«Kali zusim nie ekanomić, to chopić na 2-3 hady». Ajcišniki raskazali, kolki zmohuć pražyć na svaich zapasach, kali prosta ciapier zastanucca biez pracy
Vydańnie CityDog.io raspytała biełaruskich ajcišnikaŭ, što žyvuć za miažoj, na kolki im chopić finansavych zapasaŭ, kali jany raptam zastanucca biez pracy. Adkazy atrymalisia vielmi roznymi.
Natalla (36 hadoŭ), QA-mieniedžarka
Natalla pierajechała ŭ Amieryku 6 hadoŭ tamu. Adkładaje hrošy z kožnaha zarobku, a zapasy dzielić na try častki: na piensiju, na čorny dzień i na kuplu nieruchomaści. Kaža, što štomiesiac imkniecca adkłaści kala 30% ad dachodu, ale nie zacyklivajecca na hetym.
Asobna zachoŭvajecca «paduška biaśpieki» na 6 miesiacaŭ kamfortnaha žyćcia, a jašče jość hrošy, jakija kudyści ŭkładzienyja i jakija možna lohka (ci nie vielmi) adtul dastać.
«Sioleta ja źjechałasia z bojfrendam, i ciapier značnuju častku atrymlivajecca ekanomić na arendzie kvatery. Da hetaha ja žyła adna i płaciła ŭ try razy bolš, čym ciapier. Atrymlivajecca, što raniej za arendu ja addavała 30% svajho dachodu, a ciapier tolki 10% — i dla Štataŭ heta vielmi maleńki pakazčyk. Zvyčajna ludzi traciać na žyllo 30-40%, a časam i da 60% ad zarobku.
Ciapier ja jakraz zastałasia biez pracy. Kali zusim nie ekanomić, to maich zapasaŭ chopić na 2-3 hady. Kali ekanomić usio ž taki daviadziecca, u pieršuju čarhu skarociacca vydatki na ałkahol, vychady ŭ bary i restarany. Potym budu kuplać mienš (ci ŭvohule nie kuplać) adzieńnia i niejkich pradmietaŭ dla domu.
Nastupnym punktam pierastanu padarožničać biez ahladki i chadzić na kancerty — a ja vielmi ich lublu i chadžu časta. Nu, a dalej užo pačnucca surovyja miery i ekanomija ŭ tym, kolki ja vydatkoŭvaju na zdaroŭje, masaž, chobi i navučańnie».
Maksim (33 hady), manualny teściroŭščyk
Maksim pierajechaŭ u Polšču paŭhoda tamu, i ciapier jahonaje finansavaje stanovišča nie vielmi — u pieršuju čarhu praz darahuju arendu žylla (u Biełarusi chłopiec žyŭ va ŭłasnaj kvatery).
«Doma ja adkładaŭ hrošy z kožnaha zarobku — nie fiksavanuju sumu, jak atrymlivałasia, ale ŭsio ž taki. Paśla pierajezdu ja tolki ŭ minułym miesiacy vyjšaŭ na bolš-mienš narmalny ŭzrovień dachodu, pry jakim možna było b sotku-druhuju adkłaści. Ale ŭžo ciapier ja viedaju, što chutka budu zvolnieny.
U teoryi maich zapasaŭ chopić prykładna na hod. Kali skaracić vydatki, to na dva. Ekanomić budu ŭ pieršuju čarhu na pachodach va ŭstanovy, zabaŭkach i pajezdkach. Chutčej za ŭsio, pakinu tolki samyja nieabchodnyja vydatki: arenda, prajezd i ježa».
Alesia (31 hod), Android Developer
Alesia razam sa svaim chłopcam pierajechała ŭ Polšču 8 miesiacaŭ tamu. Jany žyvuć bieź dziaciej i chatnich žyvioł. Kažuć, što da sakavika hetaha hoda hrošy naohuł nie adkładali i žyli biez «paduški biaśpieki».
«Hrošy, jakija my źbirali na pierajezd, vydatkavali ŭ pieršy ž miesiac — jašče daviałosia i pazyčać. Było vielmi šmat vydatkaŭ: arenda žylla, apłata pasłuh ryełtaraŭ, kaŭcyja (zakład za kvateru) — usio ŭ sumie jak arenda za try miesiacy.
Z saboj my pryvieźli tolki vopratku i abutak na siezon, tamu treba było zakupić jašče i roznych bytavych rečaŭ u kvateru, u tym liku i novy łožak dy matrac, bo ŭ mianie prablemy z chrybietnikam, a paśla snu na tym, što byŭ u kvatery pieršapačatkova, vielmi baleła śpina. Paźniej jašče kupili sabie televizar i robat-pyłasos.
Plus z kastryčnika pa luty my kožny miesiac vybiralisia kudy-niebudź u padarožža, na što taksama byli niemałyja vydatki.
A voś užo ŭ sakaviku my vyrašyli trochi prytarmazić i pačać źbirać «padušku biaśpieki». Chočam adkładać hrošy z kožnaha zarobku — na novyja vandroŭki i prosta tak. Praź niekalki hadoŭ možna ŭziać ipateku.
Ja pa svajoj natury marnatraŭca, hrošy ŭ mianie ŭ rukach doŭha nie zatrymlivajucca. Tamu svajoj teoryi pra toje, jak i kolki treba adkładać, u mianie niama. Chłopiec u hetaj spravie bolš adkazny, i ŭ našaj pary abaviazak sačyć za finansami vypaŭ jamu. Pakul płanujem adkładać minimum piatuju častku našaha sumiesnaha dachodu.
U vypadku, kali raptam my abodva zastaniemsia biez pracy prosta ciapier, to, jak by mocna my ni ekanomili, hrošaj nam chopić prykładna na miesiac. Kali biez zarobku budzie chtości adzin, to pryjdziecca, viadoma, pačać trochi ekanomić. U pieršuju čarhu budziem zrazać vydatki na zabavy, pachody ŭ kaviarni i chaciełki, bieź jakich možna pražyć: naprykład, novaja darahaja nastołka ci darahi pradmiet harderobu.
Pry hetym, niahledziačy na situacyju ŭ IT ciapier, u nas abaich usio dosyć stabilna. Tamu, što chtości moža zastacca biez pracy, mocna nie pieražyvajem».
Dźmitryj (31 hod), inžynier-prahramist
Dźmitryj pierajechaŭ u Polšču bolš za hod tamu i žyvie adzin. Kaža, što hrošy adkładaje z kožnaha zarobku — i ciapier ich nazapasiłasia ŭžo stolki, što chopić na niekalki hadoŭ napierad. Kali zusim pryciśnie, to ekanomić pačnie ŭ pieršuju čarhu na padarožžach.
«Isnuje teoryja, što adkładać treba maksimalna mahčymuju kolkaść finansaŭ. A kali chočacca, kab kapitał ros, to jašče i inviestavać. Praŭda, pakul niama ŭłasnaha žylla, inviestavać nie varta — inakš možna zastacca pad mostam biez štanoŭ. A voś jak pry ŭsim pry hetym žyć siońniašnim dniom — pytańnie, na jakoje ŭ mianie niama adkazu…»
Što datyčyć zachoŭvańnia, to hrošy ŭ Dźmitryja «čort viedaje dzie»: najaŭnyja ŭ roznych miescach, na rachunku ŭ banku, u akcyjach, a niejkaja častka naohuł u mašynie (jak układańnie)».
Kamientary
Vsie dołžny chvaliť caria, potomu čto on iz kormit. Nie sami ludi zarabatyvajut dieńhi, a caŕ dajot.