Asabisty kiroŭca — kadebist, u siabrach — pamočnik Łukašenki. Chto takaja matuška Haŭryiła z Hrodna
Naradziłasia ŭ Rasii, časta jeździć u Jeŭrasajuz. Kiroŭcam u jaje pracavaŭ supracoŭnik KDB. «Radyjo Svaboda» raskazvaje, čym viadomaja matuška Haŭryiła, ihumieńnia žanočaha manastyra ŭ Hrodnie.
«U hetym adździele pracavali ludzi, jakija supracoŭničali z KDB»
Śvieckaje imia ihumieńni Haŭryiły — Maryja Mikałajeŭna Hłuchava. Joj 65 hadoŭ. Naradziłasia 12 červienia 1958 hodu ŭ rasijskim Saratavie, adnak ź dziacinstva žyła ŭ Biełarusi. Baćki razyšlisia na hlebie relihii. Maci Halina Kłyševič razam z dačkoj viarnułasia na Haradzienščynu. Žyli ŭ Žyrovičach. Tam Maryja chadziła ŭ škołu, była starastaj kłasa. Maci pracavała pry manastyry, pad kaniec žyćcia pryniała postryh ź imiem Hieorhija. Pamierła ŭ 2013 hodzie.
«Jana była lehiendaj Žyrovickaha manastyra, śviatoha žyćcia čałaviek», — ananimna raskazała pra manašku Hieorhiju «Svabodzie» abaznanaja krynica.
Paśla škoły Maryja Hłuchava advučyłasia ŭ miedycynskim technikumie ŭ Leninhradzie. Pracavała tam ža ŭ špitali. Potym pastupiła pasłušnicaj u manastyr u Ryzie. Nieŭzabavie mitrapalit Fiłaret zabraŭ jaje ŭ Maskvu ŭ adździeł zamiežnacarkoŭnych suviaziaŭ.
«U hetym adździele pracavali ludzi, jakija supracoŭničali z KDB», — adznačaje krynica «Svabody».
Na dva hady Hłuchava pierajechała ŭ Ijerusalim, dzie vykonvała abaviazki ihumieńni manastyra Ruskaj duchoŭnaj misii. Kali manašcy było 33 hady, jaje pryznačyli ihumieńniaj žanočaha manastyra ŭ Hrodnie. Jana kiruje im užo bolš za 30 hadoŭ.
Manastyr naviedvaŭ Łukašenka
Ihumieńnia raskazvała STB, nakolki joj nie spadabałasia Hrodna, kali jana pryjechała tudy ŭ 1992 hodzie.
«Ja kali pryjechała siudy na hetyja niekalki hadzin paśla Ijerusalima, paśla Maskvy, tam hetyja pazałočanyja kupały, a tut hety sakavik, abšarpanyja ścieny, dzieści damy niejkija, hraź na vulicach, hetyja kaścioły. Šmat było niedahledžanaha, nieprybranaha, tolki pačynalisia 1990-ja. Ja dumaju: «Navat kali ŭładyka mnie prapanuje, ni za što ŭ Hrodna nie zastanusia», — kazała manaška.
U 1995 hodzie hrodzienski manastyr naviedaŭ maskoŭski patryjarch Alaksiej II. Tady jon nadaŭ Haŭryile san ihumieńni. U 1998 hodzie ŭ manastyr pryjazdžaŭ Alaksandr Łukašenka. Jon pakinuŭ u knizie hanarovych haściej zapis: «Zachaplajusia vašaj mužnaściu i addanaściu vialikim kaštoŭnaściam čałaviectva». Chram manastyra raśpisali da 2000 hoda dziakujučy padtrymcy Łukašenki i Alaksieja II.
Ciapier, pavodle sajta manastyra, tam žyvuć 14 manašak. Adnak krynica «Svabody» pierakananaja, što kolkaść značna mienšaja («Dobra, kali čatyry manaški jość»). Pryčynu surazmoŭca «Svabody» bačyć u tym, što ihumieńnia moža być vielmi rezkaj ź ludźmi, «da jaje ŭ manastyr nichto nie choča iści».
Na sajcie manastyra taksama havorycca, što pry im dziejničaje niadzielnaja škoła. Krynica «Svabody» adznačyła, što ihumieńnia maje damoŭlenaść sa škołami horada, jakija pry nieabchodnaści dapamahajuć stvaryć masavaść i skiroŭvajuć u manastyr dziaciej.
Sama matuška Haŭryiła prapisanaja ŭ manastyry i žyvie ŭ adnym ź jahonych budynkaŭ. Heta nie prosta kiella, a ceły damok z mansardaj, jaki jana zajmaje adna i dzie prymaje haściej.
«Ihumienski domik uvieś u miaščanskim styli: paŭsiul falbonki, upryhažeńni, drobiazi. Załatych unitazaŭ, viadoma, niama, ale jana žyvie bahata», — raskazaŭ surazmoŭca «Svabody».
Supracoŭnik KDB byŭ asabistym kiroŭcam
Matuška Haŭryiła časta jeździła za miažu, jak raskazali «Svabodzie» «Kibierpartyzany». Z 2008-ha pa 2019 hod Hłuchava vyjazdžała ŭ Polšču i Litvu bolš za 160 razoŭ, heta ŭ siarednim čaściej, čym raz na miesiac. Jeździła zvyčajna na 1-3 dni jak pasažyr.
Kiroŭcam niekalki hadoŭ u jaje byŭ, pavodle tych ža «Kibierpartyzanaŭ», supracoŭnik KDB Alaksandr Syravatka. Časta jana adpraŭlałasia ŭ zamiežnyja pajezdki na aŭtamabili Siarhieja Raŭniejki, byłoha pamočnika Łukašenki pa Hrodzienskaj vobłaści. U 2018 hodzie jaho zatrymaŭ KDB. Raŭniejku asudzili na 12 hadoŭ kałonii nibyta za chabar u 200 tysiač dalaraŭ. Časam ihumieńnia padarožničała taksama z protadyjakanami Minskaj duchoŭnaj sieminaryi Valancinam Pałonskim i Ramanam Sabiłam.
Da taho ž, pavodle infarmacyi «Kibierpartyzanaŭ», z 2012-ha pa 2018 hod matuška Haŭryiła bolš za 10 razoŭ latała ŭ Vienu, Rym, Hrecyju.
Jak raskazaŭ surazmoŭca «Svabody», padčas pracy ŭ Maskvie Hłuchava naładziła suviazi z zamiežnymi chryścijanskimi arhanizacyjami. Pavodle jahonaj infarmacyi, u Italii jana naviedvała asacyjacyju ihumieńniaŭ manastyroŭ. Padčas pajezdak u Minsk Haŭryiła zaŭždy spyniałasia ŭ hateli «Harni» ŭ centry.
«Z administracyjnych spahnańniaŭ u jaje tolki štrafy za pieravyšeńnie chutkaści», — paviedamili «Svabodzie» «Kibierpartyzany» pra dačynieńni Hłuchavaj z zakonam.
Kanflikt z uładykam Arciemijem
Kanflikt ihumieńni z hrodzienskim jepiskapam isnavaŭ zaŭsiody, jak raskazała krynica «Svabody».
«Jana jamu mnoha niervaŭ źjeła. Jany antypody, heta dva absalutna roznyja pravasłaŭi, dva polusy. Uładyku Arciemiju nie padabałasia «šamanstva», jakoje jana ładziła: śviatyńki, śviataja ziamielka, relihijnyja fietyšy, nahniatańnie relihijnaha ažyjatažu, śpiekulacyja na relihijnych temach. Uładyka zaŭsiody vystupaŭ za zdarovaje, asensavanaje chryścijanstva», — kaža surazmoŭca.
Pieršapačatkova ihumieńnia Haŭryiła miełasia padparadkoŭvacca archijepiskapu Arciemiju, adnak jana ihnaravała jahonyja rekamiendacyi.
«Što choča, toje i robić. Naadvarot, starajecca nasalić jepiskapu, vystupić nasupierak jamu z, prabačcie, babskaj nachabnaściu. Heta ŭsio strašna razdražniała jepiskapa», — uspaminaje krynica «Svabody».
Praz hety kanflikt z 2002 hoda hrodzienski žanočy manastyr pierastaŭ padparadkoŭvacca miascovamu jepiskapu i pierajšoŭ u niepasrednaje padparadkavańnie kiraŭniku BPC.
U 2020 hodzie, paśla taho jak uładyka Arciemij asudziŭ hvałt siłavikoŭ, pačałasia kampanija pa zbory podpisaŭ, kab źniać jepiskapa z pasady. U inicyjatyvie padazravali ihumieńniu Haŭryiłu.
Maroziva «Pušok» i akrapleńnie śviatoj vadoj
Matuška Haŭryiła viadomaja nietypovymi dla manaški rečami.
U Horadni vypuskali maroziva «Pušok» u honar jejnaha biełaha kata. Na abhortcy była vyjava Puška i napisana, što pradukt vypuskajuć z «dobrasłaŭleńnia Fiłareta».
«Joj ułaścivaje samadurstva. Aśviačeńnie śviatoj vadoj robić zvyčajna śviatar. Ihumieńnia ž moža sama na śviata ŭziać krapiła i papyrskać vadoj ludziej, i navat bić ich pa tvary», — kaža pra svavolstva manaški surazmoŭca «Svabody».
Haŭryiła, sa słovaŭ krynicy žurnalistaŭ, blizka kamunikuje z namieśnikam Žyrovickaha manastyra jepiskapam Huryjem, toj časta byvaje ŭ žanočym manastyry.
«Tam niama nijakich amurnych spravaŭ. Ale jana ŭmiešvajecca ŭ spravy Huryja, manipuluje im, upłyvaje na toje, jakoje rašeńnie pryniać u dačynieńni taho ci inšaha śviatara», — kaža surazmoŭca.
Dapamahła śviataru atrymać kvateru ad dziaržavy
Pra ŭpłyŭ matuški Haŭryiły na čynoŭnikaŭ moža śviedčyć historyja, jakaja adbyłasia ŭ 2012 hodzie. Tady śviatar Alaksandr Hryb na čas słužby ŭ hrodzienskim žanočym manastyry atrymaŭ kvateru pa papiery z podpisam premjer-ministra Miaśnikoviča. Pra heta pisała «Jeŭraradyjo».
«Jon dziakujučy joj atrymaŭ žylle. Nie sam jon atrymaŭ, a chaj molicca za jaje, jana pakłapaciłasia. Jana ŭvachodzić u dziaržaŭnyja struktury, bo jana ŭ nas adna takaja. Tym bolš manastyr pravodzić vialikuju pracu, mnohija tam prytułak znachodziać, a ŭmiej uziać, umiej i addać», — taki kamientar dali žurnalistam u adździele relihii i nacyjanalnaściaŭ Hrodzienskaha abłvykankama.
Tarty dla milicyjantaŭ i kryž dla ŭciekačoŭ
Ihumieńnia addana padtrymlivaje režym Łukašenki. Heta stała vidavočna ŭ 2020 hodzie. Na žanočym forumie «Za Biełaruś» u vieraśni 2020-ha jana rezka raskrytykavała pratesty. Nazvała pratestoŭcaŭ «natoŭpam varjataŭ» i «siektantami». Potym jana vybačałasia za heta. Viadomaje fota, na jakim ihumieńnia doryć hrodzienskim milicyjantam tarty ŭ listapadzie 2020 hoda.
Padčas mihranckaha kryzisu, jaki štučna stvaryŭ režym Łukašenki ŭ 2021 hodzie, ihumieńnia Haŭryiła naviedvała łahistyčny centr u Bruzhach, dzie raźmiaścili ŭciekačoŭ. Jana rabiła znak kryža nad dziećmi kurdaŭ, niahledziačy na toje, što mnohija ź ich musulmanie.
«Jana na lubyja hłupstvy hatovaja, kab pakazać svaju prychilnaść Łukašenku», — kaža surazmoŭca.
Na jahonuju dumku, ihumieńnia chutčej i vyraźniej za mnohich dakazała, što jana na baku režymu.
Matuška Haŭryiła maje šmat uznaharodaŭ ad carkvy i dziaržavy. Siarod ich orden Franciška Skaryny, premija Łukašenki «Za duchoŭnaje adradžeńnie», zvańnie «Žančyna hoda», orden BPC Jeŭfrasińni Połackaj. Niadaŭna Maryju Hłuchavu ŭnieśli ŭ Knihu słavy Hrodzienskaj vobłaści.
Patryjarch Kirył pavinšavaŭ biełarusaŭ. U vinšavańni niama słova pra niezaležnaść Biełarusi
ŚMI: Šviejcarskija śpiecsłužby jašče ŭ 1970-ja identyfikavali budučaha patryjarcha Kiryła jak ahienta KDB
Śviatar Hieorhij Roj — pra danosy na jaho, malitvy za Rasiju, jakija dasyłali źvierchu, nadziei na Suśvietny patryjarchat i strach pryvyknuć da niesvabody
Śviatar Kuchta ŭ «Žyćci-malinie» raskazaŭ pra asablivaści mitrapalita Vienijamina, kantrast dvuch patryjarchaŭ i svaju pracu ŭ IT
Paśla danosu Bondaravaj raptoŭna admianili vystavu ŭ muziei Janki Kupały. Ciapier jana patrabuje na muziei šyldy pa-rusku29
Paśla danosu Bondaravaj raptoŭna admianili vystavu ŭ muziei Janki Kupały. Ciapier jana patrabuje na muziei šyldy pa-rusku
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu55
Kamientary