Ukrainski aliharch Firtaš sprabuje zaścierahčysia ad ekstradycyi ŭ ZŠA z dapamohaj biełaruskaha režymu — Deutsche Welle
Ukrainskaha bujnoha biznesmiena Dźmitryja Firtaša zatrymali ŭ Aŭstryi jašče ŭ sakaviku 2014 hoda pa zapycie amierykanskich śledčych, ale paśla vypuścili pad zakład u 125 miljonaŭ jeŭra. Firtašu pahražaje da 50 hadoŭ turmy i kanfiskacyja ŭsich aktyvaŭ, kali jaho ekstradujuć u ZŠA. A kab paźbiehnuć hetaha, zadziejničanaja chitraja schiema z udziełam režymu Łukašenki, jak daviedałasia Deutsche Welle.
Dźmitryj Firtaš, jak vyjaviłasia, sprabuje atrymać dypłamatyčny imunitet praz pracu pry UNIDO — adnaho z małaviadomych dla šyrokaj hramadskaści mižnarodnych ahienctvaŭ u struktury AAN, jakoje pavinna spryjać industryjalizacyi postkałanijalnych krain treciaha śvietu. Heta vynikaje z tekstu rašeńnia Vyšejšaha ziamielnaha suda Vieny pa kryminalnych spravach ad 14 červienia, jaki jość u rasparadžeńni DW.
U tekście rašeńnia Vienskaha suda paznačana, što Firtaš maje status «daradcy pastajannaha pradstaŭnictva Respubliki Biełaruś pry mižnarodnych arhanizacyjach u Vienie» jašče z 2021 hoda. Jakraz na padstavie hetaha statusu Firtaš patrabuje spynić praceduru svajoj ekstradycyi ŭ ZŠA, spasyłajučysia na dypłamatyčny imunitet.
Kab dakazać, što Firtaš jak daradca pry UNIDO maje status dypłamata, a značyć i dypłamatyčnuju niedatykalnaść, advakaty biznesmiena ŭ kastryčniku 2021 hoda pieradali sudu jurydyčnuju ekśpiertyzu, padrychtavanuju adnym z zachodniejeŭrapiejskich prafiesaraŭ pa mižnarodnym pravie.
U toj ža čas Ministerstva justycyi Aŭstryi paviedamiła sudu, što Firtaš nie akredytavany naležnym čynam pry UNIDO i nie maje adpaviednaj akredytacyjnaj kartki ad aŭstryjskaha Ministerstva zamiežnych spraŭ — značyć nie ličycca asobaj, na jakuju raspaŭsiudžvajucca pryvilei dypłamata, uklučajučy imunitet.
Sudy papiarednich instancyj nie pryznali dypłamatyčnaha imunitetu Firtaša, adnak Vyšejšy ziamielny sud Vieny pa kryminalnych spravach viarnuŭ spravu na razhlad u pieršaj instancyi, abaviazaŭšy sud samastojna vyznačyć, ci pryznavać dypłamatyčny imunitet Firtaša.
U pasolstvie Biełarusi ŭ Aŭstryi nie adkazali, čym kankretna zajmajecca Firtaš u statusie daradcy pastajannaha pradstaŭnika Biełarusi pry mižnarodnych arhanizacyjach. Taksama nieviadoma, ci było pryznačeńnie Firtaša daradcam u Vienie ŭzhodnienaje z Łukašenkam abo ŭradam u Minsku i z čyjoj mienavita inicyjatyvy ŭkrainiec pačaŭ pracavać na hetaj pasadzie.
16 červienia 2023 hoda paviedamlałasia, što aŭstryjski sud vynies rašeńnie na karyść Firtaša pa spravie ab patrabavańni ekstradavać jaho ŭ ZŠA pa abvinavačvańni ŭ karupcyi.
Da taho, jak u Dźmitryja Firtaša pačalisia prablemy, jon zajmaŭ 4-je miesca ŭ rejtynhu samych bahatych ludziej Ukrainy (2013). Jahonaje bahaćcie aceńvałasia ŭ 3,5 młrd dalaraŭ. Aktyvy byli abjadnanyja ŭ mižnarodnuju hrupu kampanij Group DF, asnoŭnymi kirunkami dziejnaści jakoj byli azotny, tytanavy, hazavy i bankaŭski biznesy.
Vialiki rezanans u pačatku 2013 hoda vyklikała nabyćcio hrupaj Firtaša kampanii Inter Media Group, u jakuju ŭvachodzili telekanały «Inter», NTN, K1, «Mieha», «Enter-film», K2, «Piksiel» i MTV. Hetyja telekanały byli klučavymi ŭ prapahandzie Viktara Janukoviča.
Ličycca, što Firtaš byŭ źviazany cieniavymi suviaziami z Uładzimiram Pucinym. Prynamsi, akurat z udziełam prezidenta Pucina było vyrašana, što pastaŭki hazu va Ukrainu «Hazpram» budzie ažyćciaŭlać nie naŭprost, a praz struktury Firtaša.
Dla hetaha ŭ 2004 hodzie ŭkrainski biznesmien supolna z «Hazpramam» stvaryŭ kampaniju «Rasukrenierha» dla ažyćciaŭleńnia tranzitu hazu va Ukrainu i ŭ krainy Jeŭrasajuza. U tym ža hodzie była nabytaja aŭstryjskaja kampanija Zangas Hoch-und Tiefbau GmbH, jakaja śpiecyjalizavałasia na budaŭnictvie hazapravodaŭ.
Pašpart Novaj Biełarusi pačnuć vydavać z 26 studzienia. Što viadoma i jak atrymać?90
Kamientary
Naprykład, śledstva i sud pa spravie źbitaha ŭ 2014 rasiejcami boinha na Danbasie praciahvalisia šmat hod mienavita tamu, što va ŭmovach kiepskaha faktažu advakaty rasiejskaha boku baranili svajho klijenta mienavita na pracedurnych momantach, ale ŭ vyniku ŭsio roŭna prajhrali.
Tamu i Firtaš u vyniku prajhraje, bo pa sutnaści sprava idzie ab sprobie vykarystańnia mižnarodnych arhanizacyj bandustanami ŭ jakaści dachu dla kryminalnikaŭ. Nažal, kiraŭnictva AAN na čale sa spadarom Huterišam u čarhovy raz mocna bje pa aŭtarytetu AAN, nie reahujučy adpaviednym čynam na aburalnyja karupcyjnyja skandały z udziełam svaich supracoŭnikaŭ.