Były mer Hrodna Miečysłaŭ Hoj. Skrynšot videazvarotu ŭ žniŭni 2020-ha
Pachodzić z samaha polskaha rajona Biełarusi
Miečysłaŭ Branisłavavič Hoj byŭ meram Hrodna z 11 žniŭnia 2014-ha. Sam jon rodam ź vioski Šłaviency Voranaŭskaha rajona Hrodzienskaj vobłaści. Kala 80% nasielnictva hetaha rajona składajuć etničnyja palaki.
Ličyć sabie 59-hadovy Miečysłaŭ Hoj palakam ci nie, dakładna nieviadoma, ale blizki da siłavikoŭ telehram-kanał «Hrodzienskija źlivy» nie saromieŭsia publikavać dopisy ŭ bok čynoŭnika, jakija prynižajuć pa nacyjanalnaj prykmiecie.
Tak, naprykład, možna adšukać dopis za śniežań 2019 hoda, dzie jaho paprakali za toje, što jon prapanuje pradać budynak byłoha hrodzienskaha piŭzavoda nie kamu-niebudź, a mienavita polskim inviestaram.
Prylatała Hoju i za kamunikacyju ź niezaležnymi miedyja i aktyvistami.
Adstaŭka Hoja — śviata dla Bondaravaj
Ale kudy bolš uvahi asobie ŭžo byłoha mera nadavała prarasijskaja błohierka Volha Bondarava. Jana časta publična niehatyŭna vykazvałasia ŭ adras Hoja i nie traplała pad represii za hetu krytyku.
Prarasijskuju aktyvistku viernie nie tolki ad usiaho biełaruskaha, ale i, naturalna, ad usiaho polskaha. U svaim kanale jana publikavała dopisy sa zdymkami nadmahilnych pomnikaŭ, šyldaŭ i darožnych znakaŭ, na jakich prysutničali nadpisy na polskaj movie, i dakarała za ich «pana Hoja», jak jana nazyvała čynoŭnika.
Čynoŭnik čaściakom patraplaŭ pad razdaču ad Bondaravaj, ale praz toje, što telehram čas ad času vydalaje jaje kanały, adnavić usio karcinu niemahčyma.
Zrešty, chapaje i śviežych dopisaŭ.
Litaralna za dzień da źniaćcia Hoja z pasady Bondarava aburałasia, što novamu ŽK u Hrodnie dali nazvu ŭ honar karalevy Bony Sforca.
Palivańnie brudam postaci karalevy skončyłasia nastupnymi słovami: «Padobna, Hoj kančatkova vyznačyŭsia ź jurysdykcyjaj Hrodna. I heta nie RB», — napisała infakazačka ŭ svaim kanale.
Užo paśla taho, jak stała viadoma, što Hoj bolš nie budzie meram, jana nazvała nadańnie novamu ŽK imia Bony prapolskaj pravakacyjaj.
Na dumku amatarki ruskaha śvietu, heta było ništo inšaje, jak «hučnaje lapańnie dźviaryma zrušanaha z pasady hrodzienskaha mera».
Źniaćcie Miečysłava Hoja z pasady mera stała dla Bondaravaj padziejaj radasnaj i doŭhačakanaj.
Infakazačka napisała, što ŭ jaje pamiaci Hoj zastaniecca meram, jaki prymusiŭ siłavikoŭ vybačacca pierad «bečebiesami» i vypuściŭ usich «dziaržpieravarotčykaŭ». Da dopisu jana prymacavała videatranślacyju ź mitynhu ŭ Hrodnie 12 žniŭnia 2020 hoda, na jakim kiraŭnictva horada vyjšła na dyjałoh z pratestoŭcami.
Vyjšaŭ da narodu na płošču
Vystup na tym mitynhu Hoja i sam fakt taho, što miascovyja ŭłady pajšli na sastupki i, prynamsi, rabili vyhlad, što namahajucca vieści dyjałoh z pratestoŭcami, zapomniŭsia nie tolki Bondaravaj, ale i haradžanam.
Bližej da kanca sustrečy Hoj dziakavaŭ hrodziencam za toje, što akcyi pierajšli ŭ mirny dyjałoh.
«Jak by tam ni było, heta mirny dyjałoh biez zatrymańniaŭ, biez krovapralićciaŭ. Ja vam jašče raz paŭtaraju — harantuju biaśpieku, ale z vašaj dapamohaj, što ŭ nas buduć prachodzić narmalnyja mirnyja mitynhi biez usialakich parušeńniaŭ», — kazaŭ tady Hoj.
Dalej Hoja spytali, ci pryznaje asabista jon toj fakt, što vybary byli sfalsifikavanyja. Na što jon adkazaŭ, što sumlennaść vybaraŭ aceńvaje CVK.
Paśla adkazu na hetaje pytańnie Hoj syšoŭ z płoščy pad vokličy «zdradnik naroda» i «sychodź».
Ci dziakujučy Hoju Hrodna na niekalki dzion staŭ volnym horadam?
Tym nie mienš Hrodna na niekalki dzion staŭ adzinym horadam, dzie ŭłady dazvolili pravodzić mitynhi. Ale «adliha» doŭžyłasia niadoŭha. Z 20 žniŭnia mitynhi znoŭ akazalisia pa-za zakonam.
Niekatoryja ličać, što Hrodna tady staŭ volnym na niekalki dzion horadam mienavita dziakujučy Miečysłavu Hoju. Ale hrodzienski žurnalist Rusłan Kulevič u intervju «Našaj Nivie» vykazvaŭ mierkavańnie, što dazvolić mitynhi navažyŭsia tahačasny staršynia Hrodzienskaha abłvykankama Uładzimir Kraŭcoŭ, za što jon i byŭ źniaty z pasady ŭžo 22 žniŭnia 2020 hoda.
Kulevič kazaŭ, što, pa jahonaj infarmacyi, u vykankamie navat chadzili čutki, što pry sustrečy z Kraŭcovym Łukašenka daŭ jamu aplavuchu za toje, što toj dazvoliŭ pravodzić mitynhi.
Niekatoryja haradziency z sumam zhadvajuć tuju sustreču z meram na płoščy ŭ žniŭni 2020-ha. Častka ludziej ličyć, što pierajdzi tady Miečysłaŭ Hoj na bok naroda, revalucyja 2020 hoda mahła zajmieć całkam inšy vynik, bo taki krok čynoŭnika vysokaha ranhu moh by pasłužyć šturškom dla inšych. Ale ŭ vyniku Miečysłaŭ Hoj zastaŭsia vierny režymu Łukašenki.
Tym nie mienš mnohija haradžanie, ź jakimi my abmiarkoŭvali jahonuju asobu, adznačali, što jon byŭ niebłahim pa biełaruskich mierkach čynoŭnikam, jaki moh iści na kantakt z pradstaŭnikami biznesu i prostymi hramadzianami.
Patelefanavać meru moh nie tolki žurnalist Kulevič, ale i viadomy hrodzienski błohier Vadzim Jermašuk (Vadimati). Kulevič vyjechaŭ ź Biełarusi i ciapier žyvie ŭ Polščy, a Jermašuku ŭ śniežni 2021 hoda prysudzili try hady źniavoleńnia — jaho abvinavacili ŭ «abrazie Łukašenki» i «ździeku ź dziaržaŭnych simvałaŭ».
