Łatuška raskazaŭ, jak łukašenkaŭskija deputaty sprabavali asprečyć sankcyi, uviedzienyja suprać ich
Dniami stała viadoma, što deputaty Pałaty pradstaŭnikoŭ Nacyjanalnaha schodu Śviatłana Lubieckaja i Alaksandr Amieljaniuk sprabavali asprečyć sankcyi, jakija Jeŭrapiejski sajuz nakłaŭ na ich 21 červienia 2021 hoda. Adnak Jeŭrapiejski sud u Luksiemburhu pastanaviŭ adchilić pazoŭ i abaviazaŭ ich apłacić vydatki adkazčyka. Pradstaŭnik pa tranzicie ŭłady Abjadnanaha pierachodnaha kabinieta Pavieł Łatuška ŭ kamientary «Našaj Nivie» raskazaŭ, jak deputaty sprabavali apraŭdacca ŭ sudzie. A taksama prakamientavaŭ sankcyi, jakija ŭviała Polšča.
Jak apraŭdvalisia deputaty
Jak raskazvaje Łatuška, arhumienty łukašenkaŭskich deputataŭ pierad Jeŭrapiejskim sudom byli takija: maŭlaŭ, zakon, jaki jany raspracavali, prymianiajecca sudździami, tamu parušeńni pravoŭ čałavieka — nie ich vina.
Sud ES u svaju čarhu nie pahadziŭsia z hetym: paśla pravak u zakony, jakija ŭchvalili deputaty, maksimalny termin administracyjnaha aryštu pavialičany ŭ dva razy, a štrafy pavialičany bolš jak u try razy.
«Taksama paśla ŭstupleńnia papravak u siłu pavialičyłasia kolkaść zatrymańniaŭ. Bolš za toje, mierkavańnie Vieniecyjanskaj kamisii było nie na karyść nazvanych papravak. U vyniku Sud ES vyrašyŭ, što papraŭki sadziejničali pryhniotu ludziej za ich palityčnyja pohlady i parušeńniu pravoŭ čałavieka.
Uvohule nie zrazumieła, na što raźličvali hetyja ludzi, źviarnuŭšysia ŭ Sud ES i sprabujučy asprečyć rašeńnie Rady ES? Rada ES uviała sankcyi ŭ dačynieńni da tak zvanych deputataŭ za toje, što jany byli adkaznyja za raspracoŭku papravak u Kodeks ab administracyjnych pravaparušeńniach Respubliki Biełaruś, što sadziejničali zamacavańniu parušeńniaŭ pravoŭ čałavieka ŭ krainie», — kaža jon.
Inšy arhumient deputataŭ hučaŭ tak: papraŭki prymalisia Nacyjanalnym schodam Biełarusi, a nie imi asobna. A sankcyi ŭjaŭlajuć saboj formu kalektyŭnaj adkaznaści ŭ ich vypadku.
Sud ES u svaju čarhu nie pahadziŭsia z hetym arhumientam, bo zajaŭniki prymali niepasredny ŭdzieł u raspracoŭcy papravak u KaAP.
«Ich pasady śviedčać ab ich upłyvie na hety praces, i, bolš za toje, u pracesie raspracoŭki papravak jany ad ich nie dystancyjavalisia. Ale tut ja mahu častkova pahadzicca ź Lubieckaj i Amieljaniukom, bo prymali drakonaŭskija zakony ŭsie deputaty i siabry tak zvanaha Savieta Respubliki. Prykład Lubieckaj i Amieljaniuka — heta sihnał usim čynoŭnikam režymu, što jany sami buduć sačyć za tym, kab da adkaznaści razam ź imi byli pryciahnutyja ŭsie ich kalehi i kab nichto nie zastaŭsia niezaŭvažanym», — adznačaje palityk.
Pamier vydatkaŭ, jakija pavinny spłacić deputaty, vyznačaje Sud ES.
«U ES bok, jaki prajhraŭ, apłačvaje nie tolki vydatki suda, ale i raschody na advakataŭ boku, jaki vyjhraŭ. Rada ES pieradaść u sud rachunki svaich vydatkaŭ. I sud tady vyznačyć, u jakim abjomie apłačvać (zvyčajna nie poŭnuju sumu).
Mahčyma, spahnańnie budzie za košt majomaści ŭ ES. Pa idei biełaruskija sudovyja vykanaŭcy tearetyčna mahli b vykanać rašeńnie Suda ES na terytoryi Biełarusi, ale my ŭsio razumiejem, što nie pry ciapierašniaj nielehitymnaj uładzie heta budzie», — padsumoŭvaje palityk.
Jak składali śpisy i kaho jašče płanujuć uklučać
Učora stała viadoma, što Polšča ŭviała sankcyi suprać 365 biełaruskich čynoŭnikaŭ, siłavikoŭ i supracoŭnikaŭ dziaržaŭnych miedyja, adkaznych za palityčnyja represii ŭ Biełarusi ŭ suviazi z prysudam žurnalistu i polskamu aktyvistu Andreju Pačobutu.
Pavieł Łatuška adznačyŭ, što kankretna hetyja ludzi byli ŭniesienyja ŭ sankcyjnyja śpisy, bo ŭ ich dziejańniach bačycca skład złačynstva abo inšaje parušeńnie jak nacyjanalnaha, tak i mižnarodnaha prava.
«Heta i sudździ, jakija vynosili zahadzia niepravasudnyja i palityčna matyvavanyja vyraki, heta i prapahandysty, jakija raspalvali varažnieču pamiž narodami, raspaŭsiudžvali nianaviść i chłuśniu, heta i tak zvanyja deputaty, jakija prymali dyskryminacyjnyja zakony, što supiarečać Kanstytucyi i normam mižnarodnaha prava, bazavym pravam čałavieka, heta i čynoŭniki ź siłavikami, jakija vykonvali złačynnyja zahady», — kaža Pavieł Łatuška.
Rašeńnie ab uklučeńni ŭ sankcyjny śpis prymaje vyklučna polski ŭrad.
«My sa svajho boku aproč śpisa ź imionami i proźviščami padzialilisia z našym polskim partnioram abhruntavańniem vyznačeńnia abmiežavańniaŭ na tych ci inšych asob (padrabiaznyja fakty parušeńniaŭ prava i ich analiz ź jurydyčnaha punktu hledžańnia).
Taksama pry dapamozie našych kaleh z «Bajpoł» udałosia sabrać piersanalnyja źviestki hetych ludziej. Paśla čaho padrychtavanyja i naležnym čynam aformlenyja sankcyjnyja śpisy (201 proźvišča ŭ adnym pakiecie) byli pieradadzienyja ŭ Ministerstvy zamiežnych i ŭnutranych spraŭ Polščy dla razhladu i pryniaćcia rašeńnia. Potym my dadatkova jašče nakiroŭvali imiony, usiaho ahułam kala 340 proźviščaŭ atrymałasia. Dumaju, što ŭviadzieńniem sankcyj MUS Polščy dała adznaku praviedzienaj nami pracy», — raskazvaje palityk.
Jakich asob mohuć u nastupny raz uklučyć u sankcyjnyja śpisy? Palityk adznačaje supracoŭnikaŭ izalataraŭ i kałonij, dzie časta parušajucca pravy.
«I heta tyčycca nie tolki sankcyj, ale buduć zadziejničany i inšyja miechanizmy, takija jak mižnarodnaja kryminalnaja jurysdykcyja i navat śpiecyjalny trybunał pa złačynstvach suprać čałaviečnaści», — kaža Pavieł Łatuška.
Papularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»19
Kamientary