Ahnieška Ramašeŭskaja‑Huzy, dyrektarka telekanału «Biełsat», ź niedavieram stavicca da rašeńnia pra akredytacyju «Jeŭrapiejskaha radyjo dla Biełarusi» ŭ Minsku:
«Akredytacyja «Jeŭrapiejskaha radyjo dla Biełarusi» — heta krok u patrebnym kirunku, ale bajusia, što heta tolki pałavinny srodak. Heta adbyvajecca za niekalki dzion da čarhovaha razhladu Jeŭraźviazam pytańnia skasavańnia vizavych sankcyjaŭ dla biełaruskich čynoŭnikaŭ».
Kiraŭnica niezaležnaha telekanału źviartaje ŭvahu i na inšy aśpiekt hetaha rašeńnia:
«Na maju dumku, rehistracyja adnaho ź niekalkich niezaležnych apazicyjnych miedyjaŭ u Biełarusi —
heta taksama sproba padzialić žurnalisckaje asiarodździe na lepšych i horšych.
Heta standartnyja, viadomyja zdaŭna mietady dziejańnia aŭtarytarnych uładaŭ».
***
Ułady Biełarusi dva razy admovili ŭ rehistracyi telekanału «Biełsat». U sakaviku 2009 h. Ministerstva zamiežnych spravaŭ Respubliki Biełaruś paličyła, što zajaŭka, składzienaja telekanałam, patrabuje dadatkovych dakumientaŭ. Pry hetym ministerstva spasyłałasia na «Pałažeńnie ab paradku adkryćcia ŭ Biełarusi karpunktaŭ zamiežnych ŚMI», zaćvierdžanaje Savietam Ministraŭ Biełarusi 25 śniežnia 2008 h. — praz try dni paśla pryniaćcia dakumientaŭ telekanału Ministerstvam zamiežnych spravaŭ.
U lipieni 2009 h. MZS Biełarusi jašče raz adchiliła zvarot «Biełsatu», śćviardžajučy, što nie chapaje adnaho z patrebnych dakumientaŭ. «Biełsat» nie adstupiŭsia i padaŭ dakumienty čarhovy raz 9 kastryčnika. 6 śniežnia skančajecca termin, ciaham jakoha ŭłady Biełarusi majuć pryniać rašeńnie pra akredytacyju telekanału «Biełsat». Admova ŭ rehistracyi karpunktu moža aznačać dalejšuju adsutnaść žurnalisckich akredytacyjaŭ i surjoznyja składanaści ŭ pracy telekanała.
Varta nahadać, što ŭ kastryčniku 2008 h. Jeŭrapiejski parłamient zaklikaŭ Jeŭrapiejskuju kamisiju spryjać tamu, kab urad našaj krainy «pryśpiešyŭ praces aficyjnaje rehistracyi «Biełsatu» ŭ Biełarusi».
