Adna z najstarejšych u śviecie haziet spyniła vychad na papiery
Viadomaja aŭstryjskaja hazieta zastała 10 impierataraŭ, 12 prezidentaŭ i dźvie respubliki.
Adzin z samych starych navinavych štodziońnikaŭ Jeŭropy i śvietu — aŭstryjskaja hazieta Wiener Zeitung — pryniaŭ rašeńnie całkam spynić vypusk drukavanych numaroŭ i pierajści ŭ internet. Jak piša vydańnie Der Spiegel, heta adbyłosia praz surjoznyja prablemy ź finansavańniem haziety.
Sama hazieta Wiener Zeitung štodzionna vydavałasia z 1703 hoda ŭ Vienie. Pieršapačatkova jana nazyvałasia Wiennerisches Diarium i staviła sabie za metu davać čytačam ćviarozuju karcinu śvietu «biez paetyčnaści i blasku».
Jana ličyłasia vielmi jakasnym vydańniem, jakoje aśviatlała nie tolki padziei ŭnutry Aŭstryi, ale i za jaje miežami.
«Ciapier ža jaje redakcyja pryniała rašeńnie ab spynieńni druku i pierachodu haziety ŭ internet praz novy zakon, jaki pryniało kaalicyjnaje kiraŭnictva Aŭstryi. Hety zakon admianiaje patrabavańnie płacić miedyja za publikacyju ŭ ich na staronkach publičnych abjaŭ ci rekłamy. Takim čynam Wiener Zeitung, jakaja naležyć kiraŭnictvu krainy, ale pry hetym viadzie niezaležnuju redakcyjnuju palityku, straciła 18 miljonaŭ jeŭra i była vymušanaja istotna skaracić svoj štat supracoŭnikaŭ», — napisała vydańnie Der Spiegel.
U haziecie, jakaja «pražyła» taki istotny kavałak času, publikavali abjavy i artykuły viadomyja na ceły śviet ludzi. Naprykład, u 1768 hodzie ŭ joj vyjšła paviedamleńnie pra kancert z udziełam talenavitaha 12-hadovaha padletka, jakoha zvali Volfhanh Amadej Mocart. Kali Aŭstryja paciarpieła parazu ŭ Pieršaj suśvietnaj vajnie, hazieta pieršaj apublikavała śpiecyjalny vypusk ź listom ab adračeńni apošniaha impieratara Aŭstra-Vienhryi, kajziera Karła I Habsburha.
Wiener Zeitung taksama adnym ź pieršych apublikavaŭ tekst Dekłaracyi ab pravach čałavieka.
Na vokładcy apošniaha drukavanaha numara ŭ 2023 hodzie štodziońnik na raźvitańnie z čytačami pryvioŭ takija ličby: «116 840 dzion, 3839 miesiacaŭ, 320 hadoŭ, 10 impierataraŭ, 12 prezidentaŭ, 2 respubliki, 1 hazieta».
Trahiedyja ŭ Dokšycach: skončyła žyćcio samahubstvam 15-hadovaja viaskovaja vydatnica2
Kamientary