Siońnia pavinna zavieršycca pravierka materyjałaŭ, źviazanych ź pierakryćciom čyhunki ŭ Barysavie padčas stychijnaj akcyi pratestu 6 červienia. Siońnia ž u Barysaŭ z rabočym vizytam prybyvaje premjer-ministar Biełarusi Siarhiej Sidorski. Ci źviazanyja hetyja padziei?
Nahadajem, u vyniku niadzielnaj zalevy adbyłosia padtapleńnie kala 50 damoŭ Zaliniejnaha mikrarajonu ŭ Barysavie. Kala 30-ci aburanych žycharoŭ pierakryli čyhunku, patrabujučy sustrečy z kiraŭnictvam miascovaj vertykali. U vyniku ruch ciahnikoŭ byŭ zatrymany ad 30 da 48 minut. Milicyjanty nikoha z udzielnikaŭ akcyi pratestu nie zatrymali i nie składali pratakołaŭ. Adnak materyjały pieradadzienyja ŭ transpartnuju milicyju. Siońnia jana musić pryniać rašeńnie pa hetaj spravie. Presavy sakratar upraŭleńnia ŭnutranych spraŭ na transparcie Alaksandar Palčynski skazaŭ:
(Palčynski: ) «Miarkujučy pa ŭsim, nijakich mieraŭ milicyja prymać nia budzie. To bok ludzi absalutna pravilna vykazvali niezadavolenaść i paličyli krajniaj mieraj vychad na puci. Pierakryćcio ruchu źjaŭlajecca peŭnym parušeńniem. Ale ŭličvajučy ŭsiu sytuacyju, materyjały buduć prosta śpisanyja».
Siońnia ž u Barysaŭ nakiroŭvajecca premjer-ministar Siarhiej Sidorski. Pavodle presavaha sakratara premjera Alaksandra Cimašenki, kiraŭnik uradu naviedaje tamtejšy kambinat chlebapraduktaŭ. Niaŭžo prablemy ŭdzielnikaŭ stychijnaha pratestu buduć pa-za jahonaj ŭvahaj?
(Cimašenka: ) «Premjer infarmavany pra hetuju sytuacyju. Nakolki jana budzie abmiarkoŭvacca, ja vam skazać nie mahu. Sytuacyja z prablemami padtapleńnia była dakładziena premjeru».
Pavodle žurnalista miascovaj hazety «Borisovskije novosti» Alesia Abramoviča, užo vydzialalisia hrošy na budaŭnictva barysaŭskaj damby. Pieršaja čarha ŭstupiła ŭ dziejańnie, ale jana nia maje sensu, bo abjekt pieratvaryŭsia ŭ daŭhabud. Ale pakul nichto z barysaŭskich vertykalščykaŭ nie paciarpieŭ z-za taho, što ludziej daviali da adčaju. Pavodle spadara Abramoviča, vizyt premjera ŭ Barysaŭ moža być źviazany ź niadaŭnim pratestam.
(Abramovič: ) «Ułady pierapałochalisia, tamu što heta nadzvyčajnaja padzieja. Heta prostyja ludzi, tam nichto z palitykaŭ, z apazycyjaneraŭ nie arhanizavaŭ hety vybuch. I heta napužała ŭładu, što heta stychijna adbyłosia. Jany bajacca łancuhovaj reakcyi».
