Fota: The New England Journal of Medicine
Dziŭny vypadak byŭ padrabiazna apisany ŭ časopisie The New England Journal of Medicine. Pavodle spravazdačy, 64-hadovy mužčyna naviedaŭ kliniku pieršasnaj miedycynskaj dapamohi praz dva tydni paśla taho, jak zaŭvažyŭ źmienu koleru ŭ rotavaj połaści. Prykładna za 21 dzień da hetaha jon skončyŭ kurs antybijotykaŭ, jakija prymaŭ dla lačeńnia infiekcyi dziasnaŭ. Nieŭzabavie paśla źmianieńnia koleru jazyka pacyjentu pryznačyli supraćhrybkovyja preparaty z padazreńniem, što jon zaraziŭsia kandydozam połaści rota — adnoj z raznavidnaściaŭ hrybkovaj infiekcyi. Vyniku, adnak, supraćhrybkovaja terapija nie pryniesła. Tady lekary pastavili kančatkovy dyjahnaz — vałasaty jazyk.
Takaja anamalija vyklikajecca naroščvańniem i padaŭžeńniem jazykovych sasočkaŭ — malusieńkich vystupaŭ, jakimi pakryty jazyk luboha čałavieka i jakija ŭ zdarovym stanie majuć daŭžyniu kala 1 mm. U vyniku niedastatkovaj stymulacyi (paciortaści) vierchniaj častki jazyka na im moža adbyvacca nazapašvańnie białku, viadomaha jak kieracin (heta toj samy białok, ź jakoha składajucca vałasy na hałavie).
U ciažkich vypadkach daŭžynia jazykovych sasočkaŭ moža pavialičycca, praz što vierchniaja častka jazyka vyhladaje «vałasataj». Da taho ž na jazyku mohuć nazapašvacca reštki ježy, bakteryi i časam droždžy, u vyniku čaho jazyk moža afarboŭvacca ŭ roznyja kolery.
Bolšaść zarehistravanych vypadkaŭ apisvajuć čaściej za ŭsio karyčnievy abo čorny koler, tamu zialony jazyk mužčyny byŭ dla lekaraŭ nie vielmi zvyčajnym vypadkam. Ale vyśvietliłasia, što ŭ pacyjenta było niekalki faktaraŭ ryzyki hetaha zachvorvańnia: pažyły ŭzrost, niadaŭniaje ŭžyvańnie antymikrobnych preparataŭ i tytuniekureńnie.
Pry ŭsioj niezvyčajnaści vonkavaha vyhladu, adnak, u mužčyny nie było zarehistravana bolš surjoznych simptomaŭ, jak strata smaku abo bol. Vałasaty jazyk u cełym nie jość vialikaj prablemaj, i jaho možna adnosna lohka lačyć. U zhadanym vypadku lekary paraili mužčynu aściarožna čyścić jazyk zubnoj ščotkaj čatyry razy na dzień i padumać ab tym, kab kinuć kuryć. I niahledziačy na toje, što jon usio jašče zastavaŭsia kurcom padčas nastupnaha vizitu praz paŭhoda, jaho jazyk bolš nie byŭ zialonym, jak pišuć aŭtary artykuła.
Fota: vecteezy
The American Academy of Oral Medicine piša, što hetaje adnosna raspaŭsiudžanaje, časovaje i biasškodnaje zachvorvańnie sustrakajecca prykładna ŭ 13% nasielnictva. Ź im možna sutyknucca z-za drennaj hihijeny połaści rota, vykarystańnia lekaŭ, praciahłaha abo častaha vykarystańnia antybijotykaŭ, pramianiovaj terapii vobłaści hałavy i šyi, praźmiernaha ŭžyvańnia kavy ci harbaty abo kureńnia. Heta zachvorvańnie taksama moža raźvicca ŭ ludziej biez zuboŭ, tamu što ich dyjeta ź miakkaj ježy nie spryjaje narmalnamu adpadzieńniu sasočkaŭ.
Možna praduchilić uźniknieńnie zachvorvańnia, prosta vykonvajučy naležnuju hihijenu rotavaj połaści. Čystka vierchniaj častki jazyka zubnoj ščotkaj pavinna być častkaj rehularnych štodzionnych mierapryjemstvaŭ pa hihijenie połaści rota. Taksama siońnia dastupny šerah śpiecyjalnych pryład dla takoj pracedury: skrabki dla ačystki jazyka možna znajści ci nie ŭ kožnaj aptecy ci kaśmietyčnaj kramie.
Čytajcie taksama:
Paradantoz spryčyniaje i inšyja chvaroby: navat paskaraje demiencyju
Stamatołahi chacieli b, kab my viedali pra hetyja rečy
Čałaviectva staić na miažy najsurjoźniejšaha antybijatyčnaha kryzisu, papiaredžvaje SAAZ
