19-hadovy Suleman Daŭd uziaŭ z saboj kubik Rubika, kab być pieršym čałaviekam, jaki sabraŭ jaho na hłybini bolšaj za 3000 mietraŭ.
Kryścin Daŭd, maci i žonka zahinułych Sulemana i Šachzady, raskazała Bi-bi-si pra toje, jak i baćka, i syn, maryli spuścicca da patanułaha «Tytanika».
Da miesca apuskańnia adpraviłasia ŭsia siamja, ale Kryścin z dačkoj zastalisia na borcie «Palarnaha prynca»: apuskacca źbiralisia tolki Suleman i Šachzada. I baćka, i syn byli ŭ poŭnym zachapleńni ad budučaj pryhody.
Pieršy raz apuskańnie płanavałasia jašče da pandemii, ale tady Sulemana na bort batyskafa nie ŭziali, bo isnavała zabarona na ŭdzieł u ekśpiedycyi dziaciej małodšych za 18 hadoŭ. Kampaniju Šachzadu pavinna była skłaści sama Kryścin.
Adnak Covid-19 parušyŭ hetyja płany i adkłaŭ apuskańnie na niekalki hadoŭ, za jakija Suleman dasiahnuŭ dazvolenaha ŭzrostu, i jaho maci achvotna sastupiła jamu svajo miesca.
Kryścin abniała muža i syna i stała razam z dačkoj Alinaj čakać ich viartańnia.
«Ja była vielmi rada za ich, bo jany abodva sapraŭdy čakali hetaha apuskańnia na praciahu davoli doŭhaha času», — skazała jana.
Spačatku, kali im skazali, što suviaź z batyskafam źnikła, jany i nie dumali, što adbyłasia katastrofa. Tym bolš, što kamanda «Palarnaha prynca» zapeŭniła ich, što ŭ hetym niama ničoha strašnaha, što takija niepaładki zdarajucca i što jość masa sposabaŭ, jakimi padvodny aparat možna padniać na pavierchniu, navat kali niejkaje abstalavańnie admoviła.
Niejki čas Kryścin čakała, što «Tytan» voś-voś źjavicca na pavierchni, čaplajučysia za najmienšuju nadzieju. Jana viedała, što zapasaŭ kisłarodu ŭ padvodnym aparacie chopić na čaćviora sutak, ale čas išoŭ, i nadzieja rastavała.
«Dumaju, što kančatkova straciła nadzieju, kali skončylisia hetyja 96 hadzin, — skazała jana. — Tady ja i napisała siamji, što rychtujusia da najhoršaha».
Alina pratrymałasia trochi daŭžej: «Jana nie hublała nadziei da zvanka bierahavoj achovy. Kali jany paviedamili nam, što sapraŭdy znajšli abłomki».
Kryścin raskazała Bi-bi-si pra toje, jakimi byli jaje muž i syn. Suleman, naprykład, byŭ litaralna apantany kubikam Rubika. Jon staranna vyvučaŭ videa ŭ YouTube i ŭrešcie navučyŭsia źbirać znakamituju hałavałomku ŭ rekordna karotkija terminy. Jaho asabisty rekord skłaŭ usiaho 12 siekund.
Jamu padabałasia ździŭlać navakolnych, jakija časam vykazvali sumnievy ŭ jaho zdolnaściach. Adzin raz jon demanstratyŭna sabraŭ kubik Rubika na vačach u ździŭlenaha achoŭnika i na raźvitańnie addaŭ jamu svaju lubimuju cacku, skazaŭšy, što, maŭlaŭ, ciapier vučysia ty.
Suleman adpraviŭ zajaŭku ŭ Knihu rekordaŭ Hiniesa, skazaŭšy, što maje namier ažyćciavić samuju hłybakavodnuju zborku. Na žal, jamu admovili ŭ uniasieńni ŭ śpis takoha rekordu, ale jon usio roŭna ŭziaŭ kubik z saboj, a jaho baćka prychapiŭ kamieru, kab zachavać praces na hłybini 3700 mietraŭ.
Suleman byŭ studentam univiersiteta Stratkłajda ŭ Hłazha.
Kryścin skazała, što jaje muž byŭ niejmavierna cikaŭnym čałaviekam.
«Jon nikoli nie hladzieŭ mastackija filmy, a vyklučna dakumientalnyja. Časam uviečary chočacca rassłabicca i pahladzieć jakuju-niebudź mylnuju opieru, ale nie, jon źbiraŭ usiu siamju, i my hladzieli toje, što chacieŭ jon». Uspaminajučy, jak Šachzada nastojvaŭ na takim paznavalnym baŭleńni času navat paśla viačery, jana ŭśmichnułasia.
«U jaho była dziŭnaja zdolnaść pa-dziciačamu ŭsprymać toje, što adbyvajecca», — uspomniła jana.
U minułuju niadzielu adbyłasia paminalnaja słužba. Kryścin Daŭd skazała, što była kranutaja tym, što imam pamaliŭsia za ŭsich piaciarych zahinułych mužčyn. «Ja dumaju, što roznaja viera ŭ hetym vypadku značeńnia nie maje», — skazała jana.
Kryścin z dačkoj vyrašyli ŭ honar Sulemana navučycca źbirać kubik Rubika i pahladzieć usie filmy, jakija jamu padabalisia. Jany taksama majuć namier praciahnuć usie prajekty, u jakich udzielničaŭ jaje muž.
«Jon zajmaŭsia mnohimi rečami, — adznačyła jana. — Jon vielmi mnohim dapamoh, i ja chaču praciahnuć jaho spadčynu. Dla nas z Alinaj — heta vielmi važna».
Kryścin admoviłasia abmiarkoŭvać pryčyny katastrofy. Na pytańnie, ci zdolejuć jany z dačkoj znajści vychad z hetych trahičnych abstavinaŭ, jana skazała, što nie viedaje, ci mahčymy ŭ takoj situacyi vychad naohuł. «Ja sumuju pa ich, — skazała jana. — Ja sapraŭdy vielmi mocna sumuju pa ich».
Akramia Sulemana i jaho baćki Šachzady Daŭd, na borcie «Tytana» zahinuli jašče troje čałaviek: Stoktan Raš, 61-hadovy hienieralny dyrektar OceanGate, jakoj i naležaŭ «Tytan», brytanski biznesoviec Chemiš Chardynh, 58 hadoŭ, i Poł-Anry Naržale, 77 hadoŭ, były vadałaz francuzskaha fłotu i viadomy daśledčyk.
«Ja nutrom adčuvaŭ kiepskaje» — Džejms Kemieran pra trahiedyju batyskafa «Tytan»
Batyskaf paciarpieŭ krušeńnie ad impłozii. Tłumačym, što takoje impłozija
Abłomki batyskafa «Tytan» znajšli za 500 mietraŭ ad «Tytanika». Katastrafičnyja razbureńni
Kampanija OceanGate aficyjna paviedamiła pra hibiel ludziej, jakija znachodzilisia ŭ batyskafie «Tytan»
Kamientary