U Biała-Padlascy biełarus zhubiŭ bankaŭskuju kartku, i joj skarystalisia 12 razoŭ
U polskim horadzie Biała-Padlaska zatrymali žycharku horada, jakaja skarystałasia zhublenaj biełarusam bankaŭskaj kartkaj. Pra heta na padstavie paviedamleńnia miascovaj palicyi piša sajt «Biełaruś i śviet».
Biełarus źviarnuŭsia da polskich pravaachoŭnikaŭ na pazaminułym tydni. Jon raspavioŭ, što, vierahodna, zhubiŭ bankaŭskuju kartku — ale nie viedaŭ, dzie i kali.
Nie znajšoŭšy kartki, čałaviek pravieryŭ bałans rachunku ŭ mabilnaj prahramie. Vyjaviłasia, što chtości ŭžo paśpieŭ pravieści niekalki drobnych apieracyj na ahulnuju sumu amal u 1 tysiaču złotych.
Apieratyŭniki chutka vyśvietlili, što da incydentu moža być datyčnaja 58-hadovaja žančyna. Padčas razmovy taja pryznałasia, što znajšła kartu na rovarnaj ściežcy. Adnak zamiest taho kab viarnuć jaje, vyrašyła pahladzieć, ci zmoža vykarystać.
Usiaho ŭ vyniku žančyna zrabiła 12 tranzakcyj u kramach horada. A potym «praz zhryzoty sumleńnia» ŭziała dyj vykinuła kartku.
Zatrymanaja pryznała siabie vinavataj. Ciapier jaje los vyrašyć sud. Pavodle dziejnaha polskaha zakanadaŭstva za ŭčynienaje pravaparušeńnie žančynie moža pahražać pazbaŭleńnie voli na termin da 10 hadoŭ. Palicyjanty taksama zapatrabavali ŭ žycharki horada zakład.
Čynoŭniki prahavarylisia, što ŭ Biełarusi zastałosia tolki 8,8 miljona čałaviek? Heta niapravilnaja vysnova5
Kamientary