PVK «Vahnier» padčas uzbrojenaha sutyknieńnia z rasijskimi sałdatami zachapiła ŭ pałon padpałkoŭnika armii RF i prymusiła jaho vybačacca na videa

Pra heta 4 červienia paviedamiła pres-słužba kiraŭnika PVK «Vahnier» Jaŭhiena Pryhožyna ŭ svaim telehram-kanale, pakazaŭšy aficyjny rapart z apisańniem incydentu.

Paźniej u toj ža dzień pres-słužba Pryhožyna vykłała videa z pałonnym rasijskim padpałkoŭnikam, u jakim toj padčas dopytu pryznaje vinu za napad jaho sałdat na «vahnieraŭcaŭ», bo sam byŭ u toj momant «u stanie ałkaholnaha apjanieńnia» i pry hetym adčuvaŭ «asabistuju varožaść» da najmitaŭ.

«Ja, padpałkoŭnik Vieniavicin Raman Hienadźjevič, kamandzir 72-j bryhady, sa svaimi padnačalenymi ŭ stanie ałkaholnaha apjanieńnia i z-za asabistaj varožaści razzbroiŭ adnu z hrup PVK «Vahnier» i abstralaŭ ich mašynu. Ja vinavaty», — skazaŭ padpałkoŭnik Vieniavicin na videa.

Pryčynu svajoj varožaści da najmitaŭ jon padčas videa nie ahučyŭ, ale pry hetym pahadziŭsia z «vahnieraŭcam» za kadram, što «na vajnie asabistaj varožaści być nie pavinna».

Zychodziačy z apublikavanaha raparta i videa, sam kanflikt pamiž rasijskimi najmitami i sałdatami rehularnaj armii vyhladaŭ tak: jašče 17 maja pry adviadzieńni svaich sił z Bachmuta najmity PVK «Vahnier» zaŭvažyli, što na ich šlachu ŭžo zvyčajnyja rasijskija sałdaty ŭstaloŭvajuć miny (pra što niekalki dzion tamu zhadvaŭ sam Pryhožyn).

Zatym «vahnieraŭcy» vyrašyli abiasškodzić hetyja miny, za što narvalisia na abstreł z boku 72-j motastrałkovaj bryhady Minabarony Rasii, jakoj kiravaŭ padpałkoŭnik Vieniavicin. Pa jaho zahadzie była abiazzbrojena adna z hrup chutkaha reahavańnia «Vahniera» i prabity ruchavik adnaho słužbovaha aŭtamabila. U adkaz najmity ŭstupili ŭ karotki boj z rasijskimi sałdatami i zachapili ich razam z kamandziram.

Infarmacyja ab paranienych ci zabitych padčas taho ŭzbrojenaha sutyknieńnia pakul što nie źjaŭlałasia. 

Va ŭsioj hetaj historyi charakterna toje, što najmity pryvatnaj vajskovaj kampanii, isnavańnie jakich z punktu hledžańnia rasijskaha zakanadaŭstva źjaŭlajecca niezakonnym, mała taho što vajujuć na pieradavoj, dyk jašče i ŭstupajuć u pramoje ŭzbrojenaje sutyknieńnie z sałdatami rasijskaj rehularnaj armii, zachoplivajuć u pałon staršaha aficera Minabarony i vystaŭlajuć jaho ŭ nieprystojnym vinavatym vyhladzie na ŭsieahulny ahlad. Jak heta patłumačyć i jakoj budzie reakcyja Minabarony i Kramla?

Nahadajem, što pamiž Pryhožynym razam z «Vahnieram» i Minabarony Rasii ŭžo praciahły čas raźvivajecca kanflikt praz toje, chto bolš efiektyŭna vajuje suprać Ukrainy. Adnym z samych jarkich epizodaŭ hetaha supraćstajańnia byŭ zvarot Pryhožyna ŭ mai, padčas jakoha toj pakazvaŭ vielizarnuju kolkaść trupaŭ «vahnieraŭcaŭ» i vinavaciŭ u hetym kiraŭnictva Minabarony, patrabujučy ad jaho bojeprypasaŭ dla viadzieńnia vajny.

Aproč taho, zusim niadaŭna najmity Jaŭhiena Pryhožyna ŭstupili ŭ kanflikt ź ludźmi Ramzana Kadyrava na hlebie ŭsio toj ža efiektyŭnaści na poli boju. Adnak da adkrytaha sutyknieńnia hetaja sprečka tak i nie dajšła (choć šaniec byŭ vysoki).

• 12
• 0
• 52
• 7
• 5
• 0
• 9
• 0