Ilustracyjny zdymak. Fota: vecteezy.com
«Ciapier mnohija kliniki pierajšli na rasijskija preparaty, ale jany takija drennyja, što serca žyvioliny moža praz 20 chvilin paśla śmierci znoŭ pačać bicca», — piša čytač «Jeŭraradyjo» i zapeŭnivaje, što bačyŭ heta na svaje vočy.
Ale doktar-vieterynar zapeŭnivaje, što «ažyć» paśla eŭtanazii žyviolina nie moža. Zatoje ŭładalniki hadavanca mohuć niapravilna traktavać niekatoryja pracesy, jakija adbyvajucca ŭ arhaniźmie paśla śmierci.
Naprykład, mohuć ździmacca lohkija, a čałaviek vyrašyć, što jaho hadavaniec padaje prykmiety žyćcia.
Na čym mohuć pasprabavać ekanomić niadobrasumlennyja kliniki?
Prablema moža być nie ŭ tym, jaki preparat uvodziać žyviolinie padčas eŭtanazii, a ŭ tym, ci karektna pravodzicca pracedura.
— Pry pravilnaj pracedury žyviolinie ŭvodziać narkoz, i jana zasynaje hłybokim snom. A potym unutryvienna ŭvodzicca preparat, jaki spyniaje pracu sardečnaj myšcy, — tłumačyć vieterynar.
U Biełarusi ŭ pryvatnych klinikach u bujnych haradach pracedura vykonvajecca humanna. Našy pryvatnyja kliniki aryjentujucca na zachodnija technałohii. Navat kali daktary-vieterynary prachodziać navučańnie ŭ Rasii, jano zasnavanaje na daśledavańniach ZŠA i jeŭrapiejskich krain, tłumačyć vieterynar.
A jak vyhladaje niehumannaja eŭtanazija?
— Da mianie dachodzili čutki ad adnahrupnikaŭ: časam u dziaržklinikach, dzie jany prachodzili praktyku, žyviolinie prosta ŭkołvali preparat, jaki vyklikaŭ spynieńnie sardečnaj myšcy. Žyviolinu pry hetym nie pahružali ŭ son. Hety preparat pryvodzić da śmierci, ale ŭ pracesie žyviolina prachodzić usie jaje stadyi: ad straty prytomnaści da ahonii. Dumaju, niekatoryja kliniki mohuć tak pastupać dziela ekanomii preparataŭ.
A jość preparaty, jakija abiazrušvajuć žyviolinu, ale nie pahružajuć u son. I tady hadavaniec, choć i nie ruchajecca, praciahvaje ŭsio adčuvać.
Tamu ŭ bolšaści pryvatnych klinik uładalniku chatniaj žyvioliny dazvalajuć prysutničać padčas eŭtanazii hadavanca.
— Paśla taho jak žyviolina pahruziłasia ŭ son, u jaje nie pavinna być nijakaj reakcyi na vonkavyja razdražnialniki. Jana nie pavinna ruchacca ci vydavać huki, zrenki nie pavinny reahavać na śviatło. Kali serca žyvioły spyniłasia, čakajuć jašče niekalki chvilinaŭ. Tolki paśla hetaha možna kanstatavać, što nastupiła kliničnaja śmierć.
Nielha paprasić ab eŭtanazii, kali nie chočacca tracicca na lačeńnie
Doktar padkreślivaje, što hetaja pracedura — krajniaja miera. Jaje dazvalajuć tolki dla žyvioliny ź nievylečnym dyjahnazam, kab palehčyć jaje pakuty.
— Ale kali chvaroba paddajecca lačeńniu, a ŭładalnik prosta nie choča zajmacca zdaroŭjem svajho hadavanca, daktary admaŭlajucca pravodzić eŭtanaziju, bo ŭ takim vypadku heta prosta pazbaŭleńnie žyvioliny žyćcia. Rašeńnie prymaje doktar, a nie ŭładalnik žyvioliny.
Surazmoŭca pryznaje, što i dla samich vieterynaraŭ heta maralna składanaja pracedura. Bo mnohija ź ich pryviazvajucca da hadavancaŭ svaich klijentaŭ, asabliva kali havorka idzie pra adkaznych uładalnikaŭ, jakija zaŭsiody padtrymlivajuć suviaź z doktaram.
Čytajcie taksama:
