ES uchvaliŭ prajekt zakona ab rehulavańni prymianieńnia štučnaha intelektu

Zakonaprajekt całkam zasnavany na paniaćci ryzyki. Rehulujecca nie sam štučny intelekt, a toje, jak jon vykarystoŭvajecca ŭ peŭnych śfierach žyćcia hramadstva, u kožnuju ź jakich jon moža prynieści peŭnyja patencyjnyja prablemy. Vyłučana čatyry katehoryi ryzyki: nieprymalnaja, vysokaja, abmiežavanaja i minimalnaja.

Sistemy, jakija ŭjaŭlajuć pahrozu fundamientalnym pravam abo kaštoŭnaściam ES, buduć adniesienyja da katehoryi «nieprymalnaj ryzyki» i zabaronienyja. Prykładam takoj ryzyki mohuć być sistemy ŠI, jakija vykarystoŭvajucca dla «prahnastyčnaha kantrolu», što abaznačaje vykarystańnie ŠI dla acenki ryzyki asob na asnovie asabistaj infarmacyi z metaj pradkazańnia vierahodnaha ŭčynieńnia złačynstva toj ci inšaj asobaj.

Bolš sprečny vypadk — vykarystańnie technałohii raspaznavańnia tvaraŭ z vykarystańniem vuličnych kamier. Heta taksama było dadadziena ŭ śpis nieprymalnaj ryzyki, i, u adroźnieńnie ad Biełarusi, takoje prymianieńnie ŠI budzie dazvolena tolki paśla ŭčynieńnia sapraŭdnaha złačynstva i paśla adpaviednaha rašeńnia suda.

Sistemy, kłasifikavanyja jak «vysokaja ryzyka», buduć mieć abaviazak raskryćcia infarmacyi i, jak čakajecca, buduć zarehistravanyja ŭ śpiecyjalnaj bazie danych. To-bok takija sistemy taksama buduć padviarhacca roznym patrabavańniam manitorynhu ci aŭdytu.

Pad kłasifikacyju dadatkaŭ z «vysokaj ryzykaj» budzie padpadać ŠI, jaki moža kantralavać dostup da pasłuh u śfiery adukacyi, pracaŭładkavańnia, finansavańnia, achovy zdaroŭja i inšych važnych halinach. Vykarystańnie ŠI ŭ takich halinach nie razhladajecca jak niepažadanaje, ale nahlad za im vielmi važny z-za taho, što jon moža niehatyŭna paŭpłyvać na biaśpieku abo asnoŭnyja pravy hramadzian.

Ideja jeŭrapiejskich zakonatvorcaŭ zaklučajecca ŭ tym, što hramadzianie pavinny vieryć, što luboje prahramnaje zabieśpiačeńnie, jakoje prymaje rašeńni, naprykład, ab našaj ipatecy, budzie staranna praviaracca na adpaviednaść jeŭrapiejskim zakonam. Tak kožny moža pierakanacca, što jon nie padpadaje pad dyskryminacyju na asnovie takich abaronienych charaktarystyk asoby, jak poł abo etničnaje pachodžańnie i h.d.

Sistemy ŠI z «abmiežavanaj ryzykaj» buduć padparadkoŭvacca minimalnym patrabavańniam prazrystaści. Anałahičnym čynam apieratary hienieratyŭnych sistem ŠI, naprykład, boty, jakija stvarajuć tekst abo vyjavy, pavinny buduć raskryvać infarmacyju ab tym, što karystalniki ŭzajemadziejničajuć z mašynaj.

Zakonaprajekt, jaki tolki što byŭ uchvaleny Jeŭraparłamientam, maje mienš jarkaści ŭ paraŭnańni ź niekatorymi apošnimi pietycyjami i zajavami pra «ryzyku vymirańnia» čałaviectva ŭ vyniku dziejnaści ŠI, ale pry hetym maje bolš sutnaści. Jon sprabuje znajści tonkuju miažu pamiž abaronaj pravoŭ i kaštoŭnaściaŭ, pry hetym nie pieraškadžajučy inavacyjam i kankretna źviartajučysia da niebiaśpieki i srodkaŭ pravavoj abarony. Choć zakonaprajekt pakul i daloki ad daskanałaści, jon, prynamsi, praduhledžvaje kankretnyja dziejańni.

Nastupnym etapam zakonatvorčaści stanuć trochbakovyja pieramovy, padčas jakich asobnyja prajekty parłamienta, kamisii i rady buduć abjadnanyja ŭ kančatkovy tekst. Čakajecca, što na hetym etapie buduć dasiahnuty niekatoryja kampramisy. Hałasavańnie pa prajekcie adbudziecca, imavierna, u kancy 2023 hoda, a praz dva-try hady zakon narešcie ŭstupić u siłu — i tolki tady luby biznes, jaki pracuje ŭ ES, pavinien budzie jaho vykonvać.

Kaniečnie, takaja doŭhaja časavaja škała sapraŭdy vyklikaje niekatoryja pytańni, bo niezrazumieła, jak ŠI i śviet uvohule buduć vyhladać u 2027 hodzie. Plusam adnak vyhladaje toje, što prajekt napisany dastatkova ahulna, što moža dapamahčy jamu niekatory čas zastavacca aktualnym.

Darečy, The Conversation nahadvaje, što prezidentka Jeŭrapiejskaj kamisii Ursuła fon der Lajen upieršyniu prapanavała hety zakonaprajekt jašče ŭletku 2019 hoda, niepasredna pierad pandemijaj, vajnoj i enierhietyčnym kryzisam, a taksama da taho, jak ChatGPT prymusiŭ palitykaŭ i miedyja rehularna kazać pra ekzistencyjalnuju ryzyku z boku ŠI.

• 2
• 0
• 0
• 0
• 0
• 1
• 1
• 0