Adzin z asnoŭnych kamandziraŭ «vahnieraŭcaŭ» Anton Jelizaraŭ z pazyŭnym «Łotas» (źleva) i kiraŭnik PVK «Vahnier» Jaŭhien Pryhožyn (sprava). Fota: pres-słužba Pryhožyna
Adzin ź siabroŭ rady kamandziraŭ PVK «Vahnier» Anton Jelizaraŭ z pazyŭnym «Łotas» raskazaŭ adnamu z rasijskich vajenkaraŭ pra budučyja płany najmitaŭ, u pryvatnaści pa raźmiaščeńni ŭ Biełarusi. Jaho słovy pieradaŭ rasijski pravajenny telehram-kanał «Siniaja Z Barada».
Pa słovach Jelizarava, Pryhožyn ciapier raspuściŭ usich «vahnieraŭcaŭ» u adpačynak da pačatku žniŭnia. Zroblena heta było dla mahčymaści adpačyć pierad vialikaj pracaj, asnoŭnuju častku jakoj treba budzie rabić u Biełarusi».
Sam Jelizaraŭ pry hetym nie paviedamiŭ, ci znachodzicca ŭ hety momant u Biełarusi chacia b častka najmitaŭ.
«U najbližejšaj pierśpiektyvie nam treba pravieści ratacyju chłopcaŭ na dalokich napramkach i pryniać navabrancaŭ. Potym samaje składanaje — heta vychad u Biełaruś. Nam treba budzie pravieści padrychtoŭku baz i palihonaŭ, pravieści ŭzhadnieńnie ź ich orhanami ŭłady, arhanizavać supracoŭnictva ź biełaruskimi siłavikami, a taksama naładzić łahistyku.
A pakul my ŭsie ŭ adpačynku da pačatku žniŭnia. Rasparadžeńnie Jaŭhiena Viktaraviča», — raskazaŭ «vahnieraŭski» kamandzir Anton Jelizaraŭ.
Nahadajem, što paśla miaciažu rasijskija ŭłady prapanavali Jaŭhienu Pryhožynu i PVK «Vahnier» pieradysłakavacca ŭ Biełaruś.
Pry hetym, pavodle słoŭ Alaksandra Łukašenki, sam Pryhožyn i jaho najmity, niahledziačy na damoŭlenaści, usio jašče znachodziacca ŭ Rasii.
Čytajcie taksama:
Niamieckaja raźviedka prasłuchoŭvała Pryhožyna i Łukašenku padčas buntu ŭ Rasii — miedyja
