Prysud miedyjamieniedžaru Kanstancinu Załatych pakinuli bieź źmienaŭ
Viarchoŭny sud 4 lipienia razhledzieŭ apielacyjnuju skarhu dyrektara ekanamičnaj niezaležnaj haziety «Biełorusy i rynok» Kanstancina Załatych, pakaranaha 4 hadami źniavoleńnia. Prysud pieršaj instancyi pradkazalna pakinuli bieź źmienaŭ, jak piša BAŽ.
Z anonsa na sajcie Viarchoŭnaha suda vynikaje, što na praces byŭ pryznačany sudździa Uładzimir Čaravač. U siaredzinie červienia jon hetak ža nie znajšoŭ padstaŭ, kab źmiakčyć pakarańnie inšamu žurnalistu Hienadziu Mažejku.
Kanstancina Załatych razam z kalehami pa redakcyi zatrymali 18 maja 2022 hoda supracoŭniki KDB. Paśla dopytu hałoŭnaha redaktara Andreja Aleksandroviča i buchhałtarku Juliju Kachno adpuścili, a Kanstancina Załatych pakinuli pad vartaj.
Minski haradski sud prystupiŭ da razhladu spravy tolki sioleta, 24 sakavika. Sudździa Alena Šylko, u jakoj bahaty dośvied pracy z «palityčnymi», adrazu zrabiła praces zakrytym.
U pracesie ahučvańnia dovadaŭ, atrymanych ad śledstva, bok prakuratury pryjšoŭ da vysnovy: dyrektar haziety «Biełorusy i rynok» aktyŭna vykazvaŭ «ułasnuju tendencyjnuju pazicyju» na padziei ŭ krainie, što siarod inšaha vyjaviłasia ŭ abraźlivych kamientarach na adras vyšejšych asobaŭ dziaržavy, pakinutych u sacyjalnych sietkach. Akramia taho, jon nibyta «metanakiravana karystaŭsia słužbovym stanoviščam» dla vyrašeńnia piersanalnych patrebaŭ.
Na padstavie hetych abvinavačańniaŭ Kanstancina Załatych pakarali ahułam 4 hadami kałonii ahulnaha režymu.
Admietna, što pieršapačatkova jaho zatrymlivali tolki za «raspalvańnie varožaści», astatnija epizody kanstatavali jak fakt užo padčas znachodžańnia za kratami.
Što za «Sihma boj»? Hetaj virusnaj pieśniaj zaniepakoilisia ŭ Jeŭraparłamiencie13
Kamientary