«My razhladajem hetaje pytańnie». Mižnarodny kamitet Čyrvonaha Kryža vykazaŭsia pra Z-vizit hiensaka biełaruskaj arhanizacyi na Danbas
Aficyjny pradstaŭnik Mižnarodnaha kamiteta Čyrvonaha Kryža zajaviŭ, što arhanizacyja nie maje dačynieńnia da skandalnaha vizitu hienieralnaha sakratara Biełaruskaha tavarystva Čyrvonaha Kryža Dźmitryja Šaŭcova ŭ «DNR», jak piša «Jeŭraradyjo».
«U ciapierašni čas my razhladajem hetaje pytańnie. Vielmi važna, kab usie siabry ruchu Čyrvonaha Kryža i Čyrvonaha Paŭmiesiaca zachoŭvali svaju niezaležnaść ad uradaŭ i nośbitaŭ zbroi.
Heta dazvalaje nam dapamahać biesstaronna, addajučy pryjarytet ludziam, jakija najbolš majuć u hetym patrebu, dzie b jany ni znachodzilisia, na jakim by baku linii frontu jany ni byli», — skazaŭ aficyjny pradstaŭnik, faktyčna pracytavaŭšy pałažeńnie aficyjnaha statuta Biełaruskaha tavarystva Čyrvonaha Kryža.
Skandalnaja situacyja ŭźnikła paśla taho, jak rasijski resurs Sputnik paviedamiŭ pra pajezdku Dźmitryja Šaŭcova na akupavanyja terytoryi Ukrainy, u t. zv. «DNR», i apublikavaŭ videa ź im, dzie kiraŭnik biełaruskaha Čyrvonaha Kryža havoryć ščymlivyja słovy pra dziciačyja pakuty, apranuty ŭ kamizelku ź simvałam rasijskaj ahresii — litaraj Z na rukavie.
Biełaruskaje tavarystva Čyrvonaha Kryža — całkam praŭładnaja arhanizacyja, jakaja biezahavoračna padtrymlivaje režym Łukašenki va ŭsich jaho dziejańniach jak na słovach, tak i na spravie. Siabroŭ hetaj arhanizacyi, naprykład, zaŭsiody ŭklučajuć u skład vybarčych kamisij, i jany aktyŭna ŭdzielničajuć u falsifikacyi vybaraŭ roznaha ŭzroŭniu. Staršynia Homielskaj abłasnoj arhanizacyi Biełaruskaha tavarystva Čyrvonaha Kryža Hanna Smalak niadaŭna publična padtrymała raźmiaščeńnie jadziernaj zbroi ŭ Biełarusi. Pra heta jana zajaviła ŭ efiry homielskaha telebačańnia.
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary