jakija pryjechali z Danbasa i «samyja efiektyŭnyja taktyčnyja pryjomy pakazali».
Karpiankoŭ raspavioŭ, što na vučeńniach u Lipkach adpracoŭvali, jak dronami abśledavać kožny dach, kab nie «praziavać nijakaha snajpiera».
Taksama jon raskazaŭ, jak siłaviki rychtujucca zmahacca z kałonami pratestoŭcaŭ.
«Užyvańnie hazavych hranat, śviatłošumavych. U ich tam panika — i my hałavu hetuju «adrazajem» i ich zatrymlivajem. Takija sposaby my adpracoŭvajem. Ale na hety momant dron — samaja mocnaja, samaja mahutnaja zbroja, nie ŭvachodziačy ŭ kantakt, možna vykanać lubuju zadaču luboj składanaści. Heta latalny bojeprypas, jaki baražyruje i maje trajektoryju palotu chitrejšuju, čym u taho ž «Džavielina», i my ich navučylisia vykarystoŭvać i budziem dalej raźvivać».
Karpiankoŭ dadaŭ, što «paśla taho, što adbyłosia (vidać, paśla dyviersii ŭ Mačuliščach i vierahodnaj imitacyi padrychtoŭki terakta ŭ Hrodnie — NN), paśla ŭsich hetych zaklikaŭ pa viartańni i hetak dalej addadziena kamanda na začystki».
«U nas pracujuć usie śpiecpadraździaleńni kožny dzień. «Ryś» trenirujecca i pa adrasach zatrymlivaje. Ciapier «Bierkut» pracuje ŭ pamiežžy, kab nivodnaja myš tam nie praskočyła, kali tut na chvost kamuści nastupim, SACHR uvieś čas pracuje. Tamu siłaviki atrymali zadaču i ŭnutranyja vojski ŭ ramkach śpiecapieracyi, jakuju pravodzić MUS pa praviadzieńni začystki i naviadzieńni paradku, my heta robim», — skazaŭ jon.
«Miarkuju, što da kantrolnych dat my naviadziom paradak u našaj krainie. Hramadstva naša budzie kansalidavana», — paabiacaŭ Karpiankoŭ, nie nazvaŭšy hetyja «kantrolnyja daty».
Udava aktyvista Maksima Čarniaŭskaha raskazała pra jaho pakuty pierad suicydam5
Kamientary