Дзмітрый Фірташ. Фота: AP Photo/Ronald Zak
Дзмітрый Фірташ, як выявілася, спрабуе атрымаць дыпламатычны імунітэт праз працу пры UNIDO — аднаго з малавядомых для шырокай грамадскасці міжнародных агенцтваў у структуры ААН, якое павінна спрыяць індустрыялізацыі посткаланіяльных краін трэцяга свету. Гэта вынікае з тэксту рашэння Вышэйшага зямельнага суда Вены па крымінальных справах ад 14 чэрвеня, які ёсць у распараджэнні DW.
У тэксце рашэння Венскага суда пазначана, што Фірташ мае статус «дарадцы пастаяннага прадстаўніцтва Рэспублікі Беларусь пры міжнародных арганізацыях у Вене» яшчэ з 2021 года. Якраз на падставе гэтага статусу Фірташ патрабуе спыніць працэдуру сваёй экстрадыцыі ў ЗША, спасылаючыся на дыпламатычны імунітэт.
Каб даказаць, што Фірташ як дарадца пры UNIDO мае статус дыпламата, а значыць і дыпламатычную недатыкальнасць, адвакаты бізнэсмена ў кастрычніку 2021 года перадалі суду юрыдычную экспертызу, падрыхтаваную адным з заходнееўрапейскіх прафесараў па міжнародным праве.
У той жа час Міністэрства юстыцыі Аўстрыі паведаміла суду, што Фірташ не акрэдытаваны належным чынам пры UNIDO і не мае адпаведнай акрэдытацыйнай карткі ад аўстрыйскага Міністэрства замежных спраў — значыць не лічыцца асобай, на якую распаўсюджваюцца прывілеі дыпламата, уключаючы імунітэт.
Суды папярэдніх інстанцый не прызналі дыпламатычнага імунітэту Фірташа, аднак Вышэйшы зямельны суд Вены па крымінальных справах вярнуў справу на разгляд у першай інстанцыі, абавязаўшы суд самастойна вызначыць, ці прызнаваць дыпламатычны імунітэт Фірташа.
У пасольстве Беларусі ў Аўстрыі не адказалі, чым канкрэтна займаецца Фірташ у статусе дарадцы пастаяннага прадстаўніка Беларусі пры міжнародных арганізацыях. Таксама невядома, ці было прызначэнне Фірташа дарадцам у Вене ўзгодненае з Лукашэнкам або ўрадам у Мінску і з чыёй менавіта ініцыятывы ўкраінец пачаў працаваць на гэтай пасадзе.
16 чэрвеня 2023 года паведамлялася, што аўстрыйскі суд вынес рашэнне на карысць Фірташа па справе аб патрабаванні экстрадаваць яго ў ЗША па абвінавачванні ў карупцыі.
Да таго, як у Дзмітрыя Фірташа пачаліся праблемы, ён займаў 4-е месца ў рэйтынгу самых багатых людзей Украіны (2013). Ягонае багацце ацэньвалася ў 3,5 млрд даляраў. Актывы былі аб'яднаныя ў міжнародную групу кампаній Group DF, асноўнымі кірункамі дзейнасці якой былі азотны, тытанавы, газавы і банкаўскі бізнэсы.
Вялікі рэзананс у пачатку 2013 года выклікала набыццё групай Фірташа кампаніі Inter Media Group, у якую ўваходзілі тэлеканалы «Інтэр», НТН, К1, «Мега», «Энтэр-фільм», К2, «Піксель» і MTV. Гэтыя тэлеканалы былі ключавымі ў прапагандзе Віктара Януковіча.
Лічыцца, што Фірташ быў звязаны ценявымі сувязямі з Уладзімірам Пуціным. Прынамсі, акурат з удзелам прэзідэнта Пуціна было вырашана, што пастаўкі газу ва Украіну «Газпрам» будзе ажыццяўляць не наўпрост, а праз структуры Фірташа.
Для гэтага ў 2004 годзе ўкраінскі бізнэсмен супольна з «Газпрамам» стварыў кампанію «Расукрэнерга» для ажыццяўлення транзіту газу ва Украіну і ў краіны Еўрасаюза. У тым жа годзе была набытая аўстрыйская кампанія Zangas Hoch-und Tiefbau GmbH, якая спецыялізавалася на будаўніцтве газаправодаў.
Чытайце таксама:
Расійскага мільярдэра беларускага паходжання хочуць пазбавіць швейцарскага ДНЖ
Абыходзіць санкцыі «кашальку Лукашэнкі» Зайцаву дапамагае стаўбцоўскі ксёндз Лашук — БРЦ
Расійскія апазіцыянеры прасілі ЕС зняць санкцыі з уласнікаў «Альфа-груп». Дакументы зліў Венядзіктаў
