Rasija, pavodle źviestak ZŠA, maje namier adpravić u Pchieńjan aficyjnuju delehacyju, kab prapanavać paŭnočnakarejskamu režymu charčavańnie, u jakim KNDR pastajanna maje patrebu, u abmien na ŭzbrajeńni, jakich nie chapaje Maskvie dla viadzieńnia vajny va Ukrainie.
Pra heta paviedamiŭ aficyjny pradstaŭnik Pientahona Džon Kirbi, pa słovach jakoha, lubaja ŭhoda pamiž Rasijaj i Paŭnočnaj Karejaj, jakaja ŭklučaje ŭzbrajeńni, stanie parušeńniem rezalucyi Rady Biaśpieki AAN, piša Bi-bi-si.
ZŠA i raniej abvinavačvali KNDR u pastaŭkach uzbrajeńniaŭ rasijskim vajskoŭcam i najmitam PVK «Vahnier», a Pchieńjan hetyja abvinavačańni niaŭchilna abviarhaŭ.
Jak zajaviŭ na pres-kanfierencyi Džon Kirbi, ciapier u ZŠA źjaviłasia novaja infarmacyja z nahody mahčymaj ździełki pamiž Maskvoj i Pchieńjanam.
«Nam viadoma, što Rasija maje namier adpravić delehacyju ŭ Paŭnočnuju Kareju i prapanuje joj pradukty charčavańnia ŭ abmien na bojeprypasy», — zajaviŭ jon.
Pa słovach Kirbi, ZŠA ŭvažliva sočać za raźvićciom situacyi i mahčymaj uhodaj.
Raniej u čaćvier Ministerstva finansaŭ ZŠA ŭžo ŭniesła ŭ čorny śpis hramadzianina Słavakii Ašota Mkrtyčava, jaki vystupaŭ pasiarednikam na pieramovach pamiž Maskvoj i Pchieńjanam. Pradstaŭniki viedamstva śćviardžajuć, što Mkrtyčaŭ užo arhanizavaŭ šerah ździełak, jakija dazvolili Paŭnočnaj Karei ŭ kancy 2022-ha — pačatku 2023-ha hoda adpraŭlać u Rasiju ŭzbrajeńnie ŭ abmien na valutu, hramadzianskija samaloty, tavary i syravinu.
Šukać na baku ŭzbrajeńni i bojeprypasy, hetak nieabchodnyja joj dla praciahu vajny va Ukrainie, Rasiju prymušajuć žorstkija sankcyi, uviedzienyja krainami Zachadu. Tamu Maskva ŭsio čaściej vymušanaja źviartacca pa dapamohu da niešmatlikich družalubna nastrojenych da jaje dziaržaŭ, jak KNDR i Iran.
Kamientary